ရောင်နီ (NP News) - ဇွန် ၈ 

ရုရှားသမ္မတ ဗလာဒီမာပူတင်နဲ့ ဆော်ဒီအိမ်ရှေ့စံမင်းသား မိုဟာမတ်ဘင်းဆယ်လ်မန်ဟာ ဗုဒ္ဓဟူးနေ့ (ဇွန်လ ၇ ရက်) က ဖုန်းခေါ်ဆို စကားပြောခဲ့ပြီး စွမ်းအင်စျေးနှုန်းနဲ့ တခြားအရေးကြီး ကိစ္စရပ်တွေအတွက် ဆွေးနွေးခဲ့တယ်လို့ ရုရှားက ပြောပါတယ်။ 

အဲဒီဖုန်းခေါ်ဆိုမှုဟာ အမေရိကန်နိုင်ငံခြားရေးဝန်ကြီးအန်တိုနီဘလင်ကန် ဆော်ဒီအာရေးဗီးယားကို အင်္ဂါနေ့( ဇွန်လ ၆ ရက်) က ရောက်ရှိခဲ့ပြီး အိမ်ရှေ့မင်းသားဆယ်လ်မန်နဲ့ တွေ့ဆုံမှုအပြီးမှာ ထွက်ပေါ်လာခြင်းဖြစ်ပါတယ်။        

အဆိုပါ ဖုန်းခေါ်ဆိုမှုကို ရုရှားမှ စတင်ခေါ်ဆိုခဲ့တာဖြစ်ပြီး ခေါင်းဆောင်နှစ်ဦးလုံးက "ကုန်သွယ်ရေးနဲ့ စီးပွားရေး ဆိုင်ရာ ဆက်ဆံရေး ပိုမိုတည်ဆောက်ဖို့၊ ရင်းနှီးမြှုပ်နှံမှု၊ သယ်ယူပို့ဆောင်ရေး ထောက်ပံ့ရေးနဲ့ စွမ်းအင်နယ်ပယ်မှာ အလားအလာရှိတဲ့ ပူးတွဲပရောဂျက်များ အကောင်အထည်ဖော်ဖို့အတွက် အထူးအာရုံစိုက် ဆွေးနွေးခဲ့ကြတယ်လို့ သိရပါတယ်။ 

၎င်းတို့ဟာ “ကမ္ဘာ့စွမ်းအင်ဈေးကွက် တည်ငြိမ်မှု ရှိစေရေး” ဆိုတဲ့ ခေါင်းစဉ်နဲ့ အသေးစိတ် ဆွေးနွေးခဲ့ကြပြီး OPEC+ မှာ ပူးပေါင်းဆောင်ရွက်မှု အဆင့်မြင့်တင်ရေးနဲ့ မကြာသေးမီက ရေးရိုက်မှာ ပြုလုပ်ခဲ့တဲ့ ဝန်ကြီးအဆင့် အစည်း အဝေးမှ ရရှိခဲ့တဲ့ သဘောတူညီချက်တွေကို သဘောတူခဲ့ကြတယ်လို့ သိရပါတယ်။ 

ပြီးခဲ့တဲ့ ဗုဒ္ဓဟူးနေ့ (ဇွန်လ ၇ ရက်) က အဆိုပါ ခေါင်းဆောင်နှစ်ဦးရဲ့ဖုန်းခေါ်ဆိုမှုမတိုင်ခင် ရုရှားလက်ထောက် နိုင်ငံခြားရေးဝန်ကြီး ဆာဂေးရိုက်ကော့ဟာ ဆော်ဒီနိုင်ငံ၊ ရေးရိုက်မှာ  ဆော်ဒီနိုင်ငံခြားရေးဌာနရဲ့ မူဝါဒရေးဆွဲရေး ဒါရိုက်တာ ရေးကရင်မလီ နဲ့တွေ့ဆုံခဲ့ပြီး အစုလိုက်အပြုံလိုက် အပျက်အစီးမဲ့ လက်နက်မပြန့်ပွားရေးပြဿနာ အတွက် ဒေသတွင်းနဲ့ နိုင်ငံတကာလုံခြုံရေးကို ဆွေးနွေးခဲ့ကြပါတယ်။ အဲဒီနေ့မတိုင်ခင် အင်္ဂါနေ့(ဇွန်လ ၆ ရက်) ကတော့ ဆော်ဒီအိမ်ရှေ့မင်းသား မိုဟာမက်က အမေရိကန်နိုင်ငံခြားရေးဝန်ကြီးဘလင်ကန်ကို ဂျဒ်ဒါမှာ လက်ခံ တွေ့ဆုံခဲ့ပါတယ်။ ဒါဟာ မတ်လက  ဆော်ဒီအာရေဗီးရားနဲ့ အီရန်ရဲ့ဆက်ဆံရေးကို ပုံမှန်ဖြစ်စေဖို့ တရုတ်နိုင်ငံက ကူညီပေးခဲ့ပြီးနောက်ပိုင်း  ဘလင်ကန်ရဲ့ပထမဆုံးအကြိမ် ဆော်ဒီခရီးစဉ်ပဲဖြစ်ပါတယ်။ 

၄င်းတို့ဆွေးနွေးပွဲဟာ မိနစ် ၁ဝဝ ခန့်ကြာမြင့်ပြီး ဆူဒန်နဲ့ ယီမင်ရှိ ပဋိပက္ခများ၊ အစ္စရေးနဲ့ ဆက်ဆံရေး ပုံမှန်ပြန် ဖြစ်နိုင်ခြေနဲ့ ဆော်ဒီအာရေးဗီးယားရှိ လူ့အခွင့်အရေးတို့ကို ထိထိရောက်ရောက် ဆွေးနွေးခဲ့တယ်လို့ အမေရိကန် နိုင်ငံခြားရေးဌာနက ပြောကြားခဲ့ပါတယ်။

ဆော်ဒီအစိုးရက အဆိုပါတွေ့ဆုံမှုကို အသိအမှတ်ပြုခဲ့ပေမယ့်  အသေးစိတ်အချက်အလက်တွေ ပြောကြားခြင်း မရှိခဲ့ပါဘူး။