ဂျန်ဇက် (NSS) - ဇွန် ၁၇

တရုတ်နိုင်ငံ နဲ့ အမေရိကန်နိုင်ငံတို့ဟာ လက်ရှိ မူဝါဒများအတိုင်း ဆက်လက်လုပ်ဆောင်နေမယ်ဆိုရင် စစ်ရေးအရ ထိပ်တိုက်တွေ့ဆုံမှုများဖြစ်လာနိုင်ဖွယ်ရှိနေကြောင်း အမေရိကန်နိုင်ငံခြားရေးဝန်ကြီးဟောင်း ဟင်နရီကစ်ဆင်ဂျာက သတိပေးပြောဆိုလိုက်ပါတယ်။

ထိုင်ဝမ်အရေးနဲ့ပတ်သက်ပြီး အမေရိကန် နဲ့ တရုတ်နိုင်ငံကြား ဆက်ဆံရေး တင်းမာမှုများရှိလာခဲ့ပြီးနောက် ဟင်နရီကစ်ဆင်ဂျာက အခုလိုမျိုး သတိပေးလိုက်တာဖြစ်ပါတယ်။ ၎င်းက "အမေရိကန် နဲ့ တရုတ်နိုင်ငံတို့ဟာ လက်ရှိပုံစံအတိုင်းသွားမယ်ဆိုရင် စစ်ရေးပဋိပက္ခများဆက်လက်ဖြစ်လာနိုင်တယ်။ အမေရိကန် နဲ့ တရုတ်နိုင်ငံတို့ဟာ တစ်နိုင်ငံအပေါ်တစ်နိုင်ငံက သံသယဖြစ်မှုတွေကြီးမားနေတယ်။ တရုတ်နိုင်ငံကို အကြီးမားဆုံးခြိမ်းခြောက်နေတဲ့နိုင်ငံက အမေရိကန်ဖြစ်တယ်လို့ တရုတ်ဘက်က ရှုမြင်နေသလို အမေရိကန်ကလည်း တရုတ်နိုင်ငံအပေါ် မယုံကြည်မှုများပြားနေတယ်။ နှစ်နိုင်ငံကြားစစ်ပွဲဖြစ်လာမယ်ဆိုရင် ကုန်ကျစရိတ်ပိုမိုများပြားလာမှာဖြစ်တယ်။ လက်ရှိအချိန်မှာ နှစ်နိုင်ငံစလုံးဟာ ချောက်ကမ်းပါးထိပ်ကနေ ပြန်ဆုတ်ခွာရမှာဖြစ်တယ်။ တင်းမာမှုအရှိန်ကို လျှော့ချဖို့ ကြိုးပမ်းရမှာဖြစ်တယ်"လို့ပြောပါတယ်။ 

အမေရိကန် နဲ့ တရုတ်နိုင်ငံကြားစစ်ရေး ပဋိပက္ခများမဖြစ်လာစေဖို့အတွက် လက်ရှိဆက်ဆံရေးလမ်း ကြောင်းကို အပြောင်းအလဲလုပ်ဆောင်ရမှာဖြစ်ကြောင်း၊ နှစ်ဖက်စလုံးဟာ တင်းမာမှုများကိုလျှော့ချပစ်ရမှာဖြစ်ကြောင်း ကစ်ဆင်ဂျာက သုံးသပ်ပြောဆိုထားပါတယ်။ ၎င်းက "လက်ရှိအချိန်အထိတော့ နှစ်နိုင်ငံစလုံးဟာ စေ့စပ်ဆွေးနွေးမှုတွေမလုပ်နိုင်သေးဘူး။ ဒါပေမယ့် နှစ်နိုင်ငံစလုံးဟာ စေ့စပ်ဆွေးနွေးရေးလမ်းကြောင်းအပေါ်ကို ရောက်ရှိလာမယ်လို့မျှော်လင့်ထားတယ်"လို့ ပြောပါတယ်။ 

အမေရိကန်ဟာ ထိုင်ဝမ်ကို စစ်လက်နက်ပစ္စည်းများ ရောင်းချပေးနေသလို အမေရိကန်လွှတ်တော်ကိုယ်စားလှယ်များ မကြာခဏသွားရောက်နေခြင်းကြောင့် အမေရိကန် နဲ့ တရုတ်နိုင်ငံကြားတင်းမာမှုများရှိနေကြောင်းသိရပါတယ်။ တရုတ်နိုင်ငံက ထိုင်ဝမ်ဟာ ၎င်းတို့ ပိုင်နက်ဖြစ်ပြီး အမေရိကန်အနေနဲ့  One China မူဝါဒတွေကို လေးစားလိုက်နာစေလိုကြောင်းပြောထားပါတယ်။