NP News - ‌ဇွန် ၆

နိုင်ငံတော်သံဃမဟာနာယကဥက္ကဋ္ဌ ဗန်းမော်ဆရာတော်ကြီး၏ အန္တိမအဂ္ဂိဈာပန အခမ်းအနားကို မန္တလေးတိုင်း၊ မဟာအောင်မြေမြို့နယ် ဗန်းမော်ကျောင်းတိုက်၌ ယနေ့(ဇွန်လ ၆ ရက်)၊ နေ့လည်(၂) နာရီအချိန်တွင် စတင်ကျင်းလျက်ရှိသည်။

အဆိုပါ အခမ်းအနားကို နစကဥက္ကဋ္ဌ၊ ဗိုလ်ချုပ်မှူးကြီးမင်းအောင်လှိုင်နှင့် တာဝန်ရှိသူများက တက်ရောက်ကာ ဖူးမြော်ကြည်ညိုလျက်ရှိ‌ကြောင်း သိရသည်။

ထို့ပြင် အခမ်းအနားတွင် ပုပ်ရဟန်းမင်းကြီးဖရန်စစ် အပါအဝင် တရုတ်၊ ထိုင်း၊ အိန္ဒိယ၊ သီရိလင်္ကာစသည့်နိုင်ငံများမှ ဘာသာရေးအဖွဲ့အစည်းများကလည်း ဝမ်းနည်းကြောင်း သဝဏ်လွှာပေးပို့ကာ အခမ်းအနား၌ ဖတ်ကြားမှုများပြုလုပ်ခဲ့ကြောင်း တွေ့ရသည်။

ဗန်းမော်ဆရာတော်ကြီး ပျံလွန်တော်မူခဲ့ခြင်းသည် မြန်မာနိုင်ငံနှင့် ဗုဒ္ဓသာသနာတော်အတွက် ကြီးမား သော ဆုံးရှုံးမှုတစ်ခုပင်ဖြစ်ကြောင်း ပေးပို့သည့်ဝမ်းနည်းကြောင်း သဝဏ်လွှာများ၌ ဖော်ပြထားသည်။

လက်ရှိတွင် ဗန်းမော်ကျောင်းတိုက်၌ အန္တိမအဂ္ဂိဈာပန သာဓုကီဠန အခမ်းအနားကို ကျင်းပလျက်ရှိပြီး မကြာခင်အချိန်တွင် ဗန်းမော်ကျောင်းတိုက်ရှိ ယာယီစံကျောင်းတော်မှ ချမ်းမြသာစည်လေဆိပ်ဟောင်းသို့ ပင့်ဆောင်သွားမည်ဖြစ်ကြောင်း သိရသည်။

ထို့နောက် အဆိုပါလေဆိပ်ဟောင်း၌ ဆရာတော်ကြီး၏ ရုပ်ကလာပ်အား တေဇောဓာတ်မီးပူဇော်သွားမည်ဖြစ်ကြောင်း သိရသည်။

မနက်ဖြန် (ဇွန် ၇ ရက်‌) နံနက်(၅)နာရီအချိန်ခန့်တွင် ဗန်းမော်ဆရာတော်ကြီး၏ ကြွင်းကျန်ရစ်ခဲ့သော အရိုးဓာတ်ပြာတော်များကို မန္တလေးမြို့ရှိ မရမ်းခြံဆိပ်ကမ်းမှတဆင့် ဧရာဝတီမြစ်အတွင်းသို့ ရေမျှောပူဇော်သွားမည်ဖြစ်ကြောင်း သိရသည်။

နိုင်ငံတော်သံဃနာယကအဖွဲ့ဥက္ကဋ္ဌ အဘိဓဇမဟာရဋ္ဌဂုရု၊ အဘိဓဇအဂ္ဂမဟာသဒ္ဓမ္မဇောတိက၊ ဒေါက် တာဘဒ္ဒန္တကုမာရာဘိဝံသ ကျေးဇူးတော်ရှင် နဝမမြောက် ဗန်းမော်ဆရာတော်ဘုရားကြီးသည် ပြီးခဲ့သည့် (မေလ ၂၅ ရက်)၊ ည ၁၁ နာရီ ၁၁ မိနစ်အချိန်တွင် ဘဝနတ်နန်းစံမြန်းတော်မူခဲ့ခြင်းဖြစ်သည်။

အရှင်ဒေါက်တာဘဒ္ဒန္တကုမာရာဘိဝံသသည် မန္တလေးမြို့ရှိ ဗန်းမော်ကျောင်းတိုက်တွင် ပျံလွန်မူခဲ့ခြင်းဖြစ်ကြောင်းသိရပြီး ပျံလွန်တော်မူချိန်၌ သက်တော်သည် (၉၄)နှစ်ရှိပြီဖြစ်ကာ ဝါတော်သည် (၇၄)ဝါရှိပြီဖြစ်သည်။

ဗန်းမော်ဆရာတော်ကြီးသည် သက်တော်ရှည် ဆရာတော်ကြီးဖြစ်သည့်အပြင် (၂ဝ၁ဝ) ပြည့်နှစ်မှစ၍ ပျံလွန်တော်မူသည့်တိုင် နိုင်ငံတော်သံဃမဟာနာယကအဖွဲ့ဥက္ကဋ္ဌနှင့် နိုင်ငံတော်ဗဟိုသံဃာ့ဝန်ဆောင် အဖွဲ့ဥက္ကဋ္ဌအဖြစ် (၁၃)နှစ်နီးပါး တာဝန်ထမ်းဆောင်ခဲ့ကြောင်း သိရသည်။

ထိုသို့ တာဝန်ထမ်းဆောင်ခဲ့ချိန်၌ ဆရာတော်ကြီးသည် သာသနာ့အကျိုးကို စွမ်းစွမ်းတမံ ထမ်းဆောင်ခဲ့ပြီး ယခုကဲ့သို့ ပျံလွန်တော်မူခဲ့ခြင်းသည် သာသနာတော်နှင့် နိုင်ငံတော်အတွက် ကြီးမားသည့် ဆုံးရှုံးမှုကြီးလည်း ဖြစ်သည်။

ဗန်းမော်ဆရာတော်ဘုရားကြီး ဒေါက်တာအရှင်ကုမာရာဘိဝံသအလောင်းလျာကို မြန်မာသက္ကရာဇ် ၁၂၉၁ ခုနှစ်၊ တော်သလင်းလဆန်း(၁၄)ရက်တွင် မန္တလေးတိုင်း၊ တောင်သာမြို့နယ်၊ ရဘဲကျေးရွာ၌ ခမည်းတော်ဦးဘိုးသစ်၊ မယ်တော်ဒေါ် အေးသိုက်တို့က ဖွားမြင်တော်မူခဲ့ကြောင်း သိရသည်။

ထို့နောက် ဗန်းမော်ဆရာတော်အလောင်းလျာသည် ၁၃ဝ၄ ခုနှစ် ဝါဆိုလဆန်း(၈)ရက်တွင် တောင်သာမြို့နယ်၊ ဆင်မင်းကျေးရွာ၊ ဆင်မင်းကျောင်းတိုက်ဆရာတော် ဘဒ္ဒန္တပဏ္ဍိစ္စကို ဥပဇ္ဈာယ်ပြုကာ မိဘနှစ်ပါးတို့၏ ပစ္စယာနဂ္ဂဟကိုခံယူပြီး ရှင်သာမဏေအဖြစ်သို့ ရောက်ရှိခဲ့ကြောင်း သိရသည်။

ဆက်လက်ပြီး ၁၃၁ဝ ပြည့်နှစ်၊ တပို့တွဲလဆန်း(၁ဝ)ရက်တွင် မြင့်မြတ်သောရဟန်းအဖြစ်သို့ ရောက်ရှိတော်မူခဲ့သည်။

ထို့နောက် ဆရာတော်ဘုရားကြီးသည် ပရိယတ္တိစာပေများကို သင်ယူဆည်းပူးခဲ့ပြီး ပရိယတ္တိသာသနဟိတဓမ္မာစရိယဘွဲ့၊ သာသနဓဇသိရီပဝရဓမ္မာစရိယဘွဲ့၊ ဂုဏ်ထူးဆောင် ဓမ္မပါရဂူ (D.Litt) ဘွဲ့၊ Doctor of Letters (D.Litt) ဘွဲ့၊ ကိုးရီးယားနိုင်ငံ Sehan University မှ ဆက်ကပ်သော ဘာသာရေးအတွေ းအခေါ်ဘာသာရပ်ဂုဏ်ထူးဆောင် (Ph.D) ပါရဂူဘွဲ့တို့ကို ရရှိခဲ့ကြောင်း သိရသည်။

ထို့ပြင် ၎င်းသည် နိုင်ငံတော်သံဃမဟာနာယကအဖွဲ့စသော သံဃာ့အဖွဲ့အစည်း ဖွဲ့စည်းနိုင်ရန် မူလသံဃာ့ဝန်ဆောင်(၆၆) ပါးအဖွဲ့၌ ပါဝင်ကာ မန္တလေးတိုင်းအတွင်း လှည့်လည်ဟောပြောမှုပြု၍ သာသ နာပြုတာဝန်များကို ထမ်းဆောင်ခဲ့ကြောင်း သိရသည်။

ဆက်လက်ပြီး ဒေါက်တာအရှင်ကုမာရာဘိဝံသည် ၂ဝ၁ဝ ပြည့်နှစ်၊ ဇူလိုင်လမှ လက်ရှိအချိန်အထိ နိုင်ငံတော်သံဃမဟာ နာယကအဖွဲ့ဥက္ကဋ္ဌ၊ နိုင်ငံတော်ဗဟိုသံဃာ့ဝန်ဆောင်အဖွဲ့ဥက္ကဋ္ဌနှင့် နိုင်ငံတော်ပရိယတ္တိသာသနာ့တက္ကသိုလ်များ၏ အဓိပတိအဖြစ် လည်း သာသနာ့တာဝန်များကို ထပ်မံဆောင်ရွက်တော်မူခဲ့သည်။

ထိုကဲ့သို့ ဗုဒ္ဓသာသနာတော်အကျိုးကို ဆောင်ရွက်တော်မူခဲ့ခြင်းကြောင့် နိုင်ငံတော်အစိုးရက အဘိဓဇအဂ္ဂမဟာသဒ္ဓ မ္မဇောတိကဘွဲ့ တံဆိပ်တော်၊ အဘိဓဇမဟာရဋ္ဌဂုရုဘွဲ့တံဆိပ်တော်တို့ကို ဆက်ကပ်လှူဒါန်းခဲ့ကြောင်း သိရသည်။