ဖိအားပေးနေသည့် ဝါရှင်တန်ကို ရှိတ်ဟာစီနာက လေသံမာမာဖြင့် အံတုတိုက်ခိုက်
Htay Oung (NP News) - ဇွန် ၄
တစ်ယောက်ယောက်အနေနဲ့ အတ္တလန္တိတ်သမုဒ္ဒရာကို နာရီ ၂ဝ ကြာ လေယာဉ်စီးဖြတ်ကျော်ပြီး အမေရိကန်နိုင်ငံ ကိုမှ မသွားရဘူး ဆိုလျှင်လည်း ဘာမှအရေးကြီးတဲ့ကိစ္စမဟုတ်ကြောင်း ဘင်္ဂလားဒေ့ရှ်နိုင်ငံဝန်ကြီးချုပ် ရှိတ်ဟာစီနာက ဇွန်လ ၃ ရက်၊ စနေနေ့မှာ ပြောဆိုလိုက်တယ်လို့ Dhaka Tribune က ယမန်နေ့ ရေးသားပါတယ်။
“ကမ္ဘာပေါ်မှာ တခြားသမုဒ္ဒရာတွေနဲ့ တခြားတိုက်ကြီးတွေ ရှိနေပါတယ်။ သမုဒ္ဒရာတွေကို ဖြတ်ကျော်ပြီး တခြား တိုက်ကြီးတွေနဲ့ မိတ်ဆွေဖွဲ့မယ်။ ကျွန်မတို့ရဲ့စီးပွားရေးဟာ ပိုအားကောင်း ပိုဖွံ့ဖြိုးပြီး တက်ကြွလာပါလိမ့်မယ်” လို့ ဝန်ကြီးချုပ်က အခိုင်အမာပြောလိုက်ပါတယ်။
ဒါကာမြို့ တက်ဂ်ျရွန်နယ်မြေရှိ ဒါကာခရိုင်အဝါမီလိဂ်ရုံး အဆောက်အအုံကို ဖွင့်ပွဲအခန်းအနားမှာ ဘင်္ဂလားဒေ့ရှ်နိုင်ငံ ဝန်ကြီးချုပ်က ယခုလို ပြောဆိုခြင်းဖြစ်ပါတယ်။
ဘင်္ဂလားဒေ့ရှ်ဟာ ကိုယ့်ခြေထောက်ပေါ် ကိုယ်ရပ်တည်နေပြီး အစိုးရက တိုင်းပြည်ကိုတည်ဆောက်မည်ဖြစ် ကြောင်း၊ အခြားသူများအပေါ် မှီခိုနေမှာ မဟုတ်ဘဲ၊ ဗီဇာထုတ်မပေးတဲ့သူ၊ ပိတ်ဆို့အရေးယူမည့်သူတွေအပေါ် မှီခို နေစရာအကြောင်း မရှိဘူးလို့ ဆိုပါတယ်။
အတိုက်အခံ BNP ကို ရည်ညွှန်းတဲ့အနေနဲ့ မဲလိမ် မဲခိုးပြီး ပြည်သူများရဲ့ကံကြမ္မာနဲ့ကစားနေတဲ့ပါတီကို (တစ်ချက်လေး) လှည့်ကြည့်သင့်ကြောင်း အမေရိကန်ကို အကြံပေးလိုက်ပါတယ်။
ကနေဒါတရားရုံးချုပ်က BNP ကို အကြမ်းဖက်ပါတီအဖြစ် ကြေညာခဲ့ကြောင်း၊ အကြမ်းဖက်မှုနဲ့ အကျင့်ပျက် ခြစားမှုတွေကို ဆန့်ကျင်တယ်ဆိုရင် အမေရိကန်အနေနဲ့ တာရစ်ခ်_ဇီယာကို ဗီဇာထုတ်ပေးမှာ မဟုတ်ကြောင်း၊ အဝါမီလိခ်ဟာ ဘင်္ဂလားဒေ့ရှ်ပြည်သူတွေရဲ့ လူမှုဖူလုံရေးနဲ့ အကျိုးကျေးဇူး ဖြစ်ထွန်းရာဖြစ်ထွန်းကြောင်းကို ကောင်းကောင်းသိကြောင်း၊ အဲ့ဒီ သံဓိဋ္ဌာန်ကို စွဲမြဲထားပြီး “ဖွံ့ဖြိုးမှု အနည်းဆုံးတိုင်းပြည်” ဘင်္ဂလားဒေ့ရှ်ကို “ဖွံံ့ဖြိုးဆဲတိုင်းပြည်” ဖြစ်အောင်လုပ်ပေးခဲ့ပြီး ၂ဝ၄၁ ခုနှစ်အရောက် ဖွံ့ဖြိုးပြီးတိုင်းပြည်ဖြစ်ရေး လုပ်ဆောင် နေကြောင်း၊ အနာဂတ်မျိုးဆက်များအတွက် ဒဲလ်တာစီမံကိန်း ၂၁ဝဝ ပြည့်ကိုလည်း ဖွဲ့စည်းခဲ့တယ်လို့ အာဏာရပါတီအကြီးအကဲလည်းဖြစ်သူ ဟာစီနာက ပြောပါတယ်။
ဘင်္ဂလားဒေ့ရှ် ပြည်သူတွေဟာ “လှေ” ( အဝါမီလိခ် ရွေးကောက်ပွဲ သင်္ကေတ) ကို မဲပေးမှသာ သူတို့ရဲ့ကံ ကြမ္မာကို ပြောင်းလဲပစ်နိုင်မယ်ဆိုတာ သူတို့ဖာသာ သိရှိကြကြောင်း၊ ပြည်သူတွေအတွက် အနစ်နာခံတဲ့ အဝါမီလိဂ် ခေါင်းဆောင်တွေနဲ့ ပါတီဝင်တွေကိုသာ မဲပေးကြမှာဖြစ်ကြောင်း၊ ၂ဝဝ၈၊ ၂ဝ၁၄ နဲ့ ၂ဝ၁၈ ရွေးကောက်ပွဲတွေမှာ ဘင်္ဂလားဒေ့ရှ်ပြည်သူတွေက အဝါမီလိဂ်အာဏာရဖို့အတွက် မဲပေးခဲ့ကြခြင်းဖြင့် တိုင်းပြည်မှာ တည်ငြိမ်ပြီး ဒီမိုကရေစီ အသွင်ကူးပြောင်းရေးဝန်းကျင်နဲ့အတူ မကြုံစဖူး စီးပွားရေး ဖွံ့ဖြိုးတိုးတက်မှုကို ဖြစ်ပေါ်စေခဲ့ကြောင်း၊ တည်ငြိမ်အေးချမ်းမှုကို မထိန်းသိမ်းဘဲ အဝါမီလိဂ်သာ အာဏာမရရှိခဲ့ဘူးဆိုရင် တိုင်းပြည်မှာ ဒီလိုမျိုးဖွံ့ဖြိုး တိုးတက်လာမှာ မဟုတ်ကြောင်း၊ ဒါဟာ ပကတိလက်တွေ့ဖြစ်ပြီး တိုင်းပြည်အတွက် ဘယ်သူကမှ လုပ်ပေးမှာ မဟုတ်ကြောင်း ဝန်ကြီးချုပ် ရှိတ်ဟာစီနာက ပြောပါတယ်။
ဒါကာခရိုင် အဝါမီလိဂ် အဆောက်အဦသစ်ဖွင့်ပွဲ အခမ်းအနားတက်ရောက်လာတဲ့ဝန်ကြီးချုပ်ကို ပါတီခေါင်းဆောင် များနဲ့ တက်ကြွလှုပ်ရှားသူများက လမ်းဘေးနှစ်ဘက်လုံးမှာ စီတန်းကြိုဆိုခဲ့ကြပါတယ်။ အခန်းအနားကို ရှိတ်ဟာစီနာနဲ့အတူ အဝါမီလိခ်ပါတီအထွေထွေအတွင်းရေးမှူး၊ ဝန်ကြီးချုပ်ရဲ့ ပုဂ္ဂလိကစက်မှုလက်မှုနှင့် ရင်းနှီး မြှုပ်နှံမှုအကြံပေးပုဂ္ဂိုလ်၊ တရားလွှတ်တော်ရှေ့နေများအဖွဲ့ အဖွဲ့ဝင်များ၊ ပါတီစည်းရုံးရေးမှူးများ၊ ပြည်ထဲရေး ဝန်ကြီး၊ ပြည်နယ်စွမ်းအင်နှင့် ဓာတ်သတ္တုအရင်းအမြစ်ဝန်ကြီးဌာန ဝန်ကြီးသဖြင့် ဘင်္ဂလားဒေ့ရှ်အာဏာပိုင်လည်း တက်ရောက်ကြပါတယ်။
(အသက် ၅၅ နှစ်အရွယ် တာရစ်ခ်_ဇီယာ (ခေါ်) တာရစ်ခ်_ရာမန်ဟာ ကွယ်လွန်သူ သမ္မတဟောင်း ဇီယာ_ရာ မန်နဲ့ ခါလီဒါ_ ဇီယာတို့ရဲ့အကြီးဆုံးသားဖြစ်ပြီး လက်ရှိအတိုက်အခံ BNP ပါတီရဲ့ ဒုတိယဥက္ကဖြစ်ပါတယ်။ နိုင်ငံရေး မလုပ်ဖို့ တားမြစ်ခံထားရတဲ့ပါတီဥက္ကဋ္ဌ မိခင်ဖြစ်သူ မကျန်းမာတဲ့အတွက် ပါတီယာယီဥက္ကဋ္ဌတာဝန်ယူနေသူ လည်း ဖြစ်ပါတယ်။
ဖခင်ဖြစ်သူ ဇီယာရာမန်ဟာ ဘင်္ဂလားဒေ့ရှ် ဒုတိယတပ်မတော်ဦးစီးချုပ် ဗိုလ်ချုပ်ကြီးဟောင်းဖြစ်ပြီး ၁၉၈၁ ခုနှစ် စစ်တကောင်းမြို့မှာ ရောက်ရှိနေခိုက် လုပ်ဖော်ကိုင်ဖက်အချို့ရဲ့ အာဏာသိမ်းရန် ကြိုးစားမှုမှာ အသတ်ခံခဲ့ရပါ တယ်။ သမ္မတဟောင်းကတော် မုဆိုးမ ခါလီဒါဇီယာဟာ ဘင်္ဂလားဒေ့ရှ်နိုင်ငံရဲ့ ပထမဆုံးသော အမျိုးသမီး ဝန်ကြီး ချုပ်ဖြစ်ပြီး ၁၉၉၁-ခုနှစ်မှ ၂ဝဝ၁ ခုနှစ်ထိ နှစ်ကြိမ်ဆက်တိုက် အာဏာရရှိခဲ့ပါတယ်။
မိခင်ဖြစ်သူ ဝန်ကြီးချုပ်တာဝန်ထမ်းဆောင်ခိုက် တာရစ်ခ်ဇီယာဟာ ပါတီတွင်း အရေးပါရာထူးများကို ရယူခဲ့ပြီး နိုင်ငံရေး အငြင်းပွားမှုများ၊ အာဏာအလွဲသုံးမှုများ၊ အကျင့်ပျက်ခြစားမှု အများအပြားတို့နဲ့ ရင်ဆိုင်ခဲ့ရပါတယ်။ ၂ဝဝ၄ ခုနှစ် အထွေထွေရွေးကောက်ပွဲအတွက် ဘင်္ဂလားဒေ့ရှ်နိုင်ငံရေးပါတီများ မဲဆွယ်စည်းရုံးခိုက် ရှိတ်ဟာစီနာရဲ့ မော်တော်ယာဉ်တန်းကို စစ်သုံးလက်ပစ်ဗုံးနဲ့ ပစ်ပေါက်မှုမှာ ကြိုးကိုင်သူအဖြစ် ၂ဝ၁၈ခုနှစ်မှာ တာရစ်ခ်ဇီယာကို ထောင်ဒဏ် တစ်သက်တစ်ကျွန်း မျက်ကွယ်မှာ ချမှတ်ခဲ့ပါတယ်။ တာရစ်ခ်ဟာ ၂ဝဝ၈ ခုနှစ်တည်းက ယူကေနိုင်ငံ လန်ဒန်မြို့ဆင်ခြေဖုံးမှာ နိုင်ငံရေး ခိုလှုံရောက်ရှိနေပါတယ်။
ဘင်္ဂလားဒေ့ရှ်နိုင်ငံရဲ့လူ့အခွင့်အရေးအခြေအနေများနဲပတ်သက်ပြီး ဒါကာအပေါ် ပိတ်ဆို့အရေးယူကြောင်း အမေရိကန်က ၂၀၂၂-ခုနှစ် ဧပြီလမှာ ကြေညာထားပါတယ်။
#အမေရိကန်အစိုးရ #ကနေဒါ #မဲလိမ်မဲခိုးပါတီ #ဘင်္ဂလားဒေ့ရှ်ဝန်ကြီးချုပ် #ရှိတ်ဟာစီနာ #BNP #အဝါမီလိခ် #တာရစ်ခ်_ဇီယာ #ဖွံ့ဖြိုးမှု_အနည်းဆုံးတိုင်းပြည် #ဖွံ့ဖြိုးဆဲတိုင်းပြည် #ဖွံ့ဖြိုးပြီးတိုင်းပြည် #ဒဲလ်တာစီမံကိန်း_၂၁ဝဝ
(Dhaka Tribune., 03 June 2023,” PM strikes defiant tone in face of US pressure” ကို #HtayOung, #OungMarine ဆီလျော်အောင် ကောက်နှုတ်ဘာသာပြန်ဆိုသည်။)
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
၂၄ နာရီအတွင်း ပြည်တွင်းနှင့် ပြည်ပမှ သတင်းများအား စုစည်းတင်ဆက်ခြင်း
RELATED POSTS
22 Sep 2024 | နိုင်ငံရေး,နိုင်ငံတကာ
22 Sep 2024 | နိုင်ငံရေး,နိုင်ငံတကာ
22 Sep 2024 | နိုင်ငံရေး,ပြည်တွင်း