ယွန်း (NSS) - ဩဂုတ် ၁၅

မြန်မာနိုင်ငံ၏ လေကြောင်းဈေးကွက်အတွင်း ပထမဆုံး Service Center ဖြစ်သည့် Shoppe by MAI ကို ရန်ကုန်မြို့၊ လှိုင်မြို့နယ်အတွင်းရှိ International Business Center(IBC) ၌ ယနေ့ (ဩဂုတ်လ ၁၅ ရက်)တွင် စတင်ဖွင့်လှစ်ခဲ့သည်။

Shoppe by MAI သည် လက်မှတ်လာရောက်ဝယ်ယူကြမည့် ခရီးသည်များအတွက် လေကြောင်းလိုင်းများနှင့် ပတ်သက်သည့် ဝန်ဆောင်မှုအားလုံးကို တစ်နေရာထဲတွင် စုစည်းရရှိနိုင်မည့် Service Center တစ်ခုဖြစ်ကြောင်း သိရသည်။

Shoppe by MAI တွင် MAI ၏ မိတ်ဖက်ပါတနာများဖြစ်သည့် uab Bank Miracle Café & Lounge တို့ပါဝင်ပြီး  မြန်မာနိုင်ငံ၏ လေကြောင်းကဏ္ဍ ဈေးကွက်အတွင်း ပထမဆုံး Service Center ဖြစ်ကြောင်း MAI & Mingalar ၏ Chief Executive Officer ဖြစ်သူ Mr. Tanes Kumar က ဆိုသည်။

“Shoppe by MAI မှာဆိုရင် ကျွန်တော်တို့ရဲ့ ပါတနာတွေဖြစ်တဲ့ uab Bank Miracle Café & Lounge တို့လည်း အတူပါဝင် ဖွင့်လှစ်ထားတဲ့အတွက် ခရီးသည်တွေ ဝန်ဆောင်မှုအမျိုးမျိုးကို တစ်နေရာထဲမှာ ပေးအပ်သွားနိုင်မည့် သာမန် Service Center တစ်ခုထက်ပိုသာတဲ့နေရာတစ်ခုဖြစ်ပါတယ်။မြန်မာနိုင်ငံရဲ့ လေကြောင်းကဏ္ဍဈေးကွက်အတွင်းမှာ ဒီလို Service Center က ပထမဆုံးလို့ ပြောရမှာပါ” ဟု Mr. Tanes Kumar က ပြောသည်။

ခရီးသည်များအနေဖြင့် အဆိုပါ IBC ရှိ Shoppe by MAI တွင် အစိုးရရုံးပိတ်ရက်များ အပါအဝင် နေ့စဥ် နံနက်(၉)နာရီမှ ညနေ(၅)နာရီအတွင်း လာရောက် ဝယ်ယူနိုင်ကြောင်း သိရသည်။

ထို့ပြင် ခရီးသွားလာမှုများသည့် နေရာများတွင်လည်း Shoppe by MAI ကဲ့သို့ Service Center များကို ဖွင့်လှစ်သွားရန်လည်း စီစဥ်လျက်ရှိကြောင်း သိရသည်။ 

MAI အနေဖြင့် ရန်ကုန် နှင့် မန္တလေးမြို့တို့မှအခြေပြုကာ မြန်မာနိုင်ငံအပါအဝင် ထိုင်း၊ စင်ကာပူ၊ မလေးရှား၊ တရုတ်၊ အိန္ဒိယ၊ အာရပ်စော်ဘွားများပြည်ထောင်စု(ယူအေအီး)၊ ကမ္ဘောဒီးယား၊ ဗီယက်နမ်၊ တောင်ကိုရီးယား၊ ရုရှားနှင့် လာအိုနိုင်ငံများရှိ မြို့ပေါင်း ၃၆ မြို့သို့ တိုက်ရိုက် ခရီးစဥ်များကို Airbus A320 ၆ စီး၊ Embraer E190 ၂ စီး၊ ATR72-600 ၄ စီးနှင့် Boeing 737 freighter ၁ စီးတို့ဖြင့် ပျံသန်းပြေးဆွဲလျက်ရှိကြောင်း သိရသည်။

ထို့ပြင် ယခုနှစ်ကုန်တွင် ကာတာနိုင်ငံ၊ ဒိုဟာမြို့နှင့် ဘင်္ဂလား‌ဒေ့(ရှ်)နိုင်ငံ၊ ဒါကာမြို့များ အပါအဝင် ပြည်တွင်းပြည်ပခရီးစဥ် စုစုပေါင်း ၄၁ ခုအထိ ပြေးဆွဲသွားရန် စီစဥ်ထားကြောင်း သိရသည်။