ယွန်း (NSS) - ဇွန် ၂၉

Rosatom အနေဖြင့် မြန်မာနိုင်ငံ၌ အပူစွမ်းအင်သုံးစီမံကိန်းများ အပါအဝင် အခြားစီမံကိန်းလုပ်ငန်းများပါ ပိုမိုရင်းနှီးမြှုပ်နှံရန် စိတ်ဝင်စားမှုများရှိနေကြောင်း Rosatom မှ ဒုတိယညွှန်ကြားရေးမှူးချုပ်က ဆို သည်။

ရုရှားနိုင်ငံ အဏုမြူစွမ်းအင်ကော်ပိုရေးရှင်း (Russian State Atomic Energy Cooperation “Rosatom”) မှ ဒုတိယညွှန်ကြားရေးမှူးချုပ် Mr. Spasskiy Nikolay က ဇွန်လ(၂၈)ရက်တွင် လျှပ်စစ်စွမ်းအားဝန်ကြီးဌာန ပြည်ထောင်စုဝန်ကြီး ဦးသောင်းဟန်အား ရန်ကုန်နည်းပညာတက္ကသိုလ်၌ လာရောက်တွေ့ဆုံစဥ် အထက်ပါကဲ့သို့ ဆိုထားခြင်းဖြစ်သည်။ 

ထိုသို့ တွေ့ဆုံစဥ် မြန်မာနိုင်ငံအတွက် လိုအပ်သော လျှပ်စစ်ဓာတ်အားထုတ်လုပ်နိုင်ရေးအတွက် ပူးပေါင်းဆောင်ရွက်ခွင့်ရရှိခဲ့ခြင်းကြောင့် ဂုဏ်ယူကြောင်း Mr. Spasskiy Nikolay ကဆိုသည်။

ထို့ပြင် Rosatom အနေဖြင့် မြန်မာနိုင်ငံ၌ အပူစွမ်းအင်သုံးစီမံကိန်းများနှင့် အခြားစီမံကိန်းလုပ်ငန်းများအတွက် ပိုမိုရင်းနှီးမြှုပ်နှံရန် စိတ်ဝင်စားမှုရှိကြောင်းကိုလည်း Mr. Spasskiy Nikolay က အသိပေးပြောဆိုခဲ့သည်။

အလားတူ MoU ရေးထိုးပြီးသော လေအားလျှပ်စစ်စီမံကိန်းများအတွက် စီမံကိန်းဖြစ်မြောက်နိုင်စွမ်း လေ့လာခြင်းလုပ်ငန်းကို တတ်နိုင်သမျှ ပူးပေါင်းကူညီဆောင်ရွက်သွားမည်ဖြစ်ကြောင်း ၎င်းက ဆိုသည်။

ထို့ပြင် အလားအလာကောင်းများစွာပိုင်ဆိုင်သည့် မြန်မာနိုင်ငံတွင် Rosatom ၏ အခန်းကဏ္ဍကို ပိုမိုမြှင့်တင် ဆောင်ရွက်ပေးသွားမည်ဖြစ်ကြောင်း Mr. Spasskiy Nikolay က အသိပေးပြောဆိုထားသည်။

ထို့နောက် (၂ဝ၂၂) ခုနှစ် နိုဝင်ဘာလတွင် လျှပ်စစ်စွမ်းအားဝန်ကြီးဌာန နှင့် ရုရှားဖက်ဒရေးရှင်းနိုင်ငံ Rosatom တို့ လက်မှတ်ရေးထိုးခဲ့သည့် နားလည်မှုစာချွန်လွှာအရ ဆောင်ရွက်ခဲ့သော အပူစွမ်းအင်သုံးဓာတ်အားပေးစက်ရုံ စီမံကိန်းအကြို ဖြစ်မြောက်နိုင်စွမ်း လေ့လာမှုအစီရင်ခံစာကို Rosatom မှ လျှပ်စစ်စွမ်းအားဝန်ကြီးဌာနသို့ ပေးအပ်ခဲ့သည်။

အလားတူ နျူကလီးယားအခြေခံအဆောက်အအုံ အကဲဖြတ်ခြင်းနှင့် မြှင့်တင်ခြင်းကဏ္ဍအတွက် နား လည်မှုစာချွန်လွှာ (Memorandum of Under-standing in the field of Nuclear Infrastructure assemment and enhancement) ကို သိပ္ပံနှင့်နည်းပညာဝန်ကြီးဌာနနှင့် Rosatom တို့အကြား လက်မှတ်ရေးထိုးခဲ့သည်။