Pika (NSS) - ဩဂုတ် ၁

မလေးရှားသီချင်းနှင့် ရုပ်ရှင် icon တစ်ဦးဖြစ်သူ နိုနာအာဆာယာသည် ဇူလိုင်လ(၃၀)ရက်နေ့ နံနက်အစောပိုင်းတွင် အသက်(၉၄)နှစ်အရွယ်ဖြင့် ကွယ်လွန်သွားခဲ့ကြောင်း သိရသည်။

အမည်ရင်း အာဆာယာအာမန်ဟုခေါ်သော ဂန္တဝင်အဆိုတော်သည် မလေးရှားရုပ်ရှင်သရုပ်ဆောင် P Ramlee ဇာတ်ကားများခေတ်အတွင်း ၎င်း၏ အသံကြောင့် နာမည်ကြီးကြောင်းလည်း သိရသည်။ နိုနာအာဆာယာ၏ သေဆုံးမှုကို ၎င်း၏သားအငယ်ဆုံးဖြစ်သူနှင့် သီချင်းနှင့်ရုပ်ရှင်ထုတ်လုပ်သူ Indra Shahrir Ismail တို့က အတည်ပြုခဲ့ခြင်းဖြစ်ကြောင်းသိရသည်။ 

နိုနာအာဆာယာသည် ကျောက်ကပ်၊အဆုတ်နှင့်နှလုံးဆိုင်ရာ ပြဿနာများအတွက် ပြီးခဲ့သည့်(၂)လခန့်တည်းက ဆေးရုံတွင် ဆေးကုသမှုများခံယူနေခဲ့ခြင်းဖြစ်ကြောင်း Indra Shahrir Ismail ကပြောကြားခဲ့သည်။ ထို့ပြင် နိုနာအာဆာယာသည် အဆိုပါကျန်းမာရေးအခြေအနေများဖြင့်ပင် ဆေးရုံတွင်သေဆုံးသွားခဲ့ခြင်းဖြစ်ပြီး ၎င်း၏ဈာပနကို ဇူလိုင်လ(၃၁)ရက်နေ့တွင် လုပ်ဆောင်သွားမည် ဖြစ်ကြောင်းသိရသည်။ နိုနာအာဆာယာသည် ၁၉၅၀ ခုနှစ်နှင့် ၁၉၆၀ ခုနှစ်များအတွင်း Cathay-Keris Malay Films နှင့် Shaw Brothers’ Malay Film Productionတို့က ထုတ်လုပ်သော ရုပ်ရှင်များစွာတွင် နောက်ခံအဆိုတော်အဖြစ် အောင်မြင်ခဲ့ကြောင်းလည်းသိရသည်။

ထို့ပြင် ၎င်းသည် ၁၉၄၈ ခုနှစ်ရုပ်ရှင် Chinta တွင်  ရုပ်ရှင်သရုပ်ဆောင် Siput Sarawak အတွက် သီဆိုမှုများကို လုပ်ဆောင်ပေးခဲ့ဖူးကြောင်းလည်းသိရသည်။ နိုနာအာဆာယာသည် ၁၉၇၀ ခုနှစ်တွင် ဖျော်ဖြေခြင်းလုပ်ငန်းမှ အနားယူခဲ့ကြောင်း သိရသည်။ နိုနာအာဆာယာသည် ၂၀၂၂ ခုနှစ်တွင် ပြုလုပ်သော Singapore Women’s Hall of Fame တွင် ထည့်သွင်းဖော်ပြခံခဲ့ရကြောင်းလည်း သိရသည်။ နိုနာအာဆာယာကို နှစ်ပေါင်းများစွာသိလာခဲ့သူ ဝါရင့်တေးရေးဆရာ Yusnor Ef က 'နိုနာအာဆာယာရဲ့ နာမည်ကိုပြောလိုက်ရုံနဲ့ ၎င်းကအလုပ်အရမ်းကြိုးစားပြီး အရည်အချင်းရှိတဲ့ လူတစ်ယောက်ဆိုတာ လူတိုင်းကသိပါတယ်။ ၎င်းယူဆောင်လာခဲ့တဲ့ အနုပညာဟာ မျိုးဆက်သစ်လူငယ်တွေအတွက် လေ့လာသင်ယူမှုလုပ်ဆောင်နိုင်မယ့်အရာတစ်ခုပဲဖြစ်ပါတယ်"ဟု ပြောဆိုခဲ့သည်။