မျိုးကြီး (NSS) - ဇွန် ၁၁

မိုခါမုန်တိုင်းဒဏ် အပြင်းထန်ဆုံးခံခဲ့ရသော ရခိုင်ပြည်နယ်၌ လျှပ်စစ်မီးအား ယခုဇွန်လကုန်ဝန်းကျင်တွင် ရာနှုန်းပြည့် ပြန်လည်ဖြန့်ဖြူးပေးသွားမည်ဖြစ်ကြောင်း သတင်းရရှိသည်။

မုန်တိုင်းကြောင့် ပျက်စီးဆုံးရှုံးမှုများပြားခဲ့သော ရခိုင်ပြည်နယ် စစ်တွေမြို့နှင့် ပုဏ္ဏားကျွန်းမြို့တို့တွင် လျှပ်စစ်မီး ပြန်လည်ရရှိနေပြီဖြစ်ကြောင်း ရခိုင်ပြည်နယ်အစိုးရအဖွဲ့ပြောခွင့်ရ ဦးလှသိန်းက NP News ကို ပြောသည်။

ရခိုင်ပြည်နယ်တွင် မြို့နယ်ပေါင်း(၁၇)မြို့နယ်ရှိသည့်အနက် မုန်တိုင်းဒဏ်ကြောင့် လျှပ်စစ်မီးများ ပြတ်တောက်ခဲ့ရသည့် မြို့နယ်ပေါင်း (၁ဝ)မြို့နယ်ရှိခဲ့ကြောင်း သိရသည်။

ထိုသို့ လျှပ်စစ်မီးပြတ်တောက်ခဲ့သော (၁ဝ)မြို့နယ်အနက် စစ်တွေမြို့နယ်နှင့် ပုဏ္ဏားကျွန်းမြို့နယ်တို့ကို ပြီးခဲ့သော ဇွန်လ ၇ ရက်တွင် လျှပ်စစ်မီးပြန်လည်ပေးနိုင်ခဲ့ပြီဖြစ်ကြောင်း သိရသည်။

“ရခိုင်မှာ လတ်တလော မီးမရတဲ့မြို့နယ် (၁ဝ)မြို့နယ်ပဲ ရှိတယ်။ အဲဒီမှာ (၂)မြို့နယ် လင်းပြီဆိုတော့ (၈)မြို့နယ်ပဲ ကျန်တယ်။ အဲဒီ (၈)မြို့နယ်တွေကလည်း ဒီလကုန်ရင် လင်းမယ်”ဟု ဦးလှသိန်းက ပြောသည်။

မုန်တိုင်းကြောင့် ရခိုင်ပြည်နယ်တွင် လျှပ်စစ်မီးတိုင် (၃ဝဝဝ)ထက်မနည်း ပျက်စီးဆုံးရှုံးခဲ့ပြီး လျှပ်စစ်တာဝါတိုင်များ၊ မီးကြိုးများ၊ ထရန်စဖော်မာများသည်လည်း အများအပြားပျက်စီးဆုံးရှုံးခဲ့သည်။

ဆက်လက်ပြီး ဦးလှသိန်းက “(၁ဝ)မြို့နယ်လောက်မှာ လျှပ်စစ်မီးတိုင်တွေ အလဲဆုံးက စစ်တွေ၊ ပုဏ္ဏားကျွန်း၊ ကျောက်တော် အဲဒီမြို့(၃)မြို့ကပေါ့။ စစ်တွေမြို့ကတော့ အစိုးရလည်း ရုံးစိုက်တယ်။ မြို့ကလည်း မြို့ကြီးဖြစ်တယ်။ မြို့တော်လည်း ဖြစ်တယ်ဆိုတော့ စစ်တွေမြို့ကို ၂၃ဝ ကေဗွီမဟာဓာတ်အားလိုင်းရောက်အောင် (၇)ရက်နေ့မှာ လုပ်နိုင်ခဲ့တယ်။ အဲဒီမဟာဓာတ်အားလိုင်း ပုဏ္ဏားကျွန်းကနေ ပြန်ခွဲတဲ့ ရသေ့တောင်၊ ဘူးသီးတောင်၊ မောင်တောတို့ကြတော့ မရသေးဘူးပေါ့။ မရသေးဘူးဆိုတာက ပုဏ္ဏားကျွန်းနဲ့ ရသေ့တောင်ကြားမှာ တာဝါတိုင်တွေလည်းရှိတယ်။ နောက် ၆၆ ကေဗွီ တွေလည်းရှိတယ်။ အဲဒီဟာတွေ ပြန်စစ်ရတာပေါ့။ အလားတူပဲ ပုဏ္ဏားကျွန်းကနေ ကျောက်တော်သွားတဲ့ လမ်းတွေမှာ အဲဒီလိုတာဝါတိုင်ပျက်တာတို့၊ ဓါတ်မီးတိုင်ကျိုးတာတွေ ရှိတာပေါ့”ဟု ဆိုသည်။

ရခိုင်ပြည်နယ်အတွင်း လျှပ်စစ်ဓာတ်အား အမြန်ဆုံးပြန်လည်ရရှိရေးအတွက် မေလ ၁၈ ရက်မှစတင်ကာ လူအင်အား၊ စက်ယန္တရားအင်အားများဖြင့် အင်တိုက်အားတိုက်ဆောင်ရွက်ခဲ့ကြောင်း လျှပ်စစ်စွမ်းအားဝန်ကြီးဌာနက ဆိုထားသည်။

ထိုသို့ဆောင်ရွက်ရာတွင် ၂၃ဝ ကေဗွီ အမ်း - မြောက်ဦး - ပုဏ္ဏားကျွန်း ဓာတ်အားလိုင်းနှင့် ၆၆ ကေဗွီ ပုဏ္ဏားကျွန်း - စစ်တွေဓာတ်အားလိုင်းတို့ကို ဇွန်လ ၇ ရက်၌ ရာနှုန်းပြည့် ဆောင်ရွက်ပြီးဖြစ်ကြောင်း ဝန်ကြီးဌာနက ဆိုထားသည်။

ထို့ပြင် ၆၆ ကေဗွီ ပုဏ္ဏားကျွန်း - ကျောက်တော်၊ ပုဏ္ဏားကျွန်း - မြောက်ဦး၊ ပုဏ္ဏားကျွန်း-ရသေ့တောင်၊ ရသေ့တောင် - ဘူးသီးတောင်ဓာတ်အားလိုင်း ပြင်ဆင်ရေးလုပ်ငန်းများကို ဆက်လက်ဆောင်ရွက်နေပြီး ဇွန်လ စတုတ္ထပတ်နှင့် ဇူလိုင်လ ပထမပတ်တို့တွင် ရာနှုန်းပြည့် ပြီးစီးမည်ဖြစ်၍ မြို့နယ်အားလုံးသို့ လျှပ် စစ်ဓာတ်အားပြန်လည် ဖြန့်ဖြူးပေးနိုင်မည် ဖြစ်ကြောင်းလည်း လျှပ်စစ်စွမ်းအားဝန်ကြီးဌာနက အသိပေးထားသည်။