Htay Oung (NSS) - ဇွန် ၇

 ရေတပ်သင်္ဘောကျင်း တိုက်ခိုက်မှုကိစ္စနဲ့ ပတ်သက်ပြီး ပါကစ္စတန် ရေတပ်အရာရှိဟောင်း ၅ ဦးရဲ့ သေဒဏ်ချမှတ်ခံထားရမှုကို အစ္စလာမာဘတ်တရား ရုံးချုပ်က ကွပ်မျက်မိန့်ကို ရွှေ့ဆိုင်းလိုက်တယ်လို့ အိန္ဒိယအခြေစိုက် ဟိန္ဒူစတန်တိုင်းမ် သတင်းစာက ယမန်နေ့(ဇွန်လ ၆ ရက်) မှာ ရေးသားပါတယ်။ 

၂၀၁၄ ခုနှစ်မှာ ဖြစ်ပွားခဲ့တဲ့ တိုက်ခိုက်မှုနဲ ပတ်သက်ပြီး ရေတပ်အရာရှိဟောင်း ၅ ဦးအပေါ် ပါကစ္စတန်စစ်တရားရုံးက ချမှတ်ထားတဲ့ သေဒဏ်အမိန့်ကို အမြင့်ဆုံးဖြစ်တဲ့တရားရုံးဖြစ်တဲ့ အစ္စလာမ်မာဘတ်တရားရုံးချုပ်က ကွပ်မျက်မိန့်နဲ့ပတ်သက်လို့ ဆုံးဖြတ်လိုက်ခြင်းဖြစ်ကြောင်း သိရှိရပါတယ်။ အထွေထွေစစ်ခုံရုံးက အမိန့်ချမှတ်စဉ် စွပ်စွဲခြင်းခံရသူတွေဟာ ဥပဒေကြောင်းအရ ခုခံချေပခွင့် မလုံလောက်ခဲ့ကြောင်း ရေတပ်အရာရှိများရဲ့ လျှောက်ထားချက်ကို ယမန်နေ့ ကြားနားပြီးနောက် အစ္စလာမာဘတ် တရားရုံးချုပ် တရားသူကြီးက စာဖြင့်ရေးသား အမိန့်ချမှတ်လိုက်ခြင်းဖြစ်တယ်လို့ အင်္ဂလိပ်ဘာသာနဲ့ ထုတ်ဝေတဲ့ ဒေါင်းနယူးစ် ပါကစ္စတန် သတင်းစာ ကဖော်ပြပါတယ်။ 

ရေတပ်သင်္ဘောကျင်း တိုက်ခိုက်ခံရမှုကိစ္စနဲ့ ဆက်စပ်ပြီး ၂၀၁၆ ခုနှစ်မှာ အဲ့ဒီ အရာရှိ ၅-ဦးကို ဖမ်းဆီးခဲ့ပြီးနောက် ရေတပ်စစ်ခုံရုံးက စီရင်ချက်ချခဲ့ပါတယ်။ ၎င်းတို့ဟာ ရေတပ်မတော်အတွင်း ခေါင်းဆောင်မှုကို ဆန့်ကျင်ရန် မကောင်းကြံစည်ရာမှာ ပူးပေါင်းခြင်းဖြင့် အပြစ်ရှိကြောင်း ထင်ရှားတယ်လို့ အမိန့်ချမှတ်ခဲ့ပါတယ်။

၂၀၁၄ ခုနှစ် စက်တင်ဘာလ ကရာချိမြို့ရေတပ်သင်္ဘောကျင်းမှာ တိုက်ခိုက်ခံခဲ့ရမှုဖြစ်ပွားခဲ့ပါတယ်။ တိုက်ခိုက်မှုဟာ သူတို့လက်ချက်ဖြစ်တယ်လို့ ပါကစ္စတန်နိုင်ငံမှာ မတရားအသင်းအဖြစ်ကြေညာခံထားရတဲ့ တာရစ်အီးတာလီဘန်ပါကစ္စတန်စစ်သွေးကြွအဖွဲ့က သတင်းထုတ်ပြန်ခဲ့ပါတယ်။

အဲဒီအချိန် ပါကစ္စတန်ရေတပ်မတော်က ထုတ်ပြန်တဲ့ ကြေညာချက်အရ စစ်သွေးကြွ ၂-ဦးနဲ့ ရေတပ်ဝန်ထမ်း တစ်ဦး သေဆုံးခဲ့ကြောင်း သိရှိရပါတယ်။ တိုက်ခိုက်သူ ၄-ဦးကို ဖမ်းဆီးရမိထားတယ်လို့လည်း ဆိုပါတယ်။ လျှောက်ထားခံရသူများကို ကိုယ်စားပြုတဲ့ ရှေ့နေများကတော့ ၎င်းတို့အနေနဲ့အမှုသည်များ ကြည့်ရှုခွင့်-မျှ ဝေရယူပိုင်ခွင့်ရှိတဲ့ အထောက်အထား အကျဉ်းချုပ်များနဲ့ စုံစမ်းစစ်ဆေးတွေ့ရှိချက်မျိုးလိူ အရေးကြီးစာရွက်စာတမ်းများကို မရရှိခဲ့ကြောင်း စောဒကတက်ခဲ့ပါတယ်။ သေဒဏ်အတွက် အယူခံလွှာကို အဆိုပါစာရွက်စာတမ်းများမပါဘဲ တင်သွင်းခဲ့ရပြီး ပယ်ချခံခဲ့ရခြင်းဖြစ်ကြောင်း၊ စီရင်ချက်ချမှတ်ရခြင်းရဲ့ အကြောင်းရင်းများကိုလည်း လျှောက်ထားသူများထံ မျှဝေခြင်း မပြုခဲ့ကြောင်း၊ ဒါ့အပြင် တရားရုံးက အမိန့်ပေးထားပြီးဖြစ်ပေမယ့် စာရွက်စာတမ်းများကို ဝင်ရောက်ကြည့်ရှုခွင့်မှ ကန့်သတ်ထားတဲ့အတွက် အယူခံဝင်သူများအတွက် ခုခံကာ ကွယ်နိုင်စွမ်းအပေါ် အဟန့်အတားဖြစ်စေလျက်ရှိကြောင်း လျှောက်လဲပါတယ်။

စစ်ခုံရုံးကိုယ်စား လက်ထောက်ရှေ့နေချုပ်က ငြင်းဆိုရာမှာ ရေတပ်ဦးစီးချုပ်အနေနဲ စာရွက်စာတမ်းများကို ကြည့်ရှုရန် အခွင့်အာဏာရှိကြောင်း ချေပပါတယ်။ “၁၉၆၁-ခုနှစ်၊ ပါကစ္စတန် ရေတပ်မတော်ဥပဒေ ပုဒ်မ ၁၉၃” အရ တရားစွဲဆိုခြင်းနဲ့ ပတ်သက်တဲ့ သတင်းအချက်အလက်များကို မျှဝေခြင်းဟာ နိုင်ငံတော်ဘေးကင်းလုံခြုံ ရေးနဲ့အကျိုးစီးပွားအပေါ် ထိခိုက်နိုင်ခြင်း ရှိ-မရှိ ဆုံးဖြတ်နိုင်ကြောင်း၊ ယခုအမှုမှာ သေဒဏ်ကျခံထိုက်ကြောင်း တွေ့ရှိချက်များနဲ့ အယူခံဆုံးဖြတ်ချက်များအပါအဝင် စစ်ခုံရုံးရဲ့ အသေးစိတ်အချက်အလက်များကို မျှဝေခြင်းအားဖြင့် နိုင်ငံတော်ကို အန္တရာယ်ဖြစ်စေနိုင်ကြောင်း ပါကစ္စတန်ရေတပ်ဦးစီးချုပ်က ဆုံးဖြတ်ခဲ့တယ်လို့ ထုချေပါတယ်။

ရေတပ်အကြီးအကဲရဲ့ သဘောထားကို ယခု တင်ပြနိုင်ခြင်း ရှိ-မရှိ လျှောက်ထားသူများရဲ့ ရှေ့နေများမေးခွန်းကို လက်ထောက်ရှေ့နေချုပ်က “ မရှိကြောင်း” ပြန်လည်ဖြေဆိုပြီး၊ မှတ်တမ်းကို ပါကစ္စတန် ရေတပ်ဌာနချုပ်မှာ ထားရှိမှာဖြစ်ကြောင်း၊ စစ်ခုံရုံးတင်စစ်ဆေးခြင်းမှ အချို့သောအသေးစိတ်အချက်အလက်များကို မျှဝေခြင်းဟာ နိုင်ငံတော်လုံခြုံရေး သို့မဟုတ် အကျိုးစီးပွားကို ထိခိုက်နိုင်တယ်လို့ ဖြေရှင်းပါတယ်။

တရားသူကြီးက သုံးသပ်ရာမှာ ယခုမေးခွန်းဟာ လူတစ်ဦးတစ်ယောက်ရဲ့ အသက်ရှင်သန်ခွင့်နဲ့ ကာကွယ်စောင့်ရှောက်ခြင်းတို့လို အရေးကြီးပြဿနာများပါဝင်နေခြင်းအပေါ် မူတည်စဉ်းစားရမှာဖြစ်ကြောင်း၊ အဲဒီကိစ္စမှာ မပြေလည်မချင်း အစ္စလာမာဘတ် တရားရုံးချုပ်က ကွပ်မျက်မှုကို ရပ်တန့်လိုက်ကြောင်း၊ လျှောက်ထားသူများဟာ ရေတပ်ဦးစီးချုပ်ရဲ့ ထင်မြင်ချက်ကို ရက်သတ္တပတ်သုံးပတ်အတွင်း တင်ပြရန်၊ ယခုအမှုမှာ လျှောက်ထားခံရသူများနဲ့ ပတ်သက်တဲ့ သတင်းအချက်အလက်များ မျှဝေခြင်းဟာ နိုင်ငံတော် အကျိုးစီးပွားကို ထိခိုက်စေကြောင်း ၎င်းအနေနဲ့ ယုံကြည်ရတဲ့ အကြောင်းရင်းကို ရှင်းလင်းချက်နဲ့အတူ ဖြေကြားရန် အမိန့် ချမှတ်လိုက်တယ်လို့ ဆိုပါတယ်။ အဆိုပါအမှုကို ဇူလိုင် ၁ ရက်အထိ ရွှေ့ဆိုင်းထားကြောင်း သိရှိရတယ်လို့ သတင်းမှာ ဆက်လက်ဖော်ပြပါတယ်။

(စစ်အုပ်ချုပ်ရေး ကြေညာထားခြင်း မရှိတဲ့ နယ်မြေမှာ စစ်ခုံရုံးနဲ့ အရပ်ဘက် တရားရုံးကိစ္စပါ။ ကျွန်တော့်အနေနဲ့ အလွန်စိတ်ဝင်စားစရာကောင်းတယ်လို့ ယူဆမိတဲ့အတွက် မူရင်းအာဘော် အတိအကျ နီးပါးဖြစ်အောင် ကြိုးစားထားပါတယ်။ ။သတင်းဘာသာပြန်သူ၏ )

(Hindustan Times., 5 June 2024,” Islamabad High Court stays execution of five former Pakistan Navy officers sentenced to death in Navy Dockyard attack case” ကို ဆီလျော်အောင်ကောက်နှုတ်ဘာသာပြန်ဆိုသည်။)