ALynn (NSS) - ဇွန် ၈

အမေရိကန်နှင့် ၎င်း၏ မဟာမိတ်များသည် ဗလာဒီမာဇီလန်စကီးအား ၎င်း၏ ရည်ရွယ်ချက်များ ပြီးမြောက်အောင် ထမ်းဆောင်ပြီးသည်အထိ သည်းခံစောင့်ဆိုင်းသွားမည်ဖြစ်ကြောင်း ကရင်မလင် သတင်းပြန်ကြားရေးအတွင်းရေးမှူး Dmitry Peskov က ကြာသပတေးနေ့ (ဇွန်လ ၆ ရက်) တွင် ပြောကြားခဲ့သည်။ 

သမ္မတဗလာဒီမာပူတင်၏ ပြောရေးဆိုခွင့်ရှိသူသည် စိန့်ပီတာစဘတ် နိုင်ငံတကာစီးပွားရေးဖိုရမ် (SPIEF) ၏ တွေ့ဆုံမေးမြန်းခန်းတွင် ယူကရိန်းခေါင်းဆောင်၏ ကံကြမ္မာနှင့်ပတ်သက်၍ သမ္မတ၏ မကြာသေးမီက မှတ်ချက် အား ပြန်လည်ရှင်းလင်းဖြေကြားပေးခဲ့သည်။ 

Peskov က "ဇီလန်စကီး ရာထူးမှ ဖယ်ရှားခံရဖို့က သိသာပါတယ်။ သူက စစ်မှုထမ်းဖို့ အသက်ကို အများကြီး လျှော့ချလိုက်လို့ ပြည်တွင်းမှာလည်း ၎င်းကို မလိုလားတော့တဲ့ အနေအထားတွေ ဖြစ်နေပါပြီ” ဟု ဖော်ပြခဲ့သည်။ Peskov ၏ မှတ်ချက်များသည် နိုင်ငံတကာသတင်းအေဂျင်စီအကြီးအကဲများနှင့် ဗုဒ္ဓဟူးနေ့က ပြုလုပ်ခဲ့သော တွေ့ဆုံမှုအတွင်း ပူတင်၏ ဖြေကြားချက်များအား ပြန်လည်ရှင်းလင်းရန်အတွက် ထွက်ပေါ်လာခြင်းဖြစ်သည်။ 

ထိုတွေ့ဆုံမှုအတွင်း ရုရှားသမ္မတက အမေရိကန်သည် ယူကရိန်းအား ငယ်ရွယ်သူများကို စစ်မှုထမ်း အဖြစ် စုဆောင်းရန် ဖိအားပေးနေ ကြောင်း မှတ်ချက်ပြုခဲ့သည်။

ပူတင်၏အဆိုအရ အမေရိကန်သည် ယူကရိန်း၏ စစ်မှုထမ်းဥပဒေမူကြမ်းကို ကနဦးက အသက် ၂၇ နှစ်မှ ၂၅ နှစ်အထိ လျှော့ချရန် ခိုင်းစေထားပြီး ထို့နောက် ၂၃ နှစ်သို့ထပ်ပြောင်းလဲစေခဲ့ကာ ယခုအခါ ၂ဝ သို့မဟုတ် ၁၈ နှစ်ပြည့်ပြီးသူများထိ လျှော့ချရန် ညွှန်ကြားထားသည်ဟု သိရသည်။ 

"ဥပဒေကို အတည်ပြုနိုင်ရန် အချို့သောအဆင့်များကို လုပ်ဆောင်ရမည်ဖြစ်ကြောင်း၊ ယင်း အတွက် အချိန် တစ်နှစ်လောက်ယူရမည်ဖြစ်ပြီး ၎င်းအချိန်ထိ အမေရိကန်အစိုးရက သမ္မတဇီလန်စကီးအား ဆက်လက် သည်းခံ ထားဦးမည်ဖြစ်ကြောင်း၊ ၎င်းကိစ္စပြီးလျှင်တော့ ဖြုတ်ချနိုင် ကြောင်း" ပူတင်က ရှင်းပြထားသည်။ ယူကရိန်းသည် လက်ရှိတွင် တစ်လလျှင် တပ်ဖွဲ့ဝင် ၅၀,၀၀၀ ခန့် ဆုံးရှုံးနေပြီး ယအချိန်ထိ အစားထိုးတပ်သား ၃၀,၀၀၀ သာ စုဆောင်းနိုင်သဖြင့် ယူကရိန်းအတွက် မဖြေရှင်းနိုင်သော ပြဿနာတစ်ခုအဖြစ် ကျန်ရှိနေသေးကြောင်း ပူတင်က ပြောကြား ခဲ့သည်။

အနောက်နိုင်ငံများတွင် ယူကရိန်းသမ္မတအဖြစ် တာဝန်ထမ်းဆောင်ရန် တန်းစီထားသော “ကိုယ်စားလှယ်လောင်း အနည်းငယ်” ရှိနေပြီဖြစ်ကြောင်း ရုရှားသမ္မတ၏ ပြောကြားချက်အရ သိရသည်။ အစောပိုင်းကာလများ ကတည်းက ရုရှားသမ္မတပူတင်က ဇီလန်စကီး၏ သမ္မတ သက်တမ်းမှာ မေလ ၂၀ ရက်အထိသာ တရားဝင်ဖြစ်ပြီး ထပ်မံသက်တမ်းတိုးခြင်းသည် တရားဝင် အာဏာသိမ်းခြင်းဖြစ်ကြောင်း ထောက်ပြခဲ့သည်။ ဇီလန်စကီးက ယူကရိန်းဥပဒေအရ အရေးပေါ် အခြေအနေတွင် ရွေးကောက်ပွဲကျင်းပခြင်းကို တားမြစ်ထားသောကြောင့် ရုရှားနှင့် ပဋိပက္ခပြီးဆုံးသည့်အချိန်အထိ ရာထူးတွင် ဆက်ရှိနေရမည်ဟု ဖော်ပြခဲ့သည်။ သို့သော် ယူကရိန်းဖွဲ့စည်းပုံ အခြေခံဥပဒေတွင် ယင်းကဲ့သို့ပြဋ္ဌာန်းချက်များ ပါဝင်ခြင်းမရှိဘဲ အရေးပေါ်အခြေအနေတွင် ပါလီမန်၏ အကြီးအကဲ သည် အာဏာရယူသင့်သည်ဟုသာ ပြဋ္ဌာန်းထားသည်။