မျိုးကြီး (NP News) - ဇွန် ၃ 

ဘင်္ဂလားပင်လယ်အော်၌ လေဖိအားနည်းရပ်ဝန်းတစ်ခု ဖြစ်လာနိုင်ချေရှိ၍ ရခိုင်ကမ်းရိုးတန်းနှင့် မြစ်ဝကျွန်းပေါ်ရှိ လူထုအနေဖြင့် မိုးလေဝသ သတင်းများကို စောင့်ကြည့်ရန် မိုးဇလက တိုက်တွန်းထားသည်။

လေဖိအားနည်းရပ်ဝန်းတစ်ခု ဖြစ်ပေါ်လာနိုင်ပြီး ၎င်းမှတစ်ဆင့် အားကောင်းသည့် မုန်တိုင်းအဖြစ်သို့ ရောက်ရှိကာ ရခိုင်ပြည်နယ်သို့ ထပ်မံဝင်ရောက်နိုင်ကြောင်း မိုလေဝသလေ့လာစောင့်ကြည့်သူများက ပြောဆိုနေကြသည်။

ထိုသို့ ခန့်မှန်းပြောဆိုနေမှုများအပေါ် မိုးလေဝသနှင့်ဇလဗေဒညွှန်ကြားမှုဦးစီးဌာနမှ ညွှန်ကြားရေးမှူးဦးလှထွန်းက “အဲဒါကတော့ ထုံးစံအတိုင်းပေါ့လေ Model တွေ ကြည့်ပြီးပြောနေကြတာပေါ့။ Model တွေမှာတော့ အဲဒီလိုတွေ ပြတာပေါ့နော်။ သို့သော်အဲဒါကြီးက စောင့်ကြည်ရမယ့်အခြေအနေပေါ့။ အတိအကျပြောလို့တော့ မရသေးဘူး”ဟု NP News ကိုပြောသည်။

သို့သော် မိုးဇလအနေဖြင့် ဇွန်လ ၄ ရက်မှ ၇ ရက်အတွင်း ဘင်္ဂလားပင်လယ်အော်၌ လေဖိအားနည်းရပ်ဝန်းတစ်ခု ဖြစ်လာနိုင်ချေရှိကြောင်း ခန့်မှန်းထားသည်ဟု ညွှန်ကြားရေးမှူးဦးလှထွန်းက ဆိုသည်။

“မိုးဇလကတော့ ဇွန် ၄ ရက်နဲ့ ၇ ရက်နေ့အတွင်းမှာ လေဖိအားနည်းရပ်ဝန်း ဖြစ်နိုင်ချေရှိတယ်ဆိုပြီးတော့ပဲ ခန့်မှန်းထားတာရှိပါတယ်။ နောက်အဲဒီလေဖိအားနည်းရပ်ဝန်းအရှိန်ကြောင့်၊ မုတ်သုံလေအားကောင်းတဲ့အရှိန်ကြောင့် မိုးတွေတော့ ရွာမယ်ပေါ့လေ။ ရခိုင်ကမ်းရိုးတန်းတို့၊ မြစ်ဝကျွန်းပေါ်တို့၊ တောင်ပိုင်းတို့ အဲဒီဘက်တွေမှာ မိုးရွာသွန်းမှုများမယ်။ နောက် ပင်လယ်ပြင်မှာ လေပြင်းကျတာတွေ ရှိနိုင်မယ်”ဟု ၎င်းက ထပ်မံပြောဆိုထားသည်။

လက်ရှိတွင် ဘင်္ဂလားပင်လယ်အော်၌ လေဖိအားနည်းရပ်ဝန်း မဖြစ်ပေါ်သေးကြောင်းနှင့် လေဖိအားနည်းရပ်ဝန်း ဖြစ်ပေါ်လာမှသာ ရှေ့ဆက်ခန့်မှန်း၍ရမည်ဖြစ်ကြောင်း ဦးလှထွန်းက ဆိုသည်။

ထို့ကြောင့် လေဖိအားနည်းရပ်ဝန်း၊ မုန်တိုင်းအခြေအနေတို့နှင့်ပတ်သက်၍ လာမည့် ဇွန်လ ၅ ရက်မှ ဇွန်လ ၁ဝ ရက်အတွင်း မြစ်ဝကျွန်းပေါ်နှင့် ရခိုင်ကမ်းရိုးတန်းရှိ ဒေသခံလူထုအနေဖြင့် မိုးလေဝသ သတင်းများကို သတိပြုစောင့်ကြည့်ရန်လည်း မိုးဇလမှ ညွှန်ကြားရေးမှူးဦးလှထွန်းက တိုက်တွန်းထားသည်။

ပြီးခဲ့သော မေလ ၁၄ ရက်တွင် အလွန့်အလွန်အားကောင်းသော ဆိုင်ကလုန်းမုန်တိုင်း(မိုခါ)သည် ရခိုင် ပြည်နယ်၊ ချင်းပြည်နယ်၊ စစ်ကိုင်းတိုင်း၊ မကွေးတိုင်းတို့ကို ဖြတ်ကျော်ဝင်ရောက်ခဲ့သည့်အတွက် လူနေအိမ်နှင့် အဆောက်အအုံပေါင်း သိန်းနှင့်ချီကာ ပျက်စီးဆုံးရှုံးမှုများ ဖြစ်ပေါ်ခဲ့သည်။

ထိုသို့ မုန်တိုင်းဝင်ရောက်မှုကြောင့် ပျက်စီးဆုံးရှုံးမှု အများဆုံးရှိခဲ့သော ရခိုင်ပြည်နယ်၌ ပြန်လည် ထူထောင်ရေးလုပ်ငန်းများကို အစိုးရအပါအဝင် ကူညီရေးအဖွဲ့အစည်းများနှင့် ဒေသခံများက ပူးပေါင်းလုပ်ဆောင်နေသော်လည်း မူလအခြေအနေသို့ ပြန်လည်မရောက်ရှိသေးကြောင်း သိရသည်။