မျိုးကြီး (NSS) - ဇွန် ၁၇

ပြည်သူလူထုလိုလားသော ပါတီစုံဒီမိုကရေစီလမ်းကြောင်းပေါ်မှ သွေဖယ်ရန် ဆောင်ရွက်မည်မဟုတ်ကြောင်း နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။

၎င်းက ယမန်နေ့(ဇွန်လ ၁၆ ရက်)တွင် နေပြည်တော်ရှိ ကာကွယ်ရေးဦးစီးချုပ်ရုံး(ကြည်း)ရုံး ဌာနအသီး သီးတွင် တာဝန်ထမ်းဆောင်နေသည့် အရာရှိငယ်များနှင့်တွေ့ဆုံစဉ် အထက်ပါကဲ့သို့ ထည့်သွင်းပြောဆိုခဲ့ခြင်းဖြစ်သည်။

၂ဝ၁ဝ ပြည့်နှစ် ပါတီစုံဒီမိုကရေစီ ပထမအကြိမ်ရွေးကောက်ပွဲ၌ အနိုင်ရရှိသည့်ပါတီဘက်မှ ဒီမိုကရေစီအစိုးရတစ်ရပ်တက်လာခဲ့ပြီး တပ်မတော်အနေဖြင့် လက်တွဲညီညီကြိုးပမ်းဆောင်ရွက်ခဲ့သည်ဟု ဗိုလ်ချုပ်မှူးကြီးမင်းအောင်လှိုင်က ဆိုသည်။

ထို့ပြင် ၂ဝ၁၅ ခုနှစ်အထွေထွေရွေးကောက်ပွဲအနိုင်ရရှိပြီး တက်လာသည့် ဒီမိုကရေစီအစိုးရ ဒုတိယသက် တမ်း၌ တပ်မတော်အနေဖြင့် ဖြတ်သန်းတွေ့ကြုံခဲ့ရသည့် နိုင်ငံရေးအတွေ့အကြုံများအရ ဖြစ်သင့်ဖြစ်ထိုက်သည်များ၊ လုပ်သင့်လုပ်ထိုက်သည်များကို အကြံဉာဏ်ပေးခြင်း၊ ကူညီပေးခြင်းများ ဆောင်ရွက်ခဲ့သော်လည်း ထိရောက်မှုအားနည်းသည်ကို တွေ့ရှိခဲ့ရကြောင်းလည်း ၎င်းက ဆက်လက်ပြောဆိုထား သည်။

ပြီးခဲ့သော ၂ဝ၂ဝ ပြည့်နှစ်ရွေးကောက်ပွဲတွင် မဲစာရင်းကွဲလွဲမှုများကို ဖြေရှင်းဆောင်ရွက်ပေးရန် တပ်မတော်မှ ပြောဆိုခဲ့သော်လည်း ဆောင်ရွက်ပေးခြင်းမရှိသည့်အပြင် နိုင်ငံတော်အာဏာကို အဓမ္မရယူရန် လုပ်ဆောင်လာခဲ့သည့်အတွက် တပ်မတော်မှ နိုင်ငံတော်၏ တာဝန်များကို ဆောင်ရွက်ခဲ့ရခြင်းဖြစ်ကြောင်းလည်း တပ်ချုပ်က အရာရှိငယ်များကို အသိပေးပြောဆိုခဲ့သည်။

ထိုသို့ အာဏာရယူခဲ့ခြင်းသည် ပြည်သူလူထု လိုလားသည့် ပါတီစုံဒီမိုကရေစီလမ်းကြောင်း ခိုင်မာရေးအတွက်သာဖြစ်ပြီး ၎င်းလမ်းကြောင်းပေါ်မှသွေဖယ်ရန် ဆောင်ရွက်မည်မဟုတ်ကြောင်းလည်း ဗိုလ်ချုပ်မှူးကြီးမင်းအောင်လှိုင်က ကတိပြုကာ ထည့်သွင်းပြောဆိုခဲ့သည်။

လက်ရှိအချိန်တွင် နိုင်ငံတော်အာဏာရယူထားသည့် ဗိုလ်ချုပ်မှူးကြီးမင်းအောင်လှိုင်အနေဖြင့် အထွေ ထွေရွေးကောက်ပွဲကျင်းပပေးမည့်ရက်ကို အတိအကျတရားဝင် ထုတ်ဖော်ပြောဆိုခြင်း မရှိသေးသော် လည်း ရွေးကောက်ပွဲအကြိုလုပ်ငန်းစဉ်များ ဆောင်ရွက်နေသည်ကို တွေ့ရှိရသည်။

အခြားတစ်ဖက်၌ နိုင်ငံ့တာဝန်ထမ်းဆောင်နေသည့် နစကအစိုးရအား ဆန့်ကျင်တော်လှန်နေသည့် လက်နက်ကိုင်အဖွဲ့အစည်းများမှာလည်း လက်ရှိတွင်များပြားလျက်ရှိပြီး နေရာအနှံ့အပြားတွင် တိုက်ပွဲများ ဖြစ်ပွားလျက်ရှိနေသည်ကို တွေ့ရှိရသည်။

တိုင်းပြည်တည်ငြိမ်အေးချမ်းရေးနှင့်ပတ်သက်၍ ဗိုလ်ချုပ်မှူးကြီးမင်းအောင်လှိုင်က တိုင်းပြည်တည်ငြိမ်ရေးကို ဆောင်ရွက်ရာတွင် ဥပဒေနှင့်အညီသာ ထိန်းထိန်းသိမ်းသိမ်းဆောင်ရွက်နေကြောင်း ထည့်သွင်းပြောဆိုထားသည်။