Pika (NSS) - ဩဂုတ် ၂၆

ယူကရိန်းနယ်စပ်မှာတပ်စွဲထားတဲ့ ဘီလာရုစ်တပ်ဖွဲ့တွေနဲ့ စစ်လက်နက် ပစ္စည်းကိရိယာတွေကို ရုတ်သိမ်းပေးဖို့ ဘီလာရုစ်အစိုးရကို ယူကရိန်းအစိုးရက ဩဂုတ်လ(၂၅)ရက်နေ့မှာ တိုက်တွန်းတောင်းဆိုခဲ့တယ်လို့သိရပါတယ်။

ရုရှားအစိုးရရဲ့ ဖိအားပေးမှုတွေအောက်မှာ ဝမ်းနည်းစရာတွေဖြစ်လာမယ့်အမှားတွေကို မပြုလုပ်ကြဖို့ ယူကရိန်းနိုင်ငံခြားရေးဝန်ကြီးဌာနက ဘီလာရုစ်အစိုးရကို သတိပေးခဲ့တယ်လို့လည်း သိရပါတယ်။ ယူကရိန်းနိုင်ငံခြားရေးဝန်ကြီးဌာနရဲ့ ထုတ်ပြန်ချက်မှာ ဘီလာရုစ်လက်နက်ကိုင်တပ်ဖွဲ့တွေကို ဖော်ရွေမှုမရှိတဲ့လုပ်ရပ်တွေလုပ်နေတာကနေ ရပ်တန့်ဖို့နဲ့ ယူကရိန်းနယ်စပ်မှာရှိတဲ့ ၎င်းတို့ရဲ့တပ်ဖွဲ့တွေကို ရုတ်သိမ်းပေးဖို့ တိုက်တွန်းထားတယ်လို့သိရပါတယ်။ ဒါ့ပြင် ယူကရိန်းနယ်စပ်မှာရှိတဲ့တပ်ဖွဲ့တွေထဲမှာ ဘီလာရုစ်အထူးတပ်ဖွဲ့တွေနဲ့ Wagner အဖွဲ့ကြေးစားစစ်သားဟောင်းတွေလည်း ပါဝင်တယ်လို့ ယူကရိန်းနိုင်ငံခြားရေးဝန်ကြီးဌာနက ပြောကြားခဲ့ပါတယ်။ 

ယူကရိန်းနိုင်ငံ မြောက်ပိုင်းနယ်စပ်အနီးမှာရှိတဲ့ ဂိုမယ်ဒေသမှာ ဖြန့်ကျက်ချ ထားတဲ့ ဘီလာရုစ်နိုင်ငံရဲ့ စစ်လက်နက်ပစ္စည်းကိရိယာတွေထဲမှာ တင့်ကားတွေ၊ အမြောက်တွေ၊ လေကြောင်းရန်ကာကွယ်ရေးစနစ်တွေနဲ့ အင်ဂျင် နီယာပိုင်းဆိုင်ရာ ပစ္စည်းတွေပါဝင်တယ်လို့လည်း သိရပါတယ်။ သို့သော် လည်း ယူကရိန်းအစိုးရဟာ ဘီလာရုစ်ပြည်သူတွေအပေါ် ဖော်ရွေမှုမရှိတဲ့အရေးယူဆောင်ရွက်မှုတွေကို ဘယ်တော့မှလုပ်ဆောင်မှာမဟုတ်ဘူးလို့ ၎င်းတို့ရဲ့ ထုတ်ပြန်ချက်မှာရေးသား ဖော်ပြထားပါတယ်။ ဘီလာရုစ်နိုင်ငံနဲ့ထိစပ်နေတဲ့ နယ်စပ်တစ်လျှောက်မှာ ယူကရိန်းတပ်ဖွဲ့ဝင်(၁၂၀၀၀၀)ကျော် တပ်စွဲထားတာမလို့ ဘီလာရုစ်အစိုးရဟာ ၎င်းတို့တပ်ဖွဲ့တွေရဲ့ သုံးပုံတစ်ပုံနီးပါးကို နယ်စပ်တစ်လျှောက်မှာ ဖြန့်ကျက်ချထားတယ်လို့ ဘီလာရုစ်သမ္မတလူကာရှန်ကိုက ပြီးခဲ့တဲ့ဩဂုတ်လ(၁၈)ရက်နေ့မှာ ထုတ်ပြန်ပြောဆိုခဲ့ပါတယ်။ ဒါ့ပြင် ယူကရိန်းနဲ့ထိစပ်နေတဲ့နယ်စပ်ကို တိုက်လေယာဉ်တွေ၊လေကြောင်းရန်ကာကွယ်ရေးတပ်ဖွဲ့တွေနဲ့ သံချပ်ကာယာဉ်တွေစေလွှတ်ခဲ့တယ်လို့ ဘီလာရုစ်အစိုးရက ပြီးခဲ့တဲ့ဩဂုတ်လ(၁၉)ရက်နေ့မှာ ပြောကြားခဲ့ပါတယ်။