ရောင်နီ (NP News) - ဇွန် ၃

       အမေရိကန်ဟာ အကျင့်ပျက်ခြစားမှုနှိမ်နင်းရေးတစိတ်အပိုင်းအနေနဲ့ ဟေတီဝန်ကြီးချုပ်ဟောင်း လောရန်လာမို့ကို ပြည်ဝင်ခွင့် ပိတ်ပင်လိုက်တယ်လို့ သိရပါတယ်။ 

        အမေရိကန်နိုင်ငံခြားရေးဝန်ကြီး အန်တိုနီ ဘလင်ကန်ဟာ လာမို့ရဲ့ သိသာထင်ရှားတဲ့ အကျင့်ပျက် ခြစားမှုမှာ ပါဝင်ပတ်သက်မှုကို ကိုးကားပြီး ၄င်းအပေါ် ပိတ်ဆို့အရေးယူမှုကို သောကြာနေ့(ဇွန်လ ၂ ရက်)မှာ ကြေညာခဲ့ပါတယ်။ လာမို့ဟာ ပုဂ္ဂလိက အကျိုးအမြတ်အတွက် ဟေသီ အစိုးရရဲ့ PetroCaribe အခြေခံအဆောက်အအုံရင်းနှီးမြှုပ်နှံမှုနဲ့ လူမှုဖူလုံရေးရန်ပုံငွေမှ အနည်းဆုံး အမေရိကန်ဒေါ်လာသန်း (၆ဝ)ကို အလွဲသုံးစားပြုခဲ့တယ်လို့ ဘလင်ကန်က ဆိုပါတယ်။ အဆိုပါ အကျင့်ပျက်လုပ်ရပ်နဲ့ ရန်ပုံငွေစီမံခန့်ခွဲမှုမှာ လာမို့ရဲ့ တိုက်ရိုက်ပါဝင်ပတ်သက်မှုဟာ အများပြည်သူဆိုင်ရာ တာဝန်ရှိသူတစ်ဦးအနေနဲ့ ၎င်းရဲ့အခန်းကဏ္ဍကိုအသုံးချပြီး ဟေတီနိုင်ငံ လက်ရှိခံစားနေရတဲ့ နိုင်ငံရေး မတည်မငြိမ်ဖြစ်စေဖို့ ပံ့ပိုးကူညီခဲ့တယ်လို့ ဘလင်ကန်က ဆိုပါတယ်။ 

လူဦးရေ (၁၁ ဒသမ ၄) သန်းကျော်နေထိုင်တဲ့ လက်တင်အမေရိကနိုင်ငံ၊ ဟေတီဟာ အထူးသဖြင့် ၂ဝ၂၁ ခုနှစ် သမ္မတ ဂျိုဗီနယ်လ်မိုစီ လုပ်ကြံခံရပြီးနောက် အုပ်စုဖွဲ့ အကြမ်းဖက်မှုများ ပေါ်ပေါက်လာကာ နိုင်ငံရေးမတည်ငြိမ်မှုတွေ ဖြစ်လာခဲ့ပါတယ်။ အမေရိကန် တရားရေးဌာနမှ အစိုးရရှေ့နေတွေနဲ့ ဟေတီရှိ အရာရှိတွေက မိုစီ လုပ်ကြံခံရခြင်းကို ဖော်ထုတ်ဖို့ ကြိုးပမ်းနေပါတယ်။

          အမေရိကန်ဟာ သမ္မတ မိုစီကို လုပ်ကြံသတ်ဖြတ်ရန် ကြိုးပမ်းမှုအပြင် ဟေတီမှာ အကျင့်ပျက်ခြစားမှုကို အမြစ်ပြတ်ချေမှုန်းဖို့အတွက် ပြီးခဲ့တဲ့ ဧပြီလက ဟေတီ အောက်လွှတ်တော်အမတ်ဟောင်း ဂါရီဘိုဒူကို ပြည်ဝင်ခွင့်ဗီဇာ ကန့်သတ်ချက်များ ချမှတ်ခဲ့ပါတယ်။ ဒီဇင်ဘာလကလည်း အမေရိကန်က  ဟေတီ အထက်လွှတ်တော်အမတ် ရိုနီကက်လက်စတင်း နဲ့ အထက်လွှတ်တော်အမတ်ဟောင်း ရစ်ချက်လီနင်ဟာဗ်ဖောဆန့် တို့ကို နိုင်ငံတကာ မူးယစ်ဆေးဝါး ရောင်းဝယ်ဖောက်ကားမှုအတွက် ပိတ်ဆို့အရေးယူမှုတွေ ပြုလုပ်ခဲ့ပါတယ်။ 

ဒါ့ပြင် နိုဝင်ဘာလကလည်း အမေရိကန်နဲ့ ကနေဒါက  ဟေတီ အထက်လွှတ်တော် သမ္မတ ဂျိုးဆက်လန်ဘတ် နဲ့ အထက်လွှတ်တော် သမ္မတဟောင်း ယူရီလာတောတော့တို့အပေါ် ငွေကြေးခဝါချမှုနဲ့ မူးယစ်ဆေးဝါး ရောင်းဝယ်ဖောက်ကားမှုမှတစ်ဆင့် အုပ်စုဖွဲ့အကြမ်းဖက်သမားတွေကို ကျောထောက်နောက်ခံပြုတယ်ဆိုတဲ့ စွပ်စွဲချက်နဲ့ ပိတ်ဆို့အရေးယူမှုတွေ ပြုလုပ်ခဲ့ပါတယ်။