ဂျန်ဇက် (NP News) - ဇွန် ၇ 

တရုတ်နိုင်ငံရဲ့ ကြားဝင်စေ့စပ်ပေးမှုကြောင့် အီရန်နဲ့ ဆော်ဒီအာရေဗျနိုင်ငံကြား ပြေလည်မှုပြန်လည်ရရှိခဲ့ပြီးနောက် အီရန်နိုင်ငံဟာ ဆော်ဒီအာရေဗျနိုင်ငံ Riyadh မြို့မှာ အီရန်သံရုံးကို ဇွန်လ ၅ ရက်မှာ ပြန်လည်ဖွင့်လှစ်ခဲ့ကြောင်း သိရပါတယ်။

အီရန် နဲ့ ဆော်ဒီအာရေဗျနိုင်ငံကြား သံတမန်ဆက်ဆံရေးပြန်လည်ထူထောင်မှုဟာ အရှေ့အလယ်ပိုင်းဒေသ အတွက် သံတမန်ရေးရာဟန်ချက်ညီအောင် ထိန်းနိုင်ခဲ့ခြင်းဖြစ်ကြောင်း သိရပါတယ်။ အီရန် လက်ထောက် နိုင်ငံခြားရေးဝန်ကြီး Alireza Bikdeli က "ဒီနေ့ဟာ အီရန် နဲ့ ဆော်ဒီအာရေဗျ နိုင်ငံကြား သံတမန်ဆက်ဆံရေး အတွက် အဓိကအရေးပါတဲ့နေ့ဖြစ်ပါတယ်။ ဒေသအတွင်းမှာ ပိုမိုကောင်းမွန်တဲ့ ပူးပေါင်းဆောင်ရွက်မှုများနဲ့အတူ တည်ငြိမ်မှုတွေ၊ ဖွံ့ဖြိုးတိုးတက်မှုတွေ ဖြစ်လာစေဖို့ ပိုမိုကောင်းမွန်လာမှာပါ" လို့ ပြောပါတယ်။ 

ဆော်ဒီအာရေဗျအစိုးရဟာ  မကြာမီမှာ အီရန်နိုင်ငံဆိုင်ရာ ဆော်ဒီအာရေဗျသံရုံးကို ပြန်လည်ဖွင့်လှစ်သွားဖွယ်ရှိနေ ကြောင်း သိရပါတယ်။ ဆော်ဒီအာရေဗျ နဲ့ အီရန်နိုင်ငံတို့ဟာ အငြင်းပွားမှုများဖြစ်ပွားခဲ့ပြီးနောက် ၂ဝ၁၆ ခုနှစ်မှာ သံတမန်ဆက်ဆံမှုများ ဖြတ်တောက်ခဲ့ကြောင်း သိရပါတယ်။ ဆော်ဒီအာရေဗျ နဲ့ အီရန်တို့ဟာ သံတမန် ဆက်ဆံရေးပြတ်တောက်လိုက်ပြီးနောက်ပိုင်းဒေသအတွင်း အငြင်းပွားမှုတွေမှာ ထိပ်တိုက်တွေ့ဆုံလာခဲ့ပြီး ဆော်ဒီအာရေဗျက အမေရိကန်နိုင်ငံနဲ့ စစ်ရေးနဲ့ စီးပွားရေးကဏ္ဍတွေ ပိုမိုနီးစပ်အောင် လုပ်ဆောင်ခဲ့ပါတယ်။ 

အီရန်နိုင်ငံကတော့ နျူကလီးယားအစီအစဉ်နဲ့ပတ်သက်ပြီး အမေရိကန်ရဲ့ပစ်မှတ်ထား ပိတ်ဆို့မှုတွေကို ရင်ဆိုင် နေခဲ့ရပါတယ်။ အီရန် နဲ့ ဆော်ဒီအာရေဗျနိုင်ငံတို့ဟာ ဆီးရီးယားပြည်တွင်းစစ် နဲ့ ယီမင်ပြည်တွင်းစစ်တို့မှာလည်း ဆန့်ကျင်ဘက်ပုံစံမျိုးရပ်တည်ပြီး ကူညီထောက်ပံ့ပေးခဲ့ပါတယ်။

အီရန်ဟာ အမေရိကန်၊ အစ္စရေးနဲ့ ဆော်ဒီအာရေဗျနိုင်ငံတို့က အကြမ်းဖက်အဖွဲ့အစည်းအဖြစ် သတ်မှတ်ထားတဲ့ ဟစ်ဘိုလာလက်နက်ကိုင်အုပ်စုကို အကြမ်းဖက်အုပ်စုအဖြစ် သတ်မှတ်ခဲ့ပါတယ်။ ဒါပေမယ့် တရုတ်နိုင်ငံဟာ အီရန် နဲ့ ဆော်ဒီအာရေဗျ နိုင်ငံကြားဖြစ်ပွားနေတဲ့အငြင်းပွားမှုတွေကို လျော့ချနိုင်ဖို့ ကြားဝင်ဆောင်ရွက်ခဲ့ပြီး ပြီးခဲ့တဲ့မတ်လမှာ ငြိမ်းချမ်းရေးစာချုပ်လက်မှတ်ရေးထိုးနိုင်အောင် ကူညီပေးခဲ့တယ်။ တရုတ်နိုင်ငံမှာ ချုပ်ဆိုခဲ့တဲ့ ငြိမ်းချမ်းရေးစာချုပ်ထဲမှာ ဆော်ဒီအာရေဗျ နဲ့ အီရန်တို့ဟာ အပြန်အလှန်သံရုံးများ ပြန်လည်ဖွင့်လှစ်ဖို့အချက်နဲ့ တစ်နိုင်ငံရဲ့ပြည်တွင်းရေးကိုအခြားတစ်နိုင်ငံက ကြားဝင်စွက်ဖက်တာမျိုးမလုပ်ဖို့ သဘောတူညီခဲ့ကြောင်း သိရပါတယ်။