Pika (NSS) - ဇွန် ၉ 

အနောက်အုပ်စုနိုင်ငံတွေဟာ ရုရှားနဲ့တိုက်ရိုက်ပဋိပက္ခဖြစ်ပွားနိုင်တဲ့ စင်တီမီတာအတွင်းမှာရှိနေပြီး အဲဒီအခြေ အနေတွေကို ရှောင်ရှားဖို့အတွက် အမေရိကန်နဲ့ဥရောပသမဂ္ဂတို့ဟာ လက်ရှိအာဏာရနေတဲ့လူတွေနေရာမှာ ငြိမ်းချမ်းရေးလိုလားတဲ့အဖွဲ့တွေ အစားထိုးဖို့လိုအပ်တယ်လို့ ဟန်ဂေရီဝန်ကြီးချုပ်ဗစ်တာအော်ဗန်က သတိပေး ပြောဆိုခဲ့ပါတယ်။

ယူကရိန်းကို နောက်ထပ်စစ်လက်နက်ပစ္စည်းတွေပေးပို့မှုနဲ့ပတ်သက်တဲ့ဆွေးနွေးမှုတွေအားလုံးနဲ့အတူ အနောက်အုပ်စုနိုင်ငံဟာ စစ်ပွဲဖြစ်ပွားမယ့်လမ်းပေါ်မှာ ရှိနေတယ်လို့ ဗစ်တာအော်ဗန်က ပြောခဲ့ပါတယ်။ ရုရှား-ယူကရိန်းစစ်ပွဲစတင်ဖြစ်ပွားခဲ့တဲ့ ၂၀၂၂ ခုနှစ်မှာ ဂျာမနီ အပါအဝင် ဥရောပနိုင်ငံအများအပြားဟာ ကျည်ကာ၊ ခေါင်းဆောင်းတို့လိုမျိုး မသေစေနိုင်လောက်တဲ့အကူအညီတွေသာပေးပို့မယ်လို့ ကတိပြုခဲ့ကြပေမယ့်လည်း လူသေဆုံးစေတဲ့အထိဖြစ်စေတဲ့ စစ်လက်နက်ပစ္စည်းတွေပေးပို့မှုနဲ့ပတ်သက်ပြီး မေးခွန်းထုတ်တာမျိုး မရှိခဲ့ဘူးလို့ ဗစ်တာအော်ဗန်က ပြောခဲ့ပါတယ်။

အဲဒီအချိန်ကနေစတင်ပြီး အနောက်အုပ်စုအင်အားကြီးနိုင်ငံတွေဟာ ယူကရိန်းကို တာဝေးပစ် စစ်လက်နက်ပစ္စည်း တွေနဲ့ ခဲယမ်းမီးကျည်တွေ ထောက်ပံ့ပေးခဲ့ပါတယ်။ ဗစ်တာအော်ဗန်က “ဒီလိုမျိုးတွေ ဆက်လက်လုပ်ဆောင်နေ တာက အနောက်အုပ်စုဟာ ရုရှားနဲ့တိုက်ရိုက်ပဋိပက္ခဖြစ်ပွားနိုင်တဲ့ စင်တီမီတာအတွင်းမှာ ရှိနေစေပါတယ်။ အနောက်အုပ်စုမှာ လက်ရှိ အာဏာရနေတဲ့ခေါင်းဆောင်တွေက အဲဒါကို မမြင်ကြပါဘူး။ သူတို့ကစစ်ပွဲကို လိုချင်ကြ တာပါ” လို့ ပြောခဲ့ပါတယ်။

ဒါ့ပြင် ရုရှားနဲ့စစ်ပွဲဖြစ်ပွားဖို့ကို တားဆီးဖို့အတွက် အနောက်အုပ်စုရဲ့အစိုးရတွေကို ပြောင်းလဲဖို့ လိုအပ်တယ်လို့ ဗစ်တာအော်ဗန်က ထပ်မံပြောခဲ့ပါတယ်။ ၎င်းက “စစ်ပွဲတွေဖြစ်ပွားလာမှာကို တားဆီးဖို့အတွက် ဆုံးဖြတ်ရမယ့် အချိန်ကိုရောက်နေပါပြီ။ ဥရောပခေါင်းဆောင်တွေက ငြိမ်းချမ်းရေးကို ဒီနေ့လိုချင်တယ်ဆိုရင် နေတိုးနဲ့ အမေရိကန်တို့မှာ အပြောင်းအလဲတွေလုပ်ဆောင်တာ အောင်မြင်ဖို့ လိုအပ်ပါတယ်။ အဲဒီလိုဖြစ်သွားမယ်ဆိုရင် (၂၄)နာရီအတွင်း ရှေ့တန်းစစ်မြေမျက်နှာပြင်မှာ အပစ်အခတ်ရပ်စဲရေးတွေ ရရှိလာပါလိမ့်မယ်။ အနောက်အုပ်စုက ပြောဖို့ လိုအပ်တာ တစ်ခုပဲရှိပါတယ်။ ကျွန်တော်တို့ စစ်ပွဲကို ရပ်တန့်ဖို့ လိုအပ်တယ်။ အပစ်အခတ်ရပ်စဲဖို့ လိုအပ်တယ်။ ဒါကြောင့်မလို့ အပစ်အခတ်ရပ်စဲရေးနဲ့ ငြိမ်းချမ်းရေးဆွေးနွေးပွဲတွေ မရှိမချင်း နောက်ထပ် စစ်လက်နက်ပစ္စည်းတွေနဲ့ ငွေကြေးတွေ ကျွန်တော်တို့မပံ့ပိုးပေးနိုင်ပါဘူးလို့ ပြောဆိုရုံပါပဲ” လို့ ပြောခဲ့ပါတယ်။