ရောင်နီ (NSS) - ဇွန် ၂၁

စင်ကာပူနိုင်ငံမှာ ကလေးမွေးဖွားမှုနှုန်း တိုးမြှင့်ဖို့ အစီအစဉ် တစ်စိတ်တစ်ပိုင်း အနေနဲ့ ဇူလိုင်လမှစတင်​ပြီး​ကလေးသူငယ်ထောက်ပံ့ကြေး Baby Support Grant (BSG) အတွက် သတ်မှတ်ထားတဲ့ အရည်အချင်းနဲ့ပြည့်မီတဲ့ မိဘ ၁၃ဝဝဝ ခန့်ကို စင်ကာပူဒေါ်လာ ၃ဝဝဝ စီ ထပ်တိုး ထောက်ပံ့ပေးသွားမယ်လို့ ဝန်ကြီးချုပ် အင်ဒရာနီးရာဂျက် က ဗုဒ္ဓဟူးနေ့(ဇွန်လ ၂၁ ရက်) မှာ ပြောကြားခဲ့ပါတယ်။

စင်ကာပူမှာ စုစုပေါင်းကလေးမွေးဖွားနှုန်းဟာ အိမ်ထောင်ပြုမှု၊ ကလေးမွေးဖွားမှု နည်းပါးခြင်းကြောင့် ၂ဝ၂ဝ ပြည့်နှစ် မှ ၂ဝ၂၂ ခုနှစ်အတွင်း တစ်ဟုန်ထိုး ကျဆင်းသွားခဲ့ပါတယ်။ အဲဒီအတွက် ဇနီးမောင်နှံတွေကို ကလေးယူဖို့ အားပေးတဲ့အနေနဲ့ ကလေးသူငယ်ထောက်ပံ့ကြေး Baby Bonus Cash Gift ကို Covid-19 ကာလအတွင်းက ပထမဆုံးမိတ်ဆက်ခဲ့ပါတယ်။

၎င်းဟာ ၂ဝ၂ဝ ​​ပြည့်နှစ်၊ အောက်တိုဘာလ ၁ ရက်မှ ၂ဝ၂၂ ခုနှစ်၊ စက်တင်ဘာလ ၃ဝ ရက်အထိ ပေးချေမှုတွေပြုလုပ်ခဲ့ပြီး အခု ၂ဝ၂၃ ခုနှစ်မှာတော့ အဆိုပါ ဘတ်ဂျက်ကိုပဲ ၂ဝ၂၂ ခုနှစ် အောက်တိုဘာလ ၁ ရက်မှ ၂ဝ၂၃ ခုနှစ် ဖေဖော်ဝါရီ ၁၃ ရက်ကြား ကလေးမွေးဖွားသူတွေအတွက် ဒေါ်လာ ၃ဝဝဝ ထပ်ပြီး တိုးမြှင့်ပေးခဲ့ပါတယ်။

ဒီအတွက် အရည်အချင်းပြည့်မီတဲ့ မိဘတွေဟာ မကြာခင် အကြောင်းကြားစာတွေ လက်ခံရရှိလိမ့်မယ်လို့ သိရပါတယ်။

ဒါ့အပြင် ၂ဝ၂၃ ခုနှစ်ဘတ်ဂျက်အတွက် နောက်ထပ်ထုတ်ပြန်ခဲ့တဲ့ အစီအမံအသစ် တစ်စိတ်တစ်ပိုင်း မှာ ၂ဝ၂၃ ခုနှစ် ဖေဖော်ဝါရီလ ၁၄ ရက် ဒါမှမဟုတ် ၂ဝ၂၃ ခုနှစ် ဖေဖော်ဝါရီ ၁၄ ရက်နောက်ပိုင်း ကလေးမွေးဖွားတဲ့ စင်ကာပူနိုင်ငံသား မိဘတွေအတွက် သီးခြား Baby Bonus Cash Gift ပုံစံနဲ့ ဒေါ်လာ ၃ဝဝဝ ထပ်မံထောက်ပံ့ပေးသွားဦးမှာ ဖြစ်တယ်လို့ သိရပါတယ်။

ဒါကြောင့် သတ်မှတ်ထားတဲ့ အရည်အချင်းနဲ့ ပြည့်မီမယ်ဆိုရင် စင်ကာပူနိုင်ငံသား မိဘတွေဟာ သားဦးနဲ့ ဒုတိယကလေးမွေးချိန်မှာ ဒေါ်လာ ၈ဝဝဝ မှ ဒေါ်လာ ၁၁ဝဝဝ ကြားထိ ရရှိနိုင်မှာဖြစ်ပြီး တတိယမြောက်ကလေးမွေးချိန်မှာတော့ ဒေါ်လာ ၁၀၀၀၀ မှ ၁၃ဝဝဝ ထိ တိုးမြှင့်ရရှိနိုင်မှာ ဖြစ်ပါတယ်။

Baby Bonus Cash Gift ထောက်ပံ့ကြေးကို ကလေးအသက် ၆ နှစ်ထိ ထောက်ပံ့ဖို့ ရည်ရွယ်ထားပေမယ့် လက်ရှိမှာတော့ ကလေးရဲ့ ပထမ ၁၈ လအတွက်သာ အရစ်ကျနဲ့ ထုတ်ပေးထားနိုင်ပါတယ်။ ဒါပေမယ့် အဆိုပါထောက်ပံ့ကြေးဟာ နို့စို့အရွယ် ကလေးပြုစုပျိုးထောင်မှုကုန်ကျစရိတ်တွေကို ပြေလျော့စေနိုင်တယ်လို့ သိရပါတယ်။