Pika (NSS) - မေ ၂၅

ဂါဇာကမ်းမြောင်ဒေသတောင်ပိုင်းမှာရှိတဲ့ ရာဖဲလ်မြို့ကို အစ္စရေးရဲ့ ထိုးစစ်ဆင်မှုဟာ ပါလက်စတိုင်းအရပ်သားလူထု ပျက်စီးစေမယ့် အန္တရာယ်တွေကို ဖြစ်စေမှာမဟုတ်ဘူးလို့ အစ္စရေးအစိုးရက မေလ(၂၄)ရက်နေ့မှာ ထုတ်ဖော်ပြောဆိုခဲ့ပါတယ်။

ရာဖဲလ်မြို့အပေါ် ထိုးစစ်ဆင်မှုတွေကို ရပ်တန့်ဖို့ ကုလသမဂ္ဂထိပ်တန်းတရားရုံးက အမိန့်ပေးပြီးတဲ့နောက် အစ္စရေးအစိုးရရဲ့ ပြောဆိုချက်တွေ ထွက်ပေါ်လာတာဖြစ်ပါတယ်။ အစ္စရေးနိုင်ငံအနေနဲ့ ဂါဇာကမ်းမြောင်ဒေသမှာရှိတဲ့ ပါလက်စတိုင်းလူမျိုးတွေကို ထိခိုက်စေနိုင်တဲ့ လုပ်ရပ်တွေကို ရပ်တန့်ရမယ်လို့ နိုင်ငံတကာတရားရုံးက မေလ(၂၄)ရက်နေ့မှာ အမိန့်ချမှတ်လိုက်တာဖြစ်ပါတယ်။ ရာဖဲလ်မြို့အပေါ် ထိုးစစ်ဆင်မှုတွေဟာ နိုင်ငံတကာဥပဒေဘောင်အတွင်းမှာပဲရှိတယ်လို့ အစ္စရေးအစိုးရက ပြောဆိုခဲ့ပြီး နိုင်ငံတကာတရားရုံးရဲ့ အမိန့်တွေကို ငြင်းဆန်ပယ်ချခဲ့တယ်လို့သိရပါတယ်။ အစ္စရေးရဲ့အမျိုးသားလုံခြုံရေးအကြံပေး Tzachi Hanegbi က'ကျွန်တော်တို့စစ်တပ်ဟာ ဂါဇာကမ်းမြောင်ဒေသမှာရှိတဲ့ ပါလက်စတိုင်းလူမျိုးတွေကို ထိခိုက်စေနိုင်တဲ့ စစ်ဆင်ရေးတွေကို ရာဖဲလ်မြို့မှာလုပ်ဆောင်မှာမဟုတ်ပါဘူး'လို့ထုတ်ပြန်ပြောဆိုခဲ့ပါတယ်။

ဒါ့ပြင် ယခုလအစောပိုင်းမှာ ပိတ်ခံလိုက်ရတဲ့ အီဂျစ်နဲ့ဂါဇာနယ်စပ်မှာရှိတဲ့ ရာဖဲလ်နယ်စပ်ဖြတ်ကျော်ဂိတ်ကို ဖွင့်ထားပေးဖို့ အစ္စရေးကို နိုင်ငံတကာတရားရုံးက အမိန့်ပေးခဲ့တယ်လို့လည်းသိရပါတယ်။ အစ္စရေးအစိုးရရဲ့ ထုတ်ပြန်ချက်မှာ'အီဂျစ်နယ်စပ်ကနေ လူသားချင်းစာနာထောက်ထားမှုဆိုင်ရာ အကူအညီတွေဝင်ရောက်နိုင်ဖို့အတွက် ရာဖဲလ်နယ်စပ်ဖြတ်ကျော်ဂိတ်ကို ကျွန်တော်တို့ဖွင့်ပေးထားမှာပါ။ ပြီးတော့ ရာဖဲလ်နယ်စပ်ဖြတ်ကျော်ဂိတ်ကို ဟားမက်လက်နက်ကိုင်အဖွဲ့ ထိန်းချုပ်တာမျိုးတွေ မရှိစေဖို့ ကာကွယ်သွားမှာပါ'လို့ ရေးသားဖော်ပြထားပါတယ်။