Pika (NSS) - ဧပြီ ၁၉

ကင်ညာနိုင်ငံ အနောက်မြောက်ပိုင်းမှာ စစ်ရဟတ်ယာဉ်တစ်စင်း ပျက်ကျခဲ့ပြီး ကင်ညာစစ်တပ်အကြီးအကဲ အပါအဝင် လူ(၁၀)ဦး သေဆုံးခဲ့တယ်လို့ သမ္မတဝီလျံရူတိုက ပြောကြားခဲ့ပါတယ်။

ရဟတ်ယာဉ်ပျက်ကျမှုဟာ Nairobi မြို့အနောက်မြောက်ဘက် ကီလိုမီတာ(၄၀၀)အကွာမှာရှိတဲ့ Elgeyo Marakwet ကောင်တီမှာ ဧပြီလ(၁၈)ရက် နေ့လည်(၂)နာရီအချိန်က ဖြစ်ပွားခဲ့တာဖြစ်ပြီး ဗိုလ်ချုပ်ကြီး ဖရန်စစ်အိုဂိုလာ နဲ့ အခြားလူ(၉)ဦးတို့ သေဆုံးခဲ့ပါတယ်။

စစ်ရဟတ်ယာဉ်ဟာ ကင်ညာနိုင်ငံအနောက်မြောက်ပိုင်းမှာ တပ်စွဲထားတဲ့ တပ်ဖွဲ့ဝင်တွေဆီကို သွားရောက် လည်ပတ်ခဲ့တာဖြစ်ပြီး West Pokot ကောင်တီ Cheptulel Boys Secondary School အနီးကနေ ပျံတက်ခဲ့ပြီး နောက် မိနစ်ပိုင်းအကြာမှာ ပျက်ကျခဲ့တာပဲဖြစ်ပါတယ်။

ရဟတ်ယာဉ်ပျက်ကျမှု ဘာကြောင့်ဖြစ်ပွားရတယ်ဆိုတဲ့အချက်ကိုတော့ လက်ရှိအချိန်အထိ ရှင်းရှင်းလင်းလင်း မသိရှိရသေးပါဘူး။ ဝီလျံရူတိုက “ကျွန်တော်တို့ မိခင်နိုင်ငံဟာ အရဲရင့်ဆုံးဗိုလ်ချုပ်ကြီးတွေထဲက တစ်ဦးကို ဆုံးရှုံးခဲ့ ရပါတယ်။ ဖရန်စစ်အိုဂိုလာရဲ့သေဆုံးမှုဟာ ကျွန်တော့်ကို နာကျင်စေတဲ့ ဆုံးရှုံးမှုတစ်ခုပါ” လို့ ပြောဆိုခဲ့ပါတယ်။

စစ်ရဟတ်ယာဉ်ပျက်ကျမှုအတွင်း စစ်သားနှစ်ဦး အသက်ရှင်လွတ်မြောက်ခဲ့ပြီး ဆေးရုံတင်ထားရတယ်လို့ ဝီလျံရူတိုက ပြောခဲ့ပါတယ်။ ပျက်ကျမှုဘာကြောင့်ဖြစ်ပွားရတယ်ဆိုတဲ့အချက်ကို စုံစမ်းစစ်ဆေးဖို့အတွက် လေကြောင်းစုံစမ်းစစ်ဆေးရေးအဖွဲ့ကို စေလွှတ်ထားတယ်လို့လည်း ဝီလျံရူတိုက ပြောကြားခဲ့ပါတယ်။

ဖရန်စစ်အိုဂိုလာဟာ ၁၉၈၄ ခုနှစ်မှာ စစ်မှုထမ်းခဲ့ပြီး အမေရိကန်လေတပ်မှာ တိုက်လေယာဉ်မှူးအဖြစ် လေ့ကျင့် သင်ကြားခဲ့ကာ ကင်ညာလေတပ်တွင် လေ့ကျင့်ရေးမှူးအဖြစ် တာဝန်ထမ်းဆောင်ခဲ့တယ်လို့ သိရပါတယ်။