ရုရှားနှင့်ဆက်ဆံရေးအပေါ် ဖိအားပေးခြင်းမျိုး၊ ပြစ်တင်ဝေဖန်ခြင်းမျိုးကို လက်ခံမည်မဟုတ်ကြောင်း တရုတ်အစိုးရပြော
Pika (NSS) - ဧပြီ ၁ဝ
တရုတ်နှင့် ရုရှားတို့၏ ဆက်ဆံရေးအပေါ် ပြစ်တင်ဝေဖန်ခြင်းမျိုး (သို့မဟုတ်) ဖိအားပေးခြင်းမျိုးကို လက်ခံမည်မဟုတ်ကြောင်း တရုတ်အစိုးရက ဧပြီလ(၁၀)ရက်နေ့တွင် ထုတ်ပြန်ပြောကြားခဲ့သည်။
ယူကရိန်းတွင် ရုရှားကအနိုင်ရမှုများရှိလာမည်ဆိုပါက အဆိုပါကိစ္စနှင့်ပတ်သက်ပြီး တရုတ်နိုင်ငံတွင် တာဝန်ရှိ ကြောင်း အမေရိကန်ဖက်က သတိပေးပြောဆိုခဲ့ပြီးနောက် တရုတ်ဘက်က ယခုကဲ့သို့ တုံ့ပြန်ပြောဆိုခဲ့ခြင်းဖြစ် သည်။ တရုတ်နိုင်ငံသို့ ရုရှား၏ထိပ်တန်းသံတမန်တစ်ဦး လာရောက်လည်ပတ်စဉ်အချိန်အတွင်း နှစ်နိုင်ငံကြား ပူးပေါင်းဆောင်ရွက်မှုများကို ကတိပြုခဲ့ခြင်းနှင့်ပတ်သက်ပြီး အမေရိကန်က ငြိမ်နေမည်မဟုတ်ကြောင်း အမေရိကန်နိုင်ငံခြားရေးဒုဝန်ကြီး ကာ့တ်ကမ့်ဘဲလ်က ဧပြီလ(၉)ရက်တွင် ထုတ်ဖော်ပြောခဲ့သည်။
တရုတ်နိုင်ငံခြားရေးဝန်ကြီးဌာနပြောရေးဆိုခွင့်ရှိသူ အမျိုးသမီးမာအိုနင် က “တရုတ်နဲ့ ရုရှားတို့ဟာ ပုံမှန်စီးပွားရေး နဲ့ ကုန်သွယ်မှု ပူးပေါင်းဆောင်ရွက်မှုတို့မှာ ထိတွေ့ဆက်ဆံပိုင်ခွင့်ရှိပါတယ်။ ဒီလိုပူးပေါင်းဆောင်ရွက်မှုမျိုးကို ဝင်ရောက်စွက်ဖက်တာမျိုး ဒါမှမဟုတ် ကန့်သတ်တာမျိုးက မဖြစ်သင့်ပါဘူး။ ပြီးတော့ ပြစ်တင်ဝေဖန်တာတွေ ဒါမှမဟုတ် ဖိအားတွေကို တရုတ်နိုင်ငံကလက်ခံမှာ မဟုတ်ပါဘူး” ဟု ပြောခဲ့သည်။
ရုရှားနိုင်ငံခြားရေးဝန်ကြီး ဆာဂေးလာရော့ဗ်သည် တရုတ်သမ္မတရှီကျင့်ဖျင်အပြင် နိုင်ငံခြားရေးဝန်ကြီးဝမ်ယိတို့ နှင့် ဆွေးနွေးပွဲများလုပ်ဆောင်ခဲ့ပြီး နှစ်နိုင်ငံကြား မဟာဗျူဟာမြောက် ပူးပေါင်းဆောင်ရွက်မှုကို ပိုမို အားကောင်းလာအောင် လုပ်ဆောင်မည်ဟု ဧပြီလ(၉)ရက်က ကတိပြုခဲ့ကြကြောင်း သိရသည်။
တရုတ်နိုင်ငံသည် ယူကရိန်းပဋိပက္ခတွင် ကြားနေနိုင်ငံအဖြစ် ရပ်တည်နေကြောင်း ပြောဆိုထားသော်လည်း ရုရှား၏ ကျူးကျော်တိုက်ခိုက်မှုကို ပြစ်တင်ရှုတ်ချရန် ငြင်းဆန်ခဲ့ခြင်းနှင့် ကုန်သွယ်မှု ဆက်လက်လုပ်ဆောင်ခြင်း ဖြင့် စစ်ပွဲကို သွယ်ဝိုက်သောနည်းဖြင့် ထောက်ပံ့ပေးနေသည်ဟု စွပ်စွဲပြောဆိုခံရကာ ပြစ်တင်ဝေဖန်ခြင်းများကို ခံခဲ့ရကြောင်းလည်း သိရသည်။
ကာ့တ်ကမ့်ဘဲလ်က "ဒီလိုမျိုးတွေ ဆက်ဖြစ်နေမယ်ဆိုရင် အမေရိကန်-တရုတ်ဆက်ဆံရေးအပေါ် သက်ရောက်မှု တွေ ရှိလာလိမ့်မယ်လို့ ကျွန်တော်တို့ပြောခဲ့ပါတယ်” ဟု ပြောခဲ့သည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
Miss Grand Thailand ပြိုင်ပွဲတွင် အလှမယ်တစ်ဦး ဝတ်ဆင်ခဲ့သော ကယန်းရိုးရာမှီငြမ်းဝတ်စုံနှင့်ပတ်သက်၍ တာဝန်ရှိသူများက ကန့်ကွက်သင့်ကြောင်း ယဉ်ကျေးမှုအမွေအနှစ်ဆိုင်ရာ ပညာရှင်တစ်ဦးအကြံပြု
RELATED POSTS
22 Sep 2024 | နိုင်ငံရေး,နိုင်ငံတကာ
22 Sep 2024 | နိုင်ငံရေး,နိုင်ငံတကာ
22 Sep 2024 | နိုင်ငံရေး,ပြည်တွင်း