မြူနစ် (NSS) - ဧပြီ ၁၉

ရခိုင်လက်နက်ကိုင် AA အဖွဲ့ခေါင်းဆောင်သည် လူမျိုးရေးပဋိပက္ခဖြစ်ပွားရန် လုပ်ဆောင်နေကြောင်း နစကပြောခွင့်ရ ဗိုလ်ချုပ်ဇော်မင်းထွန်းက တုံ့ပြန်ပြောဆိုထားသည်။

ဗိုလ်ချုပ်ဇော်မင်းထွန်းက ယမန်နေ့(ဧပြီ ၁၈ ရက်)ညပိုင်းတွင် ရခိုင်ပြည်နယ်အခြေအနေနှင့်ပတ်သက်၍ ရှင်းလင်းပြောဆိုရာတွင် အထက်ပါကဲ့သို့ ထည့်သွင်းတုံ့ပြန်ခဲ့ခြင်းဖြစ်သည်။

“အကြမ်းဖက် AA ခေါင်းဆောင် ထွန်းမြတ်နိုင်ကလည်း သူ့ရဲ့လူမှုကွန်ရက်စာမျက်နှာမှာ မြန်မာနိုင်ငံတွင် ဟိန္ဒူဘာသာဝင် ၁၆၀၀ နဲ့ ဗုဒ္ဓဘာသာဝင် ၁၂၀ ကို အစ္စလာမ္မစ်အကြမ်းဖက်အဖွဲ့တွေက ဖမ်းဆီးထားတယ်ဆိုပြီးတော့ ရေးသားထားတာကို တွေ့ရပါတယ်။ ဒီရေးသားချက်များ၊ ဖော်ပြချက်များသည် ရခိုင်ပြည်နယ် ဘူးသီးတောင်၊ မောင်တောဒေသမှာ လူမျိုးရေး ပဋိပက္ခဖြစ်ပွားအောင်၊ တပ်မတော်နဲ့ လုံခြုံရေးတပ်ဖွဲ့ဝင်တွေကို အထင်အမြင်လွဲအောင် တမင်သက်သက် ယုတ်မာတဲ့ လုပ်ကြံဖန်တီးရေးသားမှုများသာဖြစ်တယ်ဆိုတာကို ကျွန်တော်ပြောချင်ပါတယ်”ဟု နစကပြောခွင့်ရက ဆိုသည်။

အဆိုပါသတင်းများနှင့်ပတ်သက်၍ ရေးသားဖော်ပြသော The Indian Express သတင်းဌာနကိုလည်း နစကအနေဖြင့် အပြင်းအထန်ကန့်ကွက်ရှုတ်ချထားသည်။

ရခိုင်ပြည်နယ်၊ ဘူးသီးတောင်နှင့် မောင်တောဒေသတို့တွင် လူမျိုးရေးပဋိပက္ခ ဖြစ်ပွားသည့်အခါတိုင်းတွင် ဘူးသီးတောင်မြို့သည် များသောအားဖြင့် ပဋိပက္ခကို ထိန်းသိမ်းနိုင်သည့်အခြေအနေရှိကြောင်း ဗိုလ်ချုပ်ဇော်မင်းထွန်းက ပြောသည်။

“ဘာကြောင့် ထိန်းထိန်းသိမ်းသိမ်းလုပ်နိုင်လည်းဆိုတော့ အဲဒီမှာရှိတဲ့မွတ်စလင်အဖွဲ့အစည်းတွေ၊ ရခိုင်အဖွဲ့အစည်းတွေ၊ တပ်နဲ့မြန်မာနိုင်ငံရဲတပ်ဖွဲ့စတဲ့ လုံခြုံရေးဆိုင်ရာ အဖွဲ့အစည်းတွေ၊ အစိုးရဝန်ထမ်းတွေက အမြဲတမ်းညှိညှိနှိုင်းနှိုင်း တိုင်တိုင်ပင်ပင်လုပ်ခဲ့တဲ့အတွက် ဘူးသီးတောင်မြို့ပေါ်မှာ မွတ်စလင်အများစု နေထိုင်တယ်ဆိုပေမယ့် ပဋိပက္ခအနည်းငယ်ရှိကောင်းရှိမယ်။ ကြီးကြီးမားမားဖြစ်တဲ့ ဖြစ်ရိုးဖြစ်စဉ်မရှိခဲ့ဘူး။ ဒီအချိန်ကျမှ AA အနေနဲ့ ဒါကို လူမျိုးရေးပဋိပက္ခအသွင်ဆောင်အောင် လုပ်ဆောင်နေခြင်းသာဖြစ်ပါတယ်”ဟု ၎င်းက ထပ်မံပြောသည်။

ရခိုင်ပြည်နယ်အတွင်း၌ ဖြစ်ပွားခဲ့သော လူမျိုးရေးပဋိပက္ခဖြစ်စဉ်များသည် ၁၉၄၂ ခုနှစ်၊ ၁၉၈၈ ခုနှစ်၊ ၂၀၁၂ ခုနှစ်တို့တွင် ဖြစ်ပွားခဲ့ဖူးသည်။ “အဲဒီမှာ ကျွန်တော်တို့ပြည်သူလူထု ရှင်းရှင်းလင်းလင်းသိဖို့က ရခိုင်ပြည်နယ်မှာဖြစ်ခဲ့တဲ့ လူမျိုးရေးပဋိပက္ခတွေကို တပ်မတော်၊ မြန်မာနိုင်ငံရဲတပ်ဖွဲ့၊ အစိုးရဝန်ထမ်းပိုင်းဆိုင်ရာအဖွဲ့အစည်းတွေက ဘယ်တုန်းကမှ စတင်ခဲ့တာမရှိဘူး။ လူမျိုးစုဘက်တစ်ဖက်ဖက်ကသာ စတင်ခဲ့တာရှိတယ်။ အဲဒီစတင်ခဲ့တဲ့ ပဋိပက္ခတွေကို တပ်မတော်၊ မြန်မာနိုင်ငံရဲတပ်ဖွဲ့၊ လုံခြုံရေးအဖွဲ့အစည်းတွေနဲ့ အစိုးရဝန်ထမ်းတွေနဲ့ ပြန်လည်ထိန်းသိမ်းရတာဖြစ်တယ်။ ရခိုင်ပြည်နယ်မှာ လူမျိုးရေးပဋိပက္ခဖြစ်ရင် ဘယ် လောက်အထိ ထိန်းသိမ်းရခက်ခဲတယ်ဆိုတာ တပ်မတော်၊ မြန်မာနိုင်ငံရဲတပ်ဖွဲ့၊ လုံခြုံရေးအဖွဲ့တွေနဲ့ အစိုးရဝန်ထမ်းပိုင်းအားလုံးသိတယ်”ဟု ဗိုလ်ချုပ်ဇော်မင်းထွန်းက ပြောသည်။

ထို့ပြင် AA အဖွဲ့အနေဖြင့် ဘူးသီးတောင်မြို့ပတ်ဝန်းကျင်ရှိ မွတ်စလင်ကျေးရွာများတွင် နေထိုင်သော ဒေသခံများကိုလည်း ၎င်းတို့နှင့်ပူးပေါင်း ပြောဆိုခြိမ်းခြောက်မှုများရှိနေကြောင်း နစကဘက်က ဆိုထားသည်။ လက်ရှိတွင် နစကအနေဖြင့် ဘူးသီးတောင်၊ မောင်တော်ဒေသ လုံခြုံမှုရှိစေရေးနှင့် ၎င်းဒေသရှိ တိုင်းရင်းသားများ၊ မွတ်စလင်များအားလုံးအနေဖြင့် ပဋိပက္ခများ မဖြစ်ပွားရေးကို ဆက်လက်ကြိုးပမ်းဆောင်ရွက်နေကြောင်းလည်း နစကပြောခွင့်ရက ထုတ်ဖော်အသိပေးထားသည်။