Pika (NSS) - မေ ၂၈

မြောက်ကိုရီးယားနိုင်ငံဟာ မေလ(၂၇)ရက်နေ့မှာ စစ်ဘက်သုံးဂြိုလ်တုအသစ်ကို လွှတ်တင်ဖို့ ကြိုးပမ်းခဲ့ပေမယ့်လည်း အသစ်တီထွင်ထားတဲ့ ဒုံးပျံအင်ဂျင်ဟာ ပျံသန်းစဉ်အချိန်အတွင်း လေထဲမှာပေါက်ကွဲသွားခဲ့တယ်လို့ သိရပါတယ်။

မြောက်ကိုရီးယားအစိုးရဟာ ကမ္ဘာပတ်လမ်းကြောင်းထဲမှာ ၎င်းတို့ရဲ့ ဒုတိယမြောက်စပိုင်ဂြိုလ်တုဖြစ်လာမယ့် ဂြိုလ်တုကို လာမယ့်ဇူလိုင်လ(၄)ရက်နေ့မှာ လွှတ်တင်ဖို့ကြိုးပမ်းသွားမယ်လို့ သတိပေးချက်တွေ ထုတ်ပြန်ပြီးနောက် နာရီပိုင်းအကြာမှာ ဒီလိုကြိုးပမ်းမှုတွေထွက်ပေါ်လာတာဖြစ်ပါတယ်။ မြောက်ကိုရီးယားဟာ ၎င်းတို့ရဲ့ပထမဆုံး စပိုင်ဂြိုလ်တုကို ပြီးခဲ့တဲ့နှစ် အောက်တိုဘာလမှာ ကမ္ဘာပတ်လမ်းကြောင်းအတွင်း အောင်မြင်စွာလွှတ်တင်နိုင်ခဲ့တာလည်းဖြစ်ပါတယ်။ မြောက်ကိုရီးယားရဲ့ အမျိုးသားအာကာသနည်းပညာ စီမံခန့်ခွဲရေး လက်ထောက် ညွှန်ကြားရေးမှူးချုပ်က 'စစ်ဘက်သုံးဂြိုလ်တုကို သယ်ဆောင်ထားတဲ့ ဒုံးပျံဟာ လွှတ်တင်ပြီးနောက် မကြာခင်မှာပဲ လေထဲမှာပေါက်ကွဲသွားခဲ့ပါတယ်'လို့ ပြောဆိုခဲ့ပါတယ်။

ပေါက်ကွဲသွားတဲ့ဒုံးပျံဟာ အသစ်တီထွင်ထားတဲ့ လောင်စာဆီအရည်သုံးဒုံးပျံဖြစ်ပြီး ပေါက်ကွဲမှုနဲ့ပတ်သက်ပြီး ဖြစ်နိုင်ခြေရှိတဲ့ အခြားအကြောင်းအရာတွေကို စုံစမ်းစစ်ဆေးမှုတွေ ဆက်လက်လုပ်ဆောင်နေတယ်လို့ ထုတ်ပြန်ချက်တစ်ခုမှာရေးသားဖော်ပြထားပါတယ်။မြောက်ကိုရီးယားရဲ့  စစ်ဘက်သုံးဂြိုလ်တုလွှတ်တင်မှုဟာ ကျရှုံးခဲ့ပုံပေါ်တယ်လို့ တောင်ကိုရီးယား နဲ့ ဂျပန်တို့ရဲ့အရာရှိတွေက အစောပိုင်းမှာပြောကြားခဲ့ပါတယ်။ မြောက်ကိုရီးယားအစိုးရဟာ ဒုံးပျံတစ်စင်းကို ၎င်းရဲ့အနောက်ဘက်ကမ်းရိုးတန်း တောင်ပိုင်းကနေ မေလ (၂၇)ရက်နေ့၊ နံနက်(၁၀)နာရီ(၄၄)မိနစ်အချိန်မှာ လွှတ်တင်ခဲ့တယ်လို့ တောင်ကိုရီးယားစစ်ဦးစီးချုပ်များရုံး(JCS) ကပြောကြားခဲ့ပါတယ်။ ပစ်လွှတ်မှုတွေ လုပ်ဆောင်ပြီးနောက် (၂)မိနစ်လောက်အကြာမှာ မြောက်ကိုရီးယားဒုံးပျံရဲ့ အပျက်အစီးအများအပြားကို ပင်လယ်ထဲမှာ ခြေရာခံတွေ့ရှိခဲ့တယ်လို့ (JCS) က ပြောကြားခဲ့ပါတယ်။ မြောက်ကိုရီးယားဘက်က ပစ်လွှတ်လိုက်တဲ့ အရာဝတ္ထုဟာ ပင်လယ်ဝါအတွင်း ပျောက်ကွယ်သွားခဲ့တယ်လို့ ဂျပန်အစိုးရအဖွဲ့အတွင်းဝန်ချုပ် ယိုရှီမာဆာဟာယာရှီက ပြောကြားခဲ့ပါတယ်။ ၎င်းက'ဒီပစ်လွှတ်မှုဟာ ကုလသမဂ္ဂလုံခြုံရေးကောင်စီရဲ့  ဆုံးဖြတ်ချက်တွေကို ချိုးဖောက်တာဖြစ်ပြီး ကျွန်တော်တို့ပြည်သူတွေရဲ့ လုံခြုံရေးအတွက် စိုးရိမ်စရာကိစ္စတစ်ခုပဲဖြစ်ပါတယ်'လို့ ပြောဆိုခဲ့ပါတယ်။