ဂျန်ဇက် (NP News) - ဇွန် ၁ဝ

ဗြိတိန်ဝန်ကြီးချုပ်ဟောင်း ဘော်ရစ်ဂျွန်ဆင်က ၎င်းအနေနဲ့ လွှတ်တော်ကိုယ်စားလှယ်အဖြစ်က နုတ်ထွက်လိုက်ပြီဖြစ်ကြောင်း ယနေ့ (ဇွန်လ ၁ဝ ရက်)မှာသတင်းထုတ်ပြန်လိုက်ပါတယ်။

ဘော်ရစ်ဂျွန်ဆင်ဟာ ဝန်ကြီးချုပ်အဖြစ်တာဝန်ယူချိန်အတွင်း ကိုရိုနာဗိုင်းရပ်စ်စည်းကမ်းများကို လိုက်နာမှုရှိ၊ မရှိဆိုတဲ့အချက်ကိုလွှတ်တော်အတွင်း စုံစမ်းစစ်ဆေးမေးမြန်းခံရပြီးနောက် လွှတ်တော်ကိုယ်စားလှယ်အဖြစ်က နုတ်ထွက်ခဲ့တာဖြစ်ကြောင်းသိရပါတယ်။ ဂျွန်ဆင်ဟာ ဝန်ကြီးချုပ်အဖြစ်တာဝန်ယူချိန်အတွင်း ကိုရိုနာဗိုင်းရပ်စ်နဲ့ပတ်သက်တဲ့စည်းကမ်းများထုတ်ပြန်ခဲ့ပေမယ့် ဝန်ကြီးချုပ်ရုံးမှာတော့ အခြားဝန်ထမ်းတွေနဲ့အတူ ပါတီပွဲတွေ ကျင်းပခဲ့တယ်လို့ စွပ်စွဲဝေဖန်မှုများရင်ဆိုင်ခဲ့ရသူဖြစ်ပါတယ်။ 

ဘော်ရစ်ဂျွန်ဆင်ဟာ အဆိုပါ ကိုရိုနာဗိုင်းရပ်စ် စည်းကမ်းများကို ချိုးဖောက်တယ်ဆိုပြီး လွှတ်တော်အတွင်း စွဲချက်တင်ခံရကာ ပြီးခဲ့တဲ့နှစ်မှာ ဝန်ကြီးချုပ်ရာထူးက နုတ်ထွက်ခဲ့ရသူဖြစ်ကြောင်းသိရပါတယ်။ ဘော်ရစ်ဂျွန်ဆင်က "ကျွန်တော်အနေနဲ့ လက်ရှိအချိန်ကစတင်ပြီး လွှတ်တော်ကိုယ်စားလှယ်အဖြစ်ကနေ နုတ်ထွက်လိုက်ပါတယ်။ အဲဒီလိုမျိုးနုတ်ထွက်လိုက်ရလို့ ဝမ်းနည်းရပါတယ်။ စွပ်စွဲပြောဆိုချက်တွေ မှန်ကန်ကြောင်း ခိုင်မာတဲ့သက်သေပြနိုင်ခြင်းမရှိပေမယ့် လူနည်းစုက ကျွန်တော်ကို နုတ်ထွက်ဖို့ ဖိအားပေးတာမျိုးတွေရှိခဲ့တယ်။လွှတ် တော်အတွင်းကနေ မောင်းထုတ်ဖို့ ကြိုးပမ်းခဲ့ကြတယ်"လို့ပြောပါတယ်။

ဘော်ရစ်ဂျွန်ဆင်ဟာလက်ရှိအချိန်မှာ ဝန်ကြီးချုပ်တာဝန်ယူချိန်အတွင်း ကိုရိုနာဗိုင်းရပ်စ်နဲ့ပတ်သက်ပြီး သတ်မှတ်ထားတဲ့ စည်းကမ်းတွေကို လိုက်နာခဲ့တယ်လို့ပြောဆိုပြီး လွှတ် တော်ကိုလှည့်စားဖို့ ကြိုးပမ်းခဲ့ခြင်းရှိ၊ မရှိဆိုတဲ့အချက်ကို စုံစမ်းစစ်ဆေးခံနေရကြောင်းလွှတ်တော်စုံစမ်းရေးကော်မတီကပြောပါတယ်။ လွှတ်တော် စုံစမ်းရေးကော်မတီက ဘော်ရစ် ဂျွန်ဆင်ဟာ လွှတ်တော်ကို ဝေဖန်ပြစ်တင်ပြီး လှည့်စားဖို့ ကြိုးပမ်းကြောင်း စစ်ဆေးတွေ့ရှိရမယ်ဆိုရင် လွှတ်တော်ကိုယ်စားလှယ်အဖြစ်ကနေ (၁ဝ)ရက်ကြာ ဆိုင်းငံ့ခံရမှာဖြစ်ကြောင်းပြောပါတယ်။ ဘော်ရစ်ဂျွန်ဆင်က လွှတ်တော်ရဲ့စုံစမ်းရေးကော်မတီဟာ ၎င်းကို လွှတ်တော်အတွင်းကနေ မောင်းထုတ်ဖို့ ကြိုးပမ်းခဲ့ကြောင်း ဝေဖန်ထားပါတယ်။