ALynn (NSS) - ဇွန် ၅

ဂါဇာတွင် အစ္စရေးခေါင်းဆောင်များကို စစ်ရာဇ၀တ်မှုဖြင့် စွဲချက်တင်ရန် စီစဉ်ထားသော အပြည်ပြည်ဆိုင်ရာရာဇ၀တ်မှုတရားရုံး (ICC) ကို အရေးယူရန် အမေရိကန်အောက်လွှတ် တော်က အင်္ဂါနေ့ (ဇွန်လ ၄ ရက်) တွင် မဲခွဲဆုံးဖြတ်ခဲ့သည်။ 

ICC ရှေ့နေ Karim Khan သည် အစ္စရေး၀န်ကြီးချုပ် နေတန်ယာဟုနှင့် ကာကွယ်ရေးဝန်ကြီး Yoav Gallant တို့အပြင် ပါလက်စတိုင်း စစ်သွေးကြွအဖွဲ့ ဟားမက်စ်၏ ထိပ်တန်းခေါင်းဆောင် သုံးဦးအား ဖမ်းဝရမ်းထုတ်ရန် လျှောက်ထားခဲ့သည်။ အဆိုပါလျှောက်ထားချက်ကို တရားရုံးက အတည်မပြုသေးသော်လည်း အမေရိကန်လွှတ်တော်ကိုယ်စားလှယ်များက ၎င်းအခြေအနေအမှန်တကယ်ဖြစ်မလာစေရန် ကြိုတင်တားဆီးမှုများ လုပ်ဆောင်နေသည်။ 

“အီရန်ရဲ့လက်ဝေခံ ဟားမက်စ်သူပုန်တွေကို ဆန့်ကျင်တိုက်ခိုက်နေချိန်မှာ အစ္စရေးဝန်ကြီး ချုပ် နဲ့ အစ္စရေးကာကွယ်ရေးဝန်ကြီးတို့ကို ဖမ်းဝရမ်းထုတ်မယ်ဆိုတဲ့ အယူအဆက အသိ ဉာဏ် ကင်းမဲ့တဲ့လုပ်ရပ်ဖြစ်တယ်”ဟု အောက်လွှတ်တော်ဥက္ကဋ္ဌ Mike Johnson က အင်္ဂါနေ့တွင် ပြောကြားခဲ့သည်။ ထို့ပြင် “ပြီးခဲ့တဲ့ရက်သတ္တပတ် နှစ်ပတ်လောက်က ကျွန်တော်ပြောခဲ့သလိုပဲ ICC က ဒီလုပ်ရပ်အတွက် အပြစ်ပေးခံရမှာ ဖြစ်ပါတယ်”ဟုလည်း ထပ်လောင်းပြောကြားခဲ့သည်။

ICC အား အရေးယူရန်အဆိုကို ထောက်ခံမဲ ၂၄၇ မဲ၊ ကန့်ကွက် ၁၅၅ မဲဖြင့် အတည်ပြုခဲ့သည်။ ရီပတ်ဘလီကန်အမတ်အားလုံးနှင့် အစ္စရေးလိုလားသော ဒီမိုကရက် ၄၂ ဦးက ထောက်ခံမဲပေးခဲ့ကြခြင်းဖြစ်သည်။ ယင်းမှာ ဒီမိုကရက်ပါတီက ရီပတ်ဘလစ်ကန်ပါတီက တင်သွင်းသည့်  အဆိုပြုချက်ဖြစ်သောကြောင့်လည်း ကန့်ကွက်ခဲ့ခြင်းဖြစ်သည်။ Texas မှ ရီပတ်ဘလစ်ကန်အမတ် Chip Roy မှ ကမကထပြုတင်သွင်းသော ဥပဒေကြမ်းအဆိုအရ ICC အရာရှိများအပေါ် ခရီးသွားလာမှုနှင့် ငွေကြေးဆိုင်ရာ ပိတ်ဆို့အရေးယူမှုများကို အမေရိကန်သမ္မတက ချမှတ်သွားမည်ဖြစ်ပြီး တရားရုံးက အမေရိကန်များ သို့မဟုတ် ၎င်းတို့၏မဟာမိတ်များကို စုံစမ်းစစ်ဆေးမှုရပ်ဆိုင်းပါက ၎င်းပိတ်ဆို့အရေးယူမှုများကို ရပ်တန့်ပေးသွားမည်ဖြစ် သည်။ ပိတ်ဆို့အရေးယူမှုများသည် အမေရိကန်၏ မဟာမိတ်အချို့အပေါ် သက်ရောက်မှု ရှိနိုင်ကြောင်း သတိပေးထားသည်။

အဆိုပါဥပဒေကြမ်းကို ထောက်ခံသူများက အမေရိကန်သည် အစ္စရေးနှင့်အတူ ရပ်တည်နေကြောင်း ကမ္ဘာကြီးဆီသို့ သတင်းစကား ပေးပို့နိုင်မည်ဟု ဖော်ပြထားသည်။ သို့သော် အထက် လွှတ်တော်ရှိ ဒီမိုကရက်များနှင့် သမ္မတဘိုင်ဒင်၏ ထောက်ခံမှုမရှိဘဲ ၎င်းမှာ ဥပဒေဖြစ်လာရန် လွယ်ကူမည်မဟုတ်ပါ။ ပြီးခဲ့သည့်နှစ်တုန်းက ရုရှားသမ္မတ ဗလာဒီမာပူတင်ကို ICC က ဖမ်းဝရမ်းထုတ်ခဲ့စဉ်က အမေရိကန်က ဝမ်းမြောက်စွာအားပေးခဲ့သော်လည်း ယခုအခါအစ္စရေးခေါင်းဆောင်များအပေါ် ICC က ထိုနည်းအတိုင်းပြုမူသည့်အခါ အမေရိကန်က ပြင်းပြင်းထန်ထန်ဆန့်ကျင်ဖို့ လုပ်လာသည်ကို တွေ့ရှိရသည်။