ALynn (NSS) - မေ ၂၅

တရုတ်သည် ထိုင်ဝမ် နှင့် ဂွာတီမာလာအကြား သံတမန်ဆက်ဆံရေးကြောင့် ဖြစ်နိုင်သည်ဟု ယူဆကာ ဂွာတီမာလာမှ ပို့ကုန်အချို့ကို ပယ်ချခဲ့ကြောင်း ဂွာတီမာလာသမ္မတ ဘာနာဒို အာရီဗာလိုက သောကြာနေ့ (မေလ ၂၄ ရက်) တွင် ပြောကြားခဲ့သည်။ 

သောကြာနေ့က ဂွာတီ မာလာ တင်ပို့ရောင်းချသူများအသင်းမှ အနည်းဆုံး မက်ကာဒမီးယားအစေ့အဆံ ကွန်တိန်နာ ခုနစ်စင်းသည် တရုတ်နိုင်ငံသို့ တင်ပို့၍မရခဲ့ကြောင်းနှင့် ကုန်သည်များက ဂွာတီမာလာ မက်ကာဒမီးယားနှင့် ကော်ဖီများကို တရုတ်က တင်သွင်းခွင့် ငြင်းပယ်ခဲ့ကြောင်း ပြောကြားခဲ့သည်။ ဂွာတီမာလာသည် ထိုင်ဝမ်နှင့် သံတမန်ဆက်ဆံရေးရှိသည့် နိုင်ငံ ၁၂ နိုင်ငံအနက်မှ တစ်နိုင်ငံ ဖြစ်သည်။ "ဂွာတီမာလာနဲ့ ဆက်ဆံရေးရှိတဲ့ ထိုင်ဝမ်အစိုးရသစ်ကို စတင်တာဝန်ယူခဲ့တာ ရက်ပိုင်းပဲရှိသေးပေမယ့် ဒီကိစ္စနဲ့ပတ်သတ်ပြီး တရုတ်နဲ့ အငြင်းပွားစရာတွေ ရှိနိုင်ပါတယ်။" ဟု အာရီဗာလိုက TikTok တွင် တိုက်ရိုက်အမေးအဖြေကဏ္ဍ၌ ပြောကြားခဲ့သည်။ 

ဂွာတီမာလာ နိုင်ငံခြားရေးဝန်ကြီး Carlos Ramiro Martinez သည် ထိုင်ဝမ်သမ္မတ လီချန်တေး၏ ကျမ်းသစ္စာ ကျိန်ဆိုပွဲသို့ တနင်္လာနေ့ (မေလ ၂၀ ရက်) က တက်ရောက်ခဲ့သည်။ ဂွာတီမာလာအစိုးရသည် ကုန်ပစ္စည်းတင်ပို့မှုပြဿနာကိုဖြေရှင်းရန် လုပ်ဆောင်နေသော် လည်း ယခုအချိန်ထိ တရုတ်နိုင်ငံထံမှ တုံ့ပြန်မှုမရရှိသေးကြောင်း အာရီဗာလိုက ပြောကြားခဲ့သည်။ ဂွာတီမာလာသည် ယမန်နှစ်က တရုတ်နိုင်ငံသို့ ကုန်ပစ္စည်းဒေါ်လာ ၈၂ သန်းဖိုး တင်ပို့ခဲ့ကြောင်း ပို့ကုန်လုပ်ငန်းရှင်များအသင်းထံမှ သိရသည်။ လိုင်နှင့် အာရီဗာလိုတို့သည် အင်္ဂါနေ့တွင် ဗီဒီယိုကွန်ဖရင့်မှတစ်ဆင့် စကားပြောခဲ့ပြီး လိုင်သည် ၎င်း၏ခိုင်မာသောထောက်ခံမှုနှင့် ဆက်ဆံရေး ပိုမိုခိုင်မာစေရန် တောင်းဆိုမှုများအတွက် ကျေးဇူးတင်ရှိကြောင်း ထိုင်ဝမ်သမ္မတရုံး၏ ထုတ်ပြန်ချက်အရ သိရသည်။ 

ထို့ပြင် လိုင်က အာရီဗာလိုအား ထိုင်ဝမ်သို့ လာရောက်ရန် နှင့် အာရီဗာလိုမှ လိုင်အား ဂွာတီမာလာသို့ လာရောက်လည်ပတ်ရန် အပြန်အလှန်ဖိတ်ကြားခဲ့ကြောင်း အဆိုပါ ထုတ်ပြန်ချက်တွင် ပါရှိသည်။ သမ္မတဟောင်း ဆိုင်အင်ဝမ်လက်ထက်တွင်လည်း တရုတ်ပြည်မကြီးကို ထောက်ခံခဲ့သော အိမ်နီးချင်း ဟွန်ဒူးရပ်စ်နှင့် သံတမန်ဆက်ဆံရေး ဖြတ်တောက်ပြီးနောက် တစ်ပတ်အကြာတွင် ဂွာတီမာလာသို့ သွားရောက်ခဲ့ကြောင်း တွေ့ရသည်။