ALynn (NSS) - ဇွန် ၁ဝ 

ဥရောပသမဂ္ဂအဖွဲ့ဝင် ၂၇ နိုင်ငံမှ သန်းနှင့်ချီသော ဥရောပသားများသည် အီးယူပါလီမန်ရွေးကောက်ပွဲများတွင် မဲများပေးခဲ့ကြပြီး အီးယူအဖွဲ့၏ လက်ရှိမူဝါဒများဖြစ်သော လူဝင်မှုကြီးကြပ်ရေး၊ လုံခြုံရေးနှင့် ရာသီဥတုဆိုင်ရာမူဝါဒများကို ဖီဆန်ကာ ရှေးရိုးစွဲနှင့် လက်ယာယိမ်းပါတီများကို ထောက်ခံကြောင်း ပြသခဲ့ကြသည်။ 

တနင်္ဂနွေနေ့ (ဇွန်လ ၉ ရက်) တွင် မဲရုံပိတ်ပြီးနောက် ကနဦးခန့်မှန်းချက်များအရ ဥရောပသမဂ္ဂ၏ အဓိက ခေါင်းဆောင်နှစ်ဦးဖြစ်သည့် ပြင်သစ်သမ္မတ အီမန်နျူရယ်မက်ခရွန် နှင့် ဂျာမန်ခေါင်းဆောင် Olaf Scholz တို့က သိသိသာသာရှုံးနိမ့်နေသည်ကို တွေ့ရသည်။ ထို့နောက် ပြင်သစ်သမ္မတသည် နိုင်ငံ၏အမျိုးသားလွှတ်တော်ကို ဖျက်သိမ်းကာ လျှပ်တပြက်လွှတ်တော်ရွေးကောက်ပွဲများခေါ်ယူခြင်းကို ပြုလုပ်ခဲ့သည်။

“တည်တည်ငြိမ်ငြိမ်နဲ့ လိုက်လျောညီထွေရှိစွာ လည်ပတ်နိုင်ဖို့ ပြင်သစ်က အများစုရဲ့ထောက်ခံမှုကို လိုအပ်ပါ တယ်” ဟု မက်ခရွန်က ဆိုရှယ်မီဒီယာ X တွင် ရေးသားခဲ့သည်။ ပြင်သစ်လက်ယာယိမ်း National Rally ပါတီသည် ထောက်ခံမဲ ၃၀ ရာခိုင်နှုန်းကျော်ရရှိခဲ့ပြီး ၎င်းသည် မက်ခရွန်၏ Renaissance ပါတီထက် ဝေစုနှစ်ဆကျော် ရရှိခဲ့ ခြင်းဖြစ်သည်။ 

National Rally ပါတီ၏ ခေါင်းဆောင်ဖြစ်သူ Marine Le Pen က သူမသည် အာဏာရယူရန် အသင့်ဖြစ်နေပြီဟု ကြေညာခဲ့သည်။ Le Pen သည် ယူကရိန်းသို့ ခံစစ်လက်နက်များပေးပို့ခြင်းကို ထောက်ခံခဲ့သော်လည်း ရုရှားပိုင်နက် ကို တိုက်ခိုက်ရန် ၎င်းလက်နက်များအသုံးပြုခြင်းကို ကန့်ကွက်ခဲ့ပြီး ရုရှားအပေါ်ပိတ်ဆို့အရေးယူမှုသည် ထိရောက်မှုမရှိသလို ဥရောပသားများကို ထိခိုက်စေနိုင်သည်ဟု ဝေဖန်ထောက်ပြခဲ့သည်။

ဂျာမနီ၏ လက်ဝဲယိမ်း Social Democrats ပါတီသည် လက်ယာယိမ်း Alternative for Germany ပါတီ (AfD) ၏ နောက်သို့ များစွာကျဆင်းသွားခဲ့သည်။ AfD ပါတီသည် ရုရှားအပေါ် အနောက်နိုင်ငံများ၏ ပိတ်ဆို့အရေးယူမှုများကို အကြိမ်ကြိမ်ကန့်ကွက်ခဲ့ပြီး ယူကရိန်းအား စစ်ရေးအကူ အညီများပေးခြင်းကို ဆန့်ကျင်ခဲ့သည့်ပါတီဖြစ်သည်။ Geert Wilders ဦးဆောင်သော နယ်သာလန်၏ ကွန်ဆာဗေးတစ်ပါတီ (PVV) သည် မဲ ၁၇ ရာခိုင်နှုန်းဖြင့် ဒုတိယ နေရာရခဲ့ပြီး ဥရောပပါလီမန်တွင် ထိုင်ခုံ တစ်နေရာမှ ခုနှစ်နေရာအထိ ရရှိရန် ခန့်မှန်းထားကြသည်။ 

Geert Wilders သည် ယူကရိန်းသို့ စစ်ရေးအကူအညီများ ပေးပို့ခြင်းအား ဆန့်ကျင်ခဲ့ပြီး ယင်းလုပ်ရပ်သည် ဒတ်ခ်ျ  စစ်တပ်၏ ကာကွယ်နိုင်စွမ်းအားကို လျော့ကျစေသည်ဟု ဖော်ပြခဲ့သည်။ ဘယ်လ်ဂျီယံဝန်ကြီးချုပ် Alexander De Croo သည် ၎င်း၏ Open VLD ပါတီမှာ မဲအရေအတွက် ၅ ဒသမ ၈ ရာခိုင်နှုန်းသာ ရရှိခဲ့ပြီးနောက် ရာထူးမှ နုတ်ထွက်ကြောင်း ကြေညာခဲ့သည်။ လက်ယာ ယိမ်းပါတီများဖြစ်သည့် Vlaams Belang နှင့် Flemish nationalist N-VA ပါတီတို့က ထောက်ခံမဲ ၁၄ ဒသမ ၈ ရာခိုင်နှုန်းနှင့် ၁၄ ဒသမ ၂ ရာခိုင်နှုန်းအသီးသီး ရရှိခဲ့ကြသည်။

အီတလီဝန်ကြီးချုပ် Giorgia Meloni ၏ လက်ယာယိမ်း Fratelli d'Italia (အီတလီညီအစ်ကိုများ) ပါတီသည် ရွေးကောက်ပွဲတွင် ထောက်ခံမဲ ၂၈ ရာခိုင်နှုန်းဖြင့် အနိုင်ရခဲ့ပြီး ၂၈ နေရာအထိ ရရှိခဲ့ သည်။ လက်ယာယိမ်း European Conservatives and Reformists Group (ECR) ၏ လက်ရှိ ဥက္ကဋ္ဌဖြစ်သူ Meloni သည် ယခင်က ပြင်သစ်သမ္မတမက်ခရွန်၏ ယူကရိန်းသို့ နေတိုးတပ်ဖွဲ့များ စေလွှတ်နိုင်ခြေနှင့်ပတ်သက်သည့်မှတ်ချက်အပေါ် ပြစ်တင်ရှုတ်ချခဲ့ပြီး ယင်းလုပ်ရပ်သည် နေတိုး နှင့် ရုရှားအကြားတင်းမာမှုများကို တိုးလာနိုင်သည်ဟု သတိပေးခဲ့ သည်။ အီးယူ၏ နိုင်ငံရေးသည် လက်ယာသို့ သိသိသာသာယိမ်းသွားပြီး လက်ယာယိမ်းပါတီများသည် ဥရောပပါလီမန်တွင် နေရာအများစုကို သိမ်းပိုက်နိုင်ခဲ့သည်။