မျိုးကြီး (NP News) - ဇွန် ၇

မိုခါဆိုင်ကလုန်းမုန်တိုင်းဒဏ်ကြောင့် ရခိုင်ပြည်နယ်၌ ငွေကျပ်(၄၅)ဘီလျံဝန်းကျင် ပျက်စီးဆုံးရှုံးမှုဖြစ်ပေါ်ခဲ့ကြောင်း ရခိုင်ပြည်နယ်အစိုးရအဖွဲ့၏ပြောခွင့်ရက NP News ကိုပြောသည်။

အလွန့်အလွန်အားကောင်းသော ဆိုင်ကလုန်းမုန်တိုင်း(မိုခါ)သည် ပြီးခဲ့သည့် မေလ ၁၄ ရက်တွင် ရခိုင်ပြည်နယ်သို့ ဖြတ်ကျော်ဝင်ရောက်တိုက်ခတ်မှုကြောင့် ပျက်စီးဆုံးရှုံးမှုအများအပြားဖြစ်ပေါ်ခဲ့သည်။

“အကုန်လုံးအပါအဝင်ပေါ့နော်။ လူတွေရော၊ တိရိစ္ဆာန်တွေရော အကုန်လုံးပျက်စီးမှုတွေကို စုစုပေါင်းလိုက်တဲ့အခါကြတော့ (၄၅)ဘီလျံလောက် ပျက်တယ်လို့ စာရင်းအရသိရတယ်” ဟု ရခိုင်ပြည်နယ်အစိုးရအဖွဲ့၏ပြောခွင့်ရ ဦးလှသိန်းကပြောသည်။

မိုခါမုန်တိုင်းဒဏ်ကြောင့် ရခိုင်ပြည်နယ်တွင် လူနေအိမ်များ၊ စာသင်ကျောင်းများ၊ ဌာနဆိုင်ရာရုံးများ၊ သာသနိကအဆောက်အအုံများ၊ လျှပ်စစ်ဓာတ်တိုင်များ၊ ဆက်သွယ်ရေးတာဝါတိုင်များအပါအဝင် တိရိစ္ဆာန်အများအပြားလည်း ပျက်စီးဆုံးရှုံးမှု ဖြစ်ပေါ်ခဲ့သည်။

“ကျွန်တော် ပြောချင်တာကတော့ (၄၅)ဘီလျံလောက် ရခိုင်ပြည်နယ်မှာ ပျက်စီးတယ်ဆိုတော့ အစိုးရကလည်း (၄၅)ဘီလျံကို ရော့အင့်လို့ ပေးနိုင်မှာမဟုတ်လောက်ဘူး။ ပြည်သူတွေအနေနဲ့ကလည်း ကျွန်တော်တို့ဆီက ပြန်လည်ထူထောင်ရေးမှာ အပြည့်အဝရမှာတော့ မဟုတ်နိုင်ဘူး။ ရသလောက်နဲ့ မိမိကိုယ်ကို အားထုတ်ပြီးတော့ ပြန်လည်ထူထောင်မှုတွေ ပြုလုပ်ရမယ်လို့ အဲဒီလိုမြင်ပါတယ်”ဟု ဦးလှသိန်းက ဆက်လက်ပြောဆိုထားသည်။

လက်ရှိတွင် ရခိုင်ပြည်နယ်အတွင်း၌ ဆက်သွယ်ရေးဆိုင်ရာပြန်လည်ထူထောင်ခြင်းလုပ်ငန်းများသည် (၉၆)ရာခိုင်နှုန်းခန့်ပြီးစီးနေပြီဖြစ်ကြောင်း ဒုတိယတပ်မတော်ကာကွယ်ရေးဦးစီးချုပ်၊ ဒုတိယဗိုလ်ချုပ်မှူးကြီးစိုးဝင်းက ပြောဆိုထားသည်။

ထို့ပြင် စစ်တွေမြို့နှင့် ပုဏ္ဏားကျွန်းမြို့တို့တွင် ယနေ့(ဇွန်လ ၇ ရက်)တွင် လျှပ်စစ်ဓာတ်အား ပို့လွှတ်နိုင်မည်ဖြစ်ကြောင်းလည်း ဒုတပ်ချုပ်က အသိပေးပြောဆိုထားသည်။

ရခိုင်ပြည်နယ်အတွင်းရှိ အခြေခံပညာကျောင်းများကို စတင်ဖွင့်လှစ်သင်ကြားပေးလျက်ရှိနေသော်လည်း ပြင်ဆင်ရန် လိုအပ်နေသည့် ကျောင်းအဆောက်အအုံများလည်း ရှိနေသေးကြောင်းကြားသိရသည်။

ထို့ပြင် လက်ရှိတွင် ရခိုင်ပြည်နယ်အတွင်း၌ ဌာနဆိုင်ရာရုံးအဆောက်အအုံများ၊ ဝန်ထမ်းအိမ်ရာယာများသည် ပြင်ဆင်ရန် ကျန်ရှိနေသေးကြောင်း သိရသည်။

“ပြင်ဆင်ဖို့ ကျန်နေတယ်ဆိုတာကတော့ ဌာနဆိုင်ရာရုံးတွေပေါ့။ ဌာနဆိုင်ရာရုံးတွေကတော့ ပြည့်ပြည့်စုံစုံ အမိုးတွေ မမိုးနိုင်ကြသေးဘူး။ သွပ်မိုးတာမဟုတ်သေးဘူး။ လတ်တလောမှာ တာပေါ်လင်မိုးတာပေါ့။ အဲဒီတာပေါ်လင်တွေက ခွဲတမ်းတွေကို ပြည်သူတွေကို ဦးစားပေးနေတော့ ဌာနဆိုင်ရာတွေ မရနိုင်ကြသေးဘူး”ဟု ရခိုင်ပြည်နယ်အစိုးရအဖွဲ့ပြောခွင့်ရ ဦးလှထွန်းက ဆိုသည်။

မိုခါမုန်တိုင်းဒဏ်သင့်ဒေသများအတွက် ပြန်လည်ထူထောင်ရေးနှင့်ကယ်ဆယ်ရေးလုပ်ငန်းများဆောင် ရွက်ရန် အလှူငွေကျပ် (၂၆)ဘီလျံကျော်နှင့် အမေရိကန်ဒေါ်လာ (၄)သိန်းနီးပါးရရှိထားကြောင်း လူမှု ဝန်ထမ်း၊ ကယ်ဆယ်ရေးနှင့်ပြန်လည် နေရာချထားရေးဝန်ကြီး ဒေါက်တာသက်သက်ခိုင်က ထုတ်ဖော်ပြောဆိုထားသည်။