သုတကျော် (NSS) - ဇွန် ၈

သံတွဲမြို့နယ်တွင် AA ဘက်မှစတင်ကာ တိုက်ပွဲများဖော်ဆောင်ပြီးနောက် တပ်မတော်နှင့် AA ကြား တိုက်ပွဲဖြစ်ပွားနေခြင်းကြောင့် ငပလီမြို့ အပါအဝင် ပင်လယ်ကမ်းနားကျေးရွာအချို့မှ ဒေသခံများပိတ်မိနေပြီး သံတွဲမြို့ပေါ်ကပင် ပစ်ခတ်သံများကို ကြားနေရကြောင်း ဒေသခံ အချို့ထံ NSS က မေးမြန်းထားသည့် အချက်အလက်များအရ သိရသည်။ 

NSS က သိရှိအတည်ပြုနိုင်သည့် အချက်အလက်များအရ ငပလီမြို့ရှိ သံတွဲလေဆိပ်တွင်လည်း တိုက်ပွဲဖြစ်ပွားသည့် ပစ်ခတ်သံများကြားရသည့်အပြင် ဂေါ့တောင်ရွာ၊ ကွေ့ချောင်း၊ အလယ်ရွာစသည်ဖြင့် ကျေးရွာများဘက်တွင်လည်း တိုက်ပွဲများ ဖြစ်ပွားနေသေးကြောင်း သိရသည်။ “ဂေါ့ နဲ့ ငပလီနဲ့ မကွာဘူးလေ။ အဲဒီနေရာတွေမှာ တိုက်ပွဲဖြစ်လာတော့ လူတွေက ထွက်လို့မရတော့ဘူး။ ထွက်လို့ရတာရယ်၊ ထွက် ထွက် ထွက် လို့ ပြောတဲ့အချိန်မှာရယ် မထွက်ပဲ ရွာမှာကျန်ခဲ့တာတွေ အားလုံးက ညပ်သွားတာ။ အခုချိန်ထွက်မယ့်အချိန်မှာ ဟိုဘက်ကလည်း ထွက်ခွင့်မပေးဘူး။ ဒီဘက်ကလည်း ထွက်ခွင့်မပေးဘူး။ ပြီးတော့ အစစ် အဆေးကများတာရယ်၊ မယုံသင်္ကာက များတာရယ်ကြောင့် သူတို့နေရာမှာ နေရင်းပိတ်မိသွားတာ။ သူတို့နေရာက လူတွေကထွက်လို့မရ။ ပြီးတော့ဟိုတယ်ဘက် ပုန်းအောင်းရင် ထွက်လို့ မရတာ ဖြစ်နေတာ။ အဓိက လာလို့မရတာ အဲဒီအနေအထားဖြစ်နေတာ။ အများကြီးပဲ။ ငပလီဘက်မှာဆိုလည်း ဟိုတယ်ဘက်ပိတ်မိသူတွေ။ ဂေါ့မှာဆိုလည်း ဟိုတယ်ဘက် ပိတ်မိသူတွေ၊ ရွာတွေဘက် ပိတ်မိသူတွေအများကြီးပဲ”ဟု ဒေသခံတစ်ဦးက ပြောသည်။ 

လင်းသာကျေးရွာ၊ မြပြင်ကျေးရွာ၊ ဂျိတ်တောကျေးရွာစသည်ဖြင့် ပင်လယ်ကမ်းနီးကျေးရွာများမှ ဒေသခံများလည်းပိတ်မိနေပြီး လက်ရှိတွင် ဆက်သွယ်ရခက်ခဲသည့် အခြေအနေကြောင့် အရေအတွက် မည်မျှပိတ်မိနေသည်ဆိုသောအချက်ကို ပြောနိုင်ခြင်း မရှိကြောင်း အထက်ပါ ဒေသခံကဆိုသည်။  “အခုဆိုရင် သံတွဲမြို့ပေါ်မှာ ကုန်းစျေးနှုန်းလည်း တက်နေတယ်။ ကြက်ဥတွေလည်းဈေးတက်တယ်။ စျေးထဲမှာလည်း ရောင်းမယ့်သူလည်း မရှိတော့တာ။ ပိုက်ဆံတတ်နိုင်တဲ့သူက ရန်ကုန်ဘက်လာတော့ သုံးချိုး နှစ်ချိုးလောက်က ရောင်းမယ့်သူ မရှိတော့ဘူး။ လက်ကျန်လောက်ပဲ ရှိတယ်။ တချို့တွေကလည်း ကြောက်လန့်ပြီး ဆိုင်တွေ လာမဖွင့်တော့ဘူး။ ရွာတွေမှာ တိုက်ပွဲဖြစ်တော့ ဟင်းသီးဟင်းရွက်လည်း လာမရောင်းတော့ လာရောင်းတဲ့ စျေးသည် တစ်သည်၊ နှစ်သည်ဆီက စျေးကြီးပေးပြီး ဝယ်နေရတဲ့ အနေအထားပါ” ဟု ၎င်းက ဆိုသည်။ 

လက်ရှိ တိုက်ပွဲဖြစ်ပွားသော နေရာများမှာ မြို့နှင့် ၇ မိုင်၊ ၅ မိုင် စသည်ဖြင့် အကွာနေရာများတွင် ဖြစ်သောကြောင့် တိုက်ပွဲဖြစ်ပွားသည့် သေနတ်သံ၊ လက်နက်ကြီးသံများကို ကြားနေရကြောင်းလည်း အခြားဒေသခံတစ်ဦးက ဆိုသည်။ “မြို့ထဲမှာ စစ်ဘေးရှောင်တွေလည်း ကြားနေရတယ် ပြောတယ်။ ကျိန္ဆလီဘက်ကလည်း လက်နက်ကြီး ပစ်သံကြားရတယ်ပြောတယ်။ ဒေသခံတွေကသွားဖို့ အဆင်မပြေတော့ ဘယ်နားမှာတိုက်ပွဲဖြစ်တယ်ဆိုတာက ပြောမရဘူး။ နေ့ခင်းလောက်အထိ တိုက်ပွဲဖြစ်သံကို သံတွဲမြို့ပေါ်က ကြားရတယ်ပြောတယ်။ ငပလီဘက်မှာလည်း ပိတ်ပင်နေတဲ့ သူတွေရှိသေးတယ်လို့ ပြောတယ်”ဟု အထက်ပါဒေသခံက ဆိုသည်။ 

လက်ရှိတွင် သံတွဲမြို့ပေါ်၌ အိမ်ငှားခအချို့လည်း မူလထက်စျေးထက်နေသည့် အခြေအနေ ဖြစ်ကြောင်း သိရသည်။ “သံတွဲမှာ အိမ်ငှားခ စျေးတက်တယ် ဆိုတာက သူတို့ ရွာတွေ၊ တောင်ကုတ်ဘက်က လူတွေ သံတွဲမြို့ပေါ် တက်နေတယ်ပေါ့နော်။ ရှစ်သောင်း၊ တစ်သိန်း ဖြစ်တာ ရှိတယ်။ ဒါပေမဲ့ မြို့က လက်ရှိမှာ လျှပ်စစ်မီးမရတာလည်း ကြာပြီ။ အင်တာနက်လည်း ပြတ်နေတယ်။ အခု အမှန်အတိုင်းပြောရရင် သံတွဲမြို့ပေါ် တက်လာတာကလည်း ရန်ကုန်ကို ထွက်ဖို့အတွက် တက်လာကြတာ။ အခု လေယာဉ်က မဆင်းတော့ သူတို့က စောင့်နေတာ။ လေယာဉ်လက်မှတ်က ဝယ်ပြီးသား။ မြို့ပေါ်တက်ပြီး နီးစပ်ရာ အိမ်တွေ ငှားနေကြတာ။ ရန်ကုန်ကို ပြောင်းလာတဲ့ သူတွေရဲ့ အိမ်တွေမှာ လွတ်နေတယ်ဆိုရင် ငှားနေတယ်ပေါ့။ ဥပမာ ငါတို့ အခုဘယ်နှရက်နေတဲ့အတွက် တစ်သိန်းပေးမယ်၊ ရှစ်သောင်းပေးမယ်ဆိုပြီး နေကြတာ။ ရှစ်သောင်း၊ တစ်သိန်း၊ တစ်သိန်းနှစ်သောင်းလောက်အထိ တက်သွားတယ်လို့ ပြောကြတယ်” ဟု ၎င်းက ဆိုသည်။ 

လက်ရှိတွင် AA အနေဖြင့် သံတွဲမြို့ကို ရရှိရေးဦးတည်တိုက်ခိုက်နေသည်ဟု စစ်ရေး အကဲ ခတ်အချို့က သုံးသပ်ထားကာ အဆိုပါဒေသ၌ ဧပြီလ ၂၂ ရက်မှ စတင်ကာ တိုက်ပွဲများ ဖော်ဆောင်နေခြင်း ဖြစ်သည်။