NP News - ဇွန် ၂ဝ

ကယားပြည်နယ်၊ မယ်စဲ့မြို့နယ်ရှိ နယ်ခြားစောင့်တပ်(BGF) တပ်ရင်း(၂)ခုသည် KNPLF အဖြစ် ပြန်လည်အမည်ပြောင်းကာ လက်နက်ကိုင်အဖွဲ့များနှင့်ပူးပေါင်းတိုက်ခိုက်မှုများရှိနေကြောင်း သတင်းများထွက်ပေါ်လျက်ရှိသည်။

မယ်စဲ့မြို့နယ်၊ ပန်တိမ်းအခြေစိုက် BGF တပ်ရင်းအမှတ်(၁ဝဝ၄)နှင့် (၁ဝဝ၅) တပ်ရင်း(၂)ခုသည် ကရင်နီလူမျိုးပေါင်းစုံလွတ်မြောက်ရေးတပ်ဦး(ကလလတ-KNPLF) အဖြစ် အမည်ပြောင်းကာ ခွဲထွက်ရပ်တည်သွားခဲ့ကြောင်း ဒေသခံသတင်းအရင်းအမြစ်များကလည်း ပြောဆိုမှုများရှိနေကြောင်း သတင်းများထွက်ပေါ်လျက်ရှိသည်။

ကလလတ(KNPLF)လက်နက်ကိုင်အဖွဲ့အား ပြီးခဲ့သည့် ၂ဝဝ၉ ခုနှစ်အတွင်း၌ နိုင်ငံတော်အစိုးရဘက်က နယ်ခြားစောင့်တပ်(BGF)အဖြစ် ပြောင်းလဲဖွဲ့စည်းပေးခဲ့ကြောင်း သိရသည်။

သို့သော် လက်ရှိတွင် ၎င်း BGF တပ်ရင်း(၂)ခုသည် ခွဲထွက်ပြီး ကလလတ(KNPLF)အဖြစ် ပြန်လည်အမည်တပ်ကာ အစိုးရ၏ စခန်းများကို 4K တပ်ပေါင်းစုအဖြစ် မဟာမိတ်စုဖွဲ့ထားသည့် KNU/KNLA၊ KNPP/KA၊ KNDF တို့နှင့်ပူးပေါင်းကာ တိုက်ခိုက်လျက်ရှိကြောင်း သတင်းများထွက်ပေါ်နေသည်ကို တွေ့ရသည်။

ပြီးခဲ့သည့် ရက်ပိုင်း ဇွန်လ ၁၄ ရက်မှစတင်ကာ KNPLF ပါဝင်သော အဖွဲ့များသည် မယ်စဲ့မြို့မရဲစခန်းအပါအဝင် ဗျူဟာကုန်း နှင့် တပ်စခန်းများကို တိုက်ခိုက်သိမ်းပိုက်မှုများရှိကြောင်း ထုတ်ပြန်ပြောဆိုမှု များလည်း ရှိနေသည်။

ထို့ပြင် မယ်စဲ့မြို့နယ်တစ်ဝိုက်၌ တပ်မတော်နှင့် လက်နက်ကိုင်အဖွဲ့အစည်းများကြားတွင် တိုက်ပွဲများ ပိုမိုပြင်းထန်လာနိုင်ကြောင်း သုံးသပ်မှုများလည်း ရှိနေသည်။

“ဒါကတော့ စစ်ရေးအရ ဟိုဘက်က သာနေတယ်ဆိုတဲ့ အဓိပ္ပါယ်ပေါ့ဗျာ။ ဒီအဖွဲ့က တကယ်ပြောရမယ်ဆိုရင် အစိုးရနဲ့ အဆင်ပြေနေတဲ့ အဖွဲ့ကို။ အစိုးရနဲ့ အဆင်ပြေတဲ့အဖွဲ့ဆိုတော့ နိုင်ငံရေးအရ အခုဟာက နစကကို ဆန့်ကျင်တဲ့သူတွေက ပြန်တိုက်ကြတာဆိုတော့ အဲဒီလိုတိုက်နေရင်းကနေ သူတို့က တိတ်တိတ်ကူညီတာတွေ ရှိတယ်ဆိုတော့ အဲဒါတွေကို သိပြီးတော့ ဒီဘက်က ဖမ်းတာ၊ ဆီးတာ အရေးယူတာ လုပ်လာတဲ့အခါမှာ ကျန်တဲ့ တပ်ရင်း(၂)ရင်းကလည်း ပြန်တောခိုသွားတာပေါ့။ အဲဒီတော့ အဲဒါမျိုးဖြစ်စဉ်က ဘယ်လိုအခြေအနေမှာ ဖြစ်တတ်တုန်းဆိုတော့ သူတို့ကာယကံရှင်တွေက ဘယ်ဘက်က သာမလဲပေါ့နော်။ သာနေတယ်လို့ ထင်တဲ့ဘက်ကို ပူးပေါင်းကြတာ များတယ်။ အဲဒီတော့ အဲဒီဒေသမှာ အခြေအနေတွေက ဟိုဘက်က သာနေတဲ့အနေအထားလို့ သုံးသပ်ရမှာပေါ့”ဟု လွှတ်တော်အမတ်ဟောင်း ဦးရဲထွန်းက NP News ကို သုံးသပ်ပြောဆိုထားသည်။

ထိုသို့ BGF တပ်ရင်း(၂)ခု ခွဲထွက်သွားခြင်းသည် နစကအစိုးရအတွက် ရန်သူပိုများသွားစေကြောင်းလည်း ဦးရဲထွန်းက ဆက်လက်သုံးသပ်ထားသည်။

ထို့ပြင် တပ်မတော်လုံခြုံရေးအဖွဲ့သည် ယခုရက်ပိုင်း ဇွန်လ ၁၇ ရက်တွင် KNPLF ဌာနချုပ်ကို လေယာဉ်ဗုံးကြဲကာ ပြန်လည်တိုက်ခိုက်မှုများရှိခဲ့ကြောင်း သတင်းများထွက်ပေါ်လျက်ရှိသည်။ 

လက်ရှိတွင် ကယားပြည်နယ်၊ မယ်စဲ့မြို့နယ်တစ်ဝိုက်၌ ဖြစ်ပွားနေသည့် တိုက်ပွဲများကြောင့် ဒေသခံပြည်သူလူ (၄ဝဝဝ)ကျော် နေရပ်စွန့်ခွာ စစ်ဘေးရှောင်နေရကြောင်း သိရသည်။