Pika (NSS) - ဧပြီ ၈

အမေရိကန်နိုင်ငံအနေဖြင့် နှစ်နိုင်ငံကြား ကုန်သွယ်မှုကို နိုင်ငံရေးသဘောအရ မလုပ်ဆောင်ရန် နှင့် ဈေးကွက်စီးပွားရေး၏ အခြေခံစံနှုန်းများကို လေးစားလိုက်နာရန် တရုတ်အစိုးရက တိုက်တွန်းခဲ့ကြောင်းသိရသည်။

တရုတ်ဝန်ကြီးချုပ် လီချန်း နှင့် အမေရိကန်ဘဏ္ဍာရေးဝန်ကြီး ဂျဲနက်ယဲလင်တို့သည် ဧပြီလ(၇)ရက်နေ့တွင် ဘေဂျင်းမြို့မှာ တွေ့ဆုံခဲ့ပြီးနောက် ယခုကဲ့သို့ တိုက်တွန်းမှုများထွက်ပေါ်လာခြင်းဖြစ်သည်။ နှစ်နိုင်ငံကြားဆက်ဆံရေးမှာ တည်ငြိမ်နေသော်လည်း ပြဿနာအများအပြားကို လက်ရှိအချိန်အထိ ဖြေရှင်းနိုင်ခြင်းမျိုးမရှိသေးကြောင်း လီချန်းနှင့်ဂျဲနက်ယဲလင်တို့ကပြောကြားခဲ့သည်။ ပြီးခဲ့သည့်နှစ် နိုဝင်ဘာလတွင် တရုတ်သမ္မတရှီကျင့်ဖျင်နှင့် အမေရိကန်သမ္မတ ဂျိုးဘိုင်ဒန်တို့ ကယ်လီဖိုးနီးယားပြည်နယ်တွင် တွေ့ဆုံခဲ့ပြီးနောက် ဂျဲနက်ယဲလင်၏ တရုတ်နိုင်ငံသို့ သွားရောက်လည်ပတ်သည့် ခရီးစဉ်ထွက်ပေါ်လာခြင်းဖြစ်သည်။

ဂျဲနက်ယဲလင်၏ ခရီးစဉ်အတွင်း နှစ်နိုင်ငံကြား ဆက်ဆံရေးတိုးတက်ကောင်းမွန်မှုများနှင့်ပတ်သက်ပြီး အကောင်းမြင်မှုများကို နှစ်ဘက်စလုံးက ထုတ်ဖော်ပြောဆိုခဲ့ကြသော်လည်း သိသာသော အောင်မြင်မှုရလဒ်များ ရရှိခဲ့ပုံမပေါ်ကြောင်းလည်း သိရသည်။ ဂျဲနက်ယဲလင်က 'နောက်ထပ်လုပ်စရာတွေ အများကြီးရှိနေပေမယ့်လည်း ပြီးခဲ့တဲ့နှစ်အတွင်းမှာ နှစ်နိုင်ငံကြားဆက်ဆံရေးကို ပိုမိုတည်ငြိမ်အောင်လုပ်ဆောင်နိုင်ခဲ့တယ်လို့ ကျွန်မယုံကြည်ပါတယ်'ဟုပြောဆိုခဲ့သည်။ ထို့ပြင် ဈေးကွက်စီးပွားရေး၏ အခြေခံစံနှုန်းများကို လိုက်နာရန် ဂျဲနက်ယဲလင်ကိုလီချန်းက တိုက်တွန်းခဲ့သဖြင့် တရုတ်နိုင်ငံသည် အမေရိကန်၏ကုန်သွယ်မှုအလေ့ အထများကို တရားမျှတမှုမရှိဟု ရှုမြင်နေပုံပေါ်သည်။ လီချန်းက 'အမေရိကန်နိုင်ငံဟာ စီးပွားရေးနဲ့ ကုန်သွယ်ရေးပြဿနာတွေကို နိုင်ငံရေး ဒါမှမဟုတ် လုံခြုံရေးပြဿနာတွေအဖြစ် ပြောင်းလဲခြင်းမှရှောင်ကြဥ်ပြီး တရားမျှတတဲ့ ယှဉ်ပြိုင်မှုနဲ့ ပွင့်လင်းတဲ့ ပူးပေါင်းဆောင်ရွက်မှုတွေ အပါအဝင် ဈေးကွက်စီးပွားရေးရဲ့ အခြေခံစံနှုန်းတွေကို လေးစားလိုက်နာမယ်လို့ ကျွန်တော်တို့ မျှော်လင့်ပါတယ်'ဟု ပြောဆိုခဲ့သည်။

ထို့ပြင် နှစ်နိုင်ငံကြား ဆက်ဆံရေးသည် ထိပ်တန်းခေါင်းဆောင်များ၏ လမ်းညွှန်မှုအောက်တွင် တည်ငြိမ်စပြုနေပြီဖြစ်ကြောင်း လီချန်းကထပ်မံပြောဆိုခဲ့သည်။ နောက်ဆုံးတွင် နှစ်နိုင်ငံစလုံးသည် ရန်ဘက်များဖြစ်လာမည့်အစား အပြန်အလှန်လေးစားမှု၊ ငြိမ်းချမ်းစွာ အတူယှဉ်တွဲနေထိုင်ရေး နှင့် win-win ပူးပေါင်းဆောင်ရွက်မှုတို့ဖြင့် မိတ်ဖက်နိုင်ငံများဖြစ်လာနိုင်မည်ဟု မျှော်လင့်မိကြောင်း လီချန်းက ထပ်မံပြောဆိုခဲ့သည်။