မျိုးကြီး (NSS) - ဇွန် ၁၄

ကိုဗစ်ကပ်ရောမတိုင်မီ ပညာသင်နှစ်များနှင့် နှိုင်းယှဉ်ပါက ကျောင်းသားဦးရေ (၂)သိန်းခန့်သည် ကျောင်းနှင့်ကင်းကွာနေသေးကြောင်း တွေ့ရှိရသည်ဟု စာတမ်းတစ်စောင်က ဖော်ပြထားသည်။

နေပြည်တော်၌ ပြီးခဲ့သော လပိုင်းအတွင်း ကျင်းပခဲ့သည့် မြန်မာနိုင်ငံလုံးဆိုင်ရာပညာရေးညီလာခံ (၂ဝ၂၃)တွင် ပညာရေးဝန်ကြီးဌာနမှ တာဝန်ရှိသူတစ်ဦးက ဖတ်ကြားတင်ပြခဲ့သော စာတမ်း၌ အထက်ပါကဲ့သို့ ထည့်သွင်းဖော်ပြထားခြင်း ဖြစ်သည်။

၂ဝ၁၉ ခုနှစ် ကြားဖြတ်လူဦးရေသန်းခေါင်စာရင်းအရ မြန်မာနိုင်ငံတွင် (၅)နှစ်အထက် လူဦးရေ ၄၆ ဒသမ ၅ သန်းရှိပြီး နိုင်ငံတစ်ဝန်း ကျောင်းလုံးဝမနေဘူးသူ (၈ ဒသမ ၁)ရာခိုင်နှုန်းရှိကာ အလယ်တန်းအထိ ပညာသင်ယူခဲ့သူ (၁၈ ဒသမ ၂)သန်းခန့်နှင့် အထက်တန်းပညာသင်ယူခဲ့သူ (၇)သန်းကျော်ခန့်ရှိကြောင်း သိရသည်။

လူဦးရေ (၃)သန်းနီးပါးခန့်သာ ဘွဲ့ရရှိခဲ့ကြောင်း သိရသည်။

ထို့ကြောင့် ကျောင်းနေမြဲသူများ တိုးတက်လာစေရန်အတွက် နှစ်ချို့ကင်းကွာကျောင်းသားများ ကျောင်းတွင်းသို့ ပြန်လည်ရောက်ရှိစေရေး နည်းလမ်းများရှာဖွေရန် လိုအပ်လျက်ရှိပြီး ၎င်းကဲ့သို့ နည်းလမ်းများရှာဖွေနိုင်ရန်အတွက် ယခုစာတမ်းအား ပြုစုရခြင်းဖြစ်ကြောင်း ဖော်ပြထားသည်။

အဆိုပါစာတမ်းတွင် မူလတန်းအဆင့်၊ အလယ်တန်းအဆင့်နှင့် အထက်တန်းအဆင့်တို့၏ ၂ဝ၁၇-၂ဝ၁၈ မှ ၂ဝ၂၂-၂ဝ၂၃ ပညာသင်နှစ်အထိ နှစ်အလိုက် တက်ရောက်ပညာသင်ယူခဲ့သော ကျောင်းသားဦးရေအား သရုပ်ဖော်စာရင်းအင်းပညာ နည်းလမ်းဖြင့် အသုံးပြုလေ့လာခဲ့ကြောင်း ဆိုထားသည်။

၎င်းကဲ့သို့ လေ့လာမှုများအရ ၂ဝ၁၇-၂ဝ၁၈၊ ၂ဝ၁၈-၂ဝ၁၉ နှင့် ၂ဝ၁၉-၂ဝ၂ဝ ပညာသင်နှစ်များတွင် နှစ်စဉ်ကျောင်းသားဦးရေ စုစုပေါင်း (၉)သန်းနီးပါးရှိခဲ့ကြောင်း စာတမ်း၌ ဖော်ပြထားသည်။

ကိုဗစ်-၁၉ ကာလအလွန် ၂ဝ၂၁-၂ဝ၂၂ ပညာသင်နှစ်တွင် ကျောင်းသားဦးရေ (၅)သန်းကျော်အထိ လျော့ကျသွားခဲ့ပြီး ၂ဝ၂၂-၂ဝ၂၃ ပညာသင်နှစ်တွင် (၇)သန်းကျော်သို့ ပြန်လည်တိုးတက်လာခဲ့ကြောင်း စာတမ်းက ဆိုထားသည်။

သို့သော် ကိုဗစ်-၁၉ မတိုင်မီ ပညာသင်နှစ်များနှင့် နှိုင်းယှဉ်ပါက ကျောင်းသားဦးရေ (၂)သိန်းနီးပါးခန့်သည် ကျောင်းနှင့် ကင်းကွာနေသေးကြောင်း တွေ့ရှိရသည်ဟုလည်း စာတမ်း၌ ထည့်သွင်းတင်ပြထားသည်။

ထို့ကြောင့် နှစ်ချို့ကင်းကွာကျောင်းသားများကို ပြန်လည်လက်ခံရေးနှင့်ပတ်သက်၍ ကျောင်းသားများအနေဖြင့် မူလထွက်ထားသည့်အတန်းများတွင် တက်ရောက်လိုပါက အရည်အချင်းစစ်စာမေးပွဲဖြေဆိုရန် မလိုဘဲ တက်ရောက်နိုင်ရေး စီစဉ်ဆောင်ရွက်ပေးရန် စာတမ်း၌ အကြံပြုတင်ပြထားသည်။

ထို့ပြင် ကျောင်းနှင့်ကင်းကွာနေသော ကျောင်းသားသည် မူလတက်ရောက်ခဲ့သည့်အတန်းကို မတက်ရောက်လိုပဲ အသက်အရွယ်နှင့်ကိုက်ညီသော အတန်းသို့ ကျော်တက်လိုပါက တစ်ဆင့်နိမ့်အတန်း၏ အရည်အချင်းစစ်စာမေးပွဲကို ဖြေဆိုစေပြီး တက်ရောက်နိုင်ရေး စီစဉ်ဆောင်ရွက်ပေးရန်လည်း အကြံပြုတင်ပြထားသည်။

လက်ရှိတွင် ပညာရေးဝန်ကြီးဌာနအနေဖြင့် ယခု ၂ဝ၂၃-၂ဝ၂၄ ပညာသင်နှစ်၌ အမျိုးသားပညာရေးဥပဒေပါ ပြဋ္ဌာန်းချက်များနှင့်အညီ KG+12 အခြေခံပညာရေးစနစ်သစ်ကို အကောင်အထည်ဖော်ဆောင်ရွက်လျက်ရှိနေသည်။