Pika (NSS) - ဧပြီ ၁ဝ

ထိုင်ဝမ်ရွေးကောက်ခံသမ္မတ လိုင်ချန်တေးသည် အာဏာရဒီမိုကရက်တစ်ဖွံ့ဖြိုးတိုးတက်ရေးပါတီ (DPP) ၏ ဥက္ကဋ္ဌ ဟောင်းဖြစ်သူ Cho Jung-tai ကို ဝန်ကြီးချုပ်အသစ်အဖြစ် ဧပြီလ(၁၀)ရက်တွင် ခန့်အပ်လိုက်ကြောင်း သိရသည်။ 

ထို့အပြင် နိုင်ငံခြားရေးဝန်ကြီးကဲ့သို့သော အခြားရာထူးများအတွက် ခန့်အပ်မှုကို မကြာမီအချိန်အတွင်း ထုတ်ပြန် ကြေညာသွားမည်ဖြစ်ကြောင်း သိရသည်။ သို့သော်လည်း ဝန်ကြီးချုပ်အသစ် နှင့် ၎င်း၏ အစိုးရအဖွဲ့သည် လာမည့်မေလ(၂၀)ရက်တွင် ပြုလုပ်မည့် လိုင်ချန်တေး၏ ကျမ်းသစ္စာကျိန်ဆိုပွဲမတိုင်မီ ၎င်းတို့၏ အခန်းကဏ္ဍကို တာဝန်ယူမှုများ လုပ်ဆောင်မည်မဟုတ်သေးကြောင်း သိရသည်။

ထိုင်ဝမ်၏ အုပ်ချုပ်မှုစနစ်တွင် သမ္မတက ဝန်ကြီးချုပ်ကိုခန့်အပ်ပြီး အဆိုပါဝန်ကြီးချုပ်က သမ္မတထံမှ နောက်ဆုံး ခွင့်ပြုချက်ဖြင့် အစိုးရအဖွဲ့ဝင်များကို ခန့်အပ်ကြောင်း သိရသည်။ ထို့အပြင် ၎င်း၏ အခြားအစိုးရအဖွဲ့ဝင်များကို မကြာမီအချိန်အတွင်း ထုတ်ပြန်ကြေညာသွားမည်ဖြစ်ကြောင်း Cho Jung-tai က သတင်းထောက်များကို ပြောကြားခဲ့သည်။ 

Cho Jung-tai က ”ဒီတက်ကြွတဲ့အစိုးရအဖွဲ့ဟာ ပါတီဆက်နွယ်မှုတွေကို ခွဲခြားခြင်းမျိုးမရှိဘဲ သူတို့ရဲ့ အရည် အချင်းတွေအပေါ်အခြေခံပြီး လူတွေကို အသုံးပြုသွားမှာပါ။ပြီးတော့ အရင်ကလိုပဲ မျိုးဆက်သစ်လူငယ်တွေကို လေ့ကျင့်သင်ကြားပေးမှုတွေလုပ်ဆောင်ပေးတဲ့ ကောင်းမွန်တဲ့ ဒီမိုကရေစီစိတ်ဓါတ်တွေကို ဆက်လက်ကိုင်ဆောင် သွားမှာပါ” ဟု ပြောခဲ့သည်။ 

အမျိုးသားလုံခြုံရေးကောင်စီအထွေထွေအတွင်းရေးမှူးချုပ် Wellington Koo သည် စစ်တပ်တပ်မှူးဟောင်း Chiu Kuo-cheng ထံမှ ကာကွယ်ရေးဝန်ကြီးရာထူးကို လွှဲပြောင်းရယူသွားနိုင်ဖွယ်ရှိကြောင်း ထိုင်ဝမ်မီဒီယာများ က ဖော်ပြခဲ့သည်။

လက်ရှိထိုင်ဝမ်နိုင်ငံခြားရေးဝန်ကြီး ဂျိုးဆက်ဝူသည် အမျိုးသားလုံခြုံရေးကောင်စီ၏ အကြီးအကဲအဖြစ် Wellington Koo ၏ ရာထူးကို လက်ခံရယူသွားနိုင်ဖွယ်ရှိနေကြောင်း မီဒီယာများက ဖော်ပြခဲ့သည်။ ယခင်က ဥရောပသမဂ္ဂဆိုင်ရာထိုင်ဝမ်သံအမတ်ကြီးအဖြစ် တာဝန်ထမ်းဆောင်ခဲ့ဖူးသော အမျိုးသားလုံခြုံရေးဗျူရို၏ ညွှန်ကြားရေးမှူးချုပ် Tsai Ming-yen သည် ထောက်လှမ်းရေးအေဂျင်စီ၏ အကြီးအကဲအဖြစ် ဆက်ရှိနေလိမ့်မည် ဖြစ်ကြောင်းလည်း သိရသည်။