ဂျန်ဇက် (NP News) - ဇွန် ၅

ရုရှားပိုင်နက် Belgorod ထဲကို ယူကရိန်းဘက်က ပစ်ခတ်တိုက်ခိုက်တဲ့ ကျည်ဆံများ ကျရောက်မှုကြောင့် (၂)ဦးသေဆုံးခဲ့ပြီး ကလေးငယ်ပေါင်းရာချီကို ဘေးလွတ်ရာကိုရွှေ့ပြောင်းပေးခဲ့ရကြောင်း ဒေသအုပ်ချုပ်ရေးမှူး ဂလာကောဗ့်က ပြောပါတယ်။

ယူကရိန်းတို့ပစ်ခတ်ခဲ့တဲ့ ကျည်ဆံတွေဟာ ယူကရိန်းနဲ့ ရုရှားနယ်စပ်ဒေသမြို့ဖြစ်တဲ့ Belgorod မြို့ထဲကို ဇွန်လ ၄ ရက်မှာ ညလုံးပေါက်နီးပါးကျရောက်ခဲ့ကြောင်း၊ ကျည်ဆံများကျရောက်မှုကြောင့် ဒေသခံ (၄ဝဝဝ)ကျော်ကို ယာယီနားခိုရာစခန်းများသို့ ရွှေ့ပြောင်းပေးခဲ့ရကြောင်း ၎င်းကပြောပါတယ်။ Belgorod ဒေသအုပ်ချုပ်ရေးမှူးဖြစ်တဲ့ ဂလာကောဗ့်က "ယူကရိန်းတို့ ပစ်ခတ်တဲ့ ကျည်ဆံတွေဟာ မြို့ထဲကို ညလုံးပေါက်ကျရောက်ခဲ့တယ်" လို့ပြောပါတယ်။

ယူကရိန်း နဲ့ ရုရှားတို့စစ်ပွဲဖြစ်ပွားခဲ့ပြီးနောက်ပိုင်း ယူကရိန်းနဲ့ ရုရှားနယ်စပ်မြို့ကို ယူကရိန်းဘက်က ပစ်ခတ်တဲ့ကျည်ဆံများ မကြာခဏကျရောက်ခဲ့ပေမယ့် ဒီသီတင်းပတ်အတွင်းမှာတော့ ရုရှားမြို့တော် မော်စကိုမြို့အပါအဝင် ရုရှားပိုင်နက်အတွင်းထဲအထိ ကျည်ဆံများကျရောက်မှုတွေရှိလာခဲ့ကြောင်းသိရပါတယ်။ ယူကရိန်းနိုင်ငံသား လက်နက်ကိုင်အဖွဲ့တွေဟာ ရုရှားပိုင်နက် Belgorod ဒေသကိုနယ်စပ်ဖြတ်ကျော်ကာ တိုက်ခိုက်မှုများရှိခဲ့ကြောင်း ရုရှားဘက်က ပြောဆိုခဲ့ပါတယ်။ ဒေသအုပ်ချုပ်ရေးမှူးဖြစ်တဲ့ ဂလာကောဗ့်က Belgorod ဒေသရှိ Shebekino မြို့ နဲ့ Graivoron မြို့မှာနေထိုင်တဲ့ကလေးငယ်ပေါင်း (၆ဝဝ)ကျော်ကို ဘေးလွှတ်ရာကို ရွှေ့ပြောင်းပေးခဲ့ရကြောင်း ဆိုပါတယ်။ 

၎င်းက "ကလေးတွေဟာ သူတို့ရဲ့မြို့အခြေအနေနဲ့ပတ်သက်ပြီး စိုးရိမ်နေကြတယ်"လို့ပြောပါတယ်။ Shebekino မြို့ဟာ ယူကရိန်းနဲ့နယ်စပ်ချင်းထိစပ်နေတဲ့ Belgorod ဒေသအတွင်းရှိ မြို့တစ်မြို့ဖြစ်ကာ လူဦးရေအနည်းဆုံး (၄ဝဝဝဝ)ကျော်နေထိုင်လျက်ရှိနေကြောင်း သိရပါတယ်။ Belgorod ဒေသဟာ လက်ရှိအချိန်မှာ ယူကရိန်းနဲ့ ရုရှားတို့ဖြစ်ပွားနေတဲ့စစ်ပွဲအတွင်း ရှင်သန်နေထိုင်နေရကြောင်း ဒေသအုပ်ချုပ်ရေးမှူးဖြစ်တဲ့ ဂလာကောဗ့်ကပြောပါတယ်။ အမေရိကန်ဦးဆောင်တဲ့အနောက်အုပ်စုဟာ ယူကရိန်းကို ရုရှားနိုင်ငံပိုင်နက်များကို တိုက်ခိုက်ခြင်းမလုပ်ဘဲ ယူကရိန်းပိုင်နက်အတွင်းကိုဝင်ရောက်နေတဲ့ ရုရှားတပ်ဖွဲ့တွေကိုပြန်တိုက်ထုတ်ဖို့ ခွင့်ပြုထားပါတယ်။ ယူကရိန်းဟာ ရုရှားပိုင်နက်များကို ထဲထဲဝင်ဝင် တိုက်ခိုက်လာမယ်ဆိုရင် စစ်ပွဲအရှိန်ဟာ လက်ရှိထက် ပိုမိုမြင့်တက်လာဖွယ်ရှိနေကြောင်း ရုရှားအရေးလေ့လာသူများကပြောပါတယ်။