Pika (NSS) - ဇွန် ၈

ဇွန်လ(၆)ရက်နေ့နံနက်ပိုင်းက ထိုင်းနိုင်ငံ Muang ခရိုင်မှာရှိတဲ့ ပြည်သူ့ဆေးရုံမှာ ခွဲစိတ်ကုသမှုတွေ လုပ်ဆောင်ဖို့ စောင့်ဆိုင်းနေတဲ့ မြန်မာနိုင်ငံသားလူနာတစ်ဦး သေနတ်နဲ့ပစ်သတ်ခံခဲ့ရတယ်လို့ သိရပါတယ်။ အဲဒီပစ်ခတ်မှုဟာ Khon Kaen ဆေးရုံရဲ့ အမျိုးသားခွဲစိတ်ကုသမှုအဆောက်အအုံမှာ ဖြစ်ပွားခဲ့တယ်လို့ Muang ခရိုင်ရဲမှူးချုပ် Yotsawat Kaewsuebthanyanit က ပြောကြားခဲ့ပါတယ်။

ပစ်ခတ်မှုနဲ့ပတ်သက်ပြီး ရဲတပ်ဖွဲ့ကို ဇွန်လ(၆)ရက်နေ့ နံနက်(၁)နာရီအချိန်မှာအကြောင်း ကြားခဲ့တာလို့လည်း သိရပါတယ်။ ရဲတပ်ဖွဲ့ဝင်တွေနဲ့ မှုခင်းဆေးပညာအရာရှိတွေဟာ အခင်းဖြစ်ပွားရာနေရာကို ချက်ချင်းသွားရောက်ခဲ့ပြီးနောက် ငါးလွှာမှာရှိတဲ့အခန်းတစ်ခုအတွင်းမှာ ဦးခေါင်းမှာသေနတ်ဒဏ်ရာရရှိထားတဲ့ ကျော်စွာအောင် အသက်(၂၉)နှစ်ကို တွေ့ရှိခဲ့တယ်လို့လည်း သိရပါတယ်။ ထို့နောက် ဆေးရုံးဝန်ထမ်းတွေဟာ အရေးပေါ်ခွဲစိတ်ကုသမှုတွေလုပ်ဆောင်ဖို့အတွက် ကျော်စွာအောင်ကို အရေးပေါ်ခွဲခန်းကို ရွှေ့ခဲ့ပေမယ့်လည်း မကြာခင်မှာပဲ သေဆုံးသွားခဲ့တယ်လို့ သိရပါတယ်။ ၎င်းရဲ့ချစ်သူဖြစ်သူ ထိုင်းမိန်းကလေးက ကျော်စွာအောင်ဟာ ၎င်းရဲ့ကျောမှာ အကြိတ်တစ်ခုကို တွေ့ရှိပြီးနောက် ဇွန်လ(၅)ရက်နေ့မှာ ဆေးရုံတက်ခဲ့တာဖြစ်တယ်လို့ ရဲတပ်ဖွဲ့ကို ပြောကြားခဲ့ပါတယ်။ ပြီးတော့ ခွဲစိတ်ကုသမှုတွေ လုပ်ဆောင်ဖို့စောင့်ဆိုင်းနေစဉ်အချိန်အတွင်း ယခုလိုသေနတ်နဲ့ပစ်သတ်ခံခဲ့ရတာလို့လည်း အဲဒီမိန်းကလေးက ပြောကြားခဲ့ပါတယ်။

၎င်းတို့နှစ်ဦးစလုံးဟာ Khon Kaen မြို့မှာရှိတဲ့ ငါးဖမ်းပိုက်ထုတ်လုပ်တဲ့ စက်ရုံတစ်ခုမှာအလုပ်လုပ်တာလို့လည်း သိရပါတယ်။ ၎င်းတို့နှစ်ဦးဟာ အချိန်(၄)နှစ်ကျော်ကြာ ချစ်ကြိုက်ခဲ့ပြီး အရှေ့မြောက်ပိုင်းပြည်နယ်မှာရှိတဲ့ အငှားခန်းတစ်ခုမှာ အတူတကွနေထိုင်ခဲ့ကြတာလို့လည်း သိရပါတယ်။ ကျော်စွာအောင်ဟာ ဘယ်သူနဲ့မှ ပြဿနာမရှိကြောင်းနဲ့ စက်ရုံတစ်ခုတည်းမှာ အလုပ်တူတူလုပ်တဲ့ လုပ်ဖော်ကိုင်ဖက်တစ်ဦးထံကနေ ဘတ်(၁၂၀၀၀) ချေးယူခဲ့တာမျိုးပဲရှိတယ်လို့ အဲဒီမိန်းကလေးက ပြောကြားခဲ့ပါတယ်။ သေနတ်သမားဟာ ဧည့်သည်အဖြစ်ဟန်ဆောင်ပြီး ကျော်စွာအောင်ရဲ့ အခန်းနဲ့ပတ်သက်ပြီး သူနာပြုဆရာမတစ်ဦးကို မေးမြန်းခဲ့တယ်လို့ Yotsawat Kaewsuebthanyanit ကပြောကြားခဲ့ပါတယ်။ 

ထို့နောက်သေနတ်သမားဟာ ကျော်စွာအောင်ကို သေနတ်နဲ့ပစ်ပြီး ချက်ချင်းထွက်ပြေးခဲ့တယ်လို့ ၎င်းကထပ်မံပြောကြားခဲ့ပါတယ်။ ၎င်းက 'ရဲတပ်ဖွဲ့ဟာ စီစီတီဗီမှတ်တမ်းတွေကို စစ်ဆေးနေပြီး သံသယရှိသူကို ရှာဖွေဖို့ စုံစမ်းစစ်ဆေးမှုတွေ လုပ်ဆောင်နေပါတယ်။ အဓိကသံသယရှိသူကတော့ ဒီစက်ရုံမှာပဲ အလုပ်လုပ်ပြီး ပျောက်သွားတဲ့ မြန်မာနိုင်ငံသားတစ်ဦးပဲဖြစ်ပြီး ၎င်းက အခြားနေရာတစ်ခုကို ထွက်ပြေးသွားပုံပေါ်ပါတယ်'လို့ ပြောဆိုခဲ့ပါတယ်။