NP News - ဇွန် ၁၁

ရန်ကုန်မြို့ရှိ အခွန်ရုံး နှင့် နေရာ(၆)ခုတွင် ဖောက်ခွဲမှုများ ကျူးလွန်ထားသော Brave Eagle အဖွဲ့မှ ခေါင်းဆောင် အပါအဝင်(၅)ဦးကို ဖမ်းဆီးရမိကြောင်း နစကမှထုတ်ပြန်ထားသည်။

နစကမှ ဇွန်လ(၁ဝ)ရက် ညပိုင်းတွင် အထက်ပါကဲ့သို့ အသိပေးထုတ်ပြန်ထားခြင်းဖြစ်သည်။

ပြီးခဲ့သည့် ဇွန်လ(၅)ရက်‌၊ နေ့လည်(၁၂)နာရီအချိန်ခန့်တွင် ကျောက်တံတားမြို့နယ်၊ အမှတ်(၄)ရပ်ကွက်၊ ပန်းဆိုးတန်းလမ်း၊ ပြည်တွင်းအခွန်များဦးစီးမှူးရုံး(၃)လွှာရှိ ကုမ္ပဏီများဆိုင်ရာ အခွန်ဌာန၏ ပြည်သူများထိုင်ရန်ပြုလုပ်ထားသည့် စတီးခုံများဘေးမှ ပေါက်ကွဲမှုဖြစ်ပွားခဲ့ကြောင်း သိရသည်။

၎င်းပေါက်ကွဲမှုကြောင့် အခွန်ဌာနမှ ဝန်ထမ်း(၅)ဦးနှင့် ပြည်သူတစ်ဦး ထိခိုက်ဒဏ်ရာများ ရရှိခဲ့ကြောင်း သိရသည်။

ထို့ကြောင့် ဖြစ်စဥ်နှင့်ပတ်သက်၍ လုံခြုံရေးတပ်ဖွဲ့ဝင်များက ဖော်ထုတ်ခဲ့ရာ ဖြစ်စဥ်အားကျူးလွန်ခဲ့သူသည် ဇွန်လ(၅)ရက်၊ နေ့လည်ပိုင်းတွင် ပန်းဆိုးတန်းလမ်းပေါ်မှ အခွန်ဦးစီးမှူးရုံးသို့ နီ/ညိုရောင်လက်ဆွဲအိတ်နှင့် စက္ကူဖိုင်တို့ကို ကိုင်ဆောင်ကာ ဝင်ရောက်လာခဲ့ကြောင်း နစကမှဆိုထားသည်။

ထို့နောက် ၎င်းသည် ပေါက်ကွဲမှုဖြစ်ပွားခဲ့သည့် တတိယထပ်ရှိ စတီးထိုင်ခုံတွင် (၂)မိနစ်ခန့်ထိုင်၍ လက် ဆွဲအိတ်ကို ထိုင်ခုံဘေးတွင်ချထားကာ အဝေးမှရီမုဖြင့် ဖောက်ခွဲခဲ့ခြင်းဖြစ်ကြောင်း သိရသည်။

သို့ဖြစ်၍ လုံခြုံရေးတပ်ဖွဲ့ဝင်များက စုံစမ်းစစ်ဆေးမှုများဆောင်ရွက်ခဲ့ရာ သတင်းပေးမှုအရ ဇွန်လ(၇) ရက်၊ နံနက်ပိုင်းတွင် ရီမုမိုင်းဖောက်ခွဲမှုတွင် ပါဝင်ခဲ့သူသည် ကြည့်မြင်တိုင်မြို့နယ်၊ အုန်းပင်လမ်းနှင့် ဗိုလ်သူရလမ်းပေါ်ရှိ တိုက်အမှတ်(၂၇)(၂)လွှာ၊ အခန်း(B) တွင် နေထိုင်ကြောင်းသိရပြီး သွားရောက်ဖမ်းဆီးခဲ့ရာ ကျူးလွန်သူသည် ထွက်ပြေးတိမ်းရှောင်ခဲ့ရာ တိုက်ခန်းအတွင်းမှ လက်ပစ်ဗုံး လေးလုံး၊ လက်လုပ်‌ဗုံး တစ်လုံးနှင့် ၎င်းအသုံးပြုခဲ့သည့် အင်္ကျီနှင့် ပုဆိုးတို့ကို သိမ်းဆည်းရမိခဲ့ကြောင်း နစကမှ ဆိုထားသည်။

ဆက်လက်စုံစစ်စစ်ဆေးမှုအရ ၎င်းသည် အဆိုပါ တိုက်ခန်းအား အိမ်ခြံမြေပွဲစားမှတစ်ဆင့် ၂၀၂၃ ခုနှစ် ၊ ဧပြီလမှ ဇူလိုင်လအထိ တစ်လလျှင် ကျပ်နှစ်သိန်းခွဲဖြင့် ငှားရမ်းနေထိုင်ခြင်းဖြစ်ကြောင်း သိရသည်။

ထို့နောက် ဇွန်လ(၈)ရက်၊ ညနေပိုင်းတွင် တိုက်ခန်းတွင် ငှားရမ်းနေထိုင်ခဲ့သူ အောင်မြင်သူအား ၎င်းနေထိုင်သည့် စမ်း‌ချောင်းမြို့နယ်၊ မြေနီကုန်းတောင်ရပ်ကွက်တွင် ဖမ်းဆီးရမိခဲ့ကြောင်း နစကမှ ထုတ်ပြန်ထားသည်။

အောင်မြင်သူ၏ ထွက်ဆိုချက်အရ ဇွန်လ(၈)ရက်၊ ညနေပိုင်းတွင် မရမ်းကုန်းမြို့နယ်၊ (၂)ရပ်ကွက်ရှိ အောင်သပြေ(၃)၊ ဟိုတယ်အခန်း အမှတ်(၂၁၇)တွင် အောင်မြင့်မြတ်နှင့် ဓနနောင်ဝင်းတို့ (၂)ဦးအား ထပ်မံဖမ်းဆီးရမိခဲ့ကြောင်း သိရသည်။

ဆက်လက်၍ ဖမ်းဆီးရမိသူ အောင်မြင်သူ၏ ထွက်ဆိုချက်အရ ဇွန်လ(၈)ရက်၊ ညပိုင်းတွင် လှိုင်မြို့နယ် (၃)ရပ်ကွက်၊ တိုက်အမှတ်(၁ဝ)၊ အခန်း(၇)၌ ကျော်စည်သူအား ဖမ်းဆီးရမိခဲ့ပြီး ကျော်စည်သူ၏ ထွက်ဆိုချက်အရ ဇွန်လ(၉)ရက်၊ ညနေပိုင်းတွင် ဒေါပုံမြို့နယ်၊ သင်္ဘောကျင်း(၈)လမ်း၊ အထက်တိုက်အမှတ်(၇၂)၊ အခန်းအမှတ်(3A)တွင် အောင်ခန့်ပိုင်အား ထပ်မံဖမ်းဆီးရမိခဲ့ကြောင်း နစကမှ သိရသည်။

ဖြစ်စဥ်တွင် လက်လုပ်မိုင်းဖောက်ခွဲခဲ့သည့် အမျိုးသား(၅)ဦးနှင့်အတူ လက်ပစ်ဗုံး လေးလုံး၊ လက်လုပ်‌ဗုံး တစ်လုံးတို့ကို ဖော်ထုတ်ဖမ်းဆီးရမိခဲ့ကြောင်း နစကမှ ထုတ်ပြန်ထားသည်။

ဖမ်းဆီးရမိသူများ၏ထွက်ဆိုချက်အရ အောင်မြင်သူသည် ပြီးခဲ့သည့် ၂ဝ၂၂ ခုနှစ်၊ ဇွန်လဒုတိယပတ်တွင် Dark Shadow အဖွဲ့ခေါင်းဆောင်ဖမ်းဆီးရန် ကျန်ရှိသူ ချမ်းငြိမ်းသူက အကြမ်းဖက်လုပ်ရပ်များလုပ်‌ ဆောင်ရန် STF အဖွဲ့မှ ဖမ်းဆီးရန်ကျန်ရှိသူ နွေနွေ၊ ယသော်တို့နှင့် ချိတ်ဆက်ပေးခဲ့ကြောင်း သိရသည်။

ထို့နောက် ၎င်းတို့က ရန်ကုန်မြို့အတွင်း အကြမ်းဖက်လုပ်ငန်းများ လုပ်ဆောင်နိုင်ရန်အတွက် လိုအပ်သည့် လက်နက်၊ ခဲယမ်းနှင့် ငွေကြေးများကို ထောက်ပံ့ပေးခဲ့ကြောင်း နစကမှ ဆိုထားသည်။

၂ဝ၂၂ ခုနှစ်၊ ဇူလိုင်လတွင် ဖမ်းဆီးရန်ကျန်ရှိသူ နွေနွေ၏ခိုင်းစေမှုဖြင့် ရန်ကုန်မြို့အတွင်း အကြမ်းဖက်လုပ်ငန်းများဆောင်ရွက်ရန် Brave Eagle အဖွဲ့အား အောင်မြင်သူ ခေါင်းဆောင်၍ အဖွဲ့ဝင်(၉)ဦးဖြင့် ဖွဲ့စည်းခဲ့ကြောင်း နစကမှ ဖော်ထုတ်သိရှိရသည်။

ထို့နောက် ဖမ်းဆီးရမိသူများ၏ ထွက်ဆိုချက်အရ Brave Eagle အဖွဲ့သည် ရန်ကုန်မြို့အတွင်း၌ ဖောက်ခွဲမှု(၇)ကြိမ် ဆောင်ရွက်ခဲ့ကြောင်း သိရသည်။

၎င်းတို့၏ ဆက်လက်ထွက်ဆိုချက်အရ မိုင်းထောင်ဖောက်ခွဲမှုများ ဆောင်ရွက်ရာတွင် ဖမ်းဆီးရန်ကျန်ရှိသည့် နွေနွေနှင့် ချမ်းငြိမ်းသူတို့ နှစ်ဦးက ငွေကြေး‌ထောက်ပံ့ပေးခဲ့ပြီး တစ်ကြိမ်ဖောက်ခွဲသူအား ငွေကျပ် (၁)သိန်းနှုန်းဖြင့်လည်းကောင်း၊ အခြေအနေကြည့်ရှုပေးသူအား ငွေကျပ် သုံးသောင်းနှုန်းဖြင့် ထောက်‌ပံ့ပေးခဲ့ကြောင်း နစကမှ ဆိုထားသည်။

ထို့ပြင် အဆိုပါ Brave Eagle အဖွဲ့သည် ယခုလအတွင်း ဗဟန်းမြို့နယ် Mytel တာဝါတိုင်နှင့် ဒဂုံမြို့သစ်(အရှေ့ပိုင်း)မြို့နယ်ရှိ ပြည်ခိုင်ဖြိုးပါတီရုံးအား မိုင်းထောင်ဖောက်ခွဲရန် စီစဥ်ထားရှိကြောင်း ဖော်ထုတ်သိရှိရသည်။

ထို့ကြောင့် ဖမ်းဆီးရမိသူများအား ဥပ‌ဒေအရ ထိရောက်စွာအရေးယူနိုင်ရေးကို ဆက်လက်ဆောင်ရွက်သွားမည်ဖြစ်ကြောင်း နစကမှ ထုတ်ပြန်ထားသည်။