Pika (NSS) - ဧပြီ ၅

မြန်မာနိုင်ငံတွင် (၃)နှစ်ကျော်ကြာ ဖြစ်ပွားနေသော ပဋိပက္ခသည် နိုင်ငံတစ်ဝှမ်းရှိ ပြည်သူများအပေါ် ထိခိုက်စေခဲ့ကြောင်း ကုလသမဂ္ဂအကြီးတန်းအရာရှိနှစ်ဦးက ဧပြီလ(၄)ရက်နေ့က ကျင်းပသော လုံခြုံရေးကောင်စီအစည်းအဝေးတွင် ထည့်သွင်းပြောကြားခဲ့သည်။

မြန်မာနိုင်ငံတစ်ဝှမ်းတွင် ဖြစ်ပွားနေသော တိုက်ပွဲများကြောင့် လူမှုအသိုင်းအဝိုင်းများ၏ အခြေခံလိုအပ်ချက်များနှင့် မရှိမဖြစ်လိုအပ်သော ဝန်ဆောင်မှုများကို ဆုံးရှုံးခဲ့ရပြီး လူ့အခွင်အရေးနှင့် အခြေခံလွတ်လပ်ခွင့်များအပေါ် ဆိုးရွားသော သက်ရောက်မှုများရှိခဲ့ကြောင်း ကုလသမဂ္ဂ လက်ထောက်အထွေထွေအတွင်းရေးမှူးချုပ် Khalid Khiari က ပြောကြားခဲ့သည်။ အဆိုပါဆွေးနွေးပွဲသည် မြန်မာနိုင်ငံအရေးနှင့်ပတ်သက်ပြီး ကုလသမဂ္ဂလုံခြုံရေးကောင်စီ၏ ပထမဆုံးအကြိမ်ပြုလုပ်သော ပွင့်ပွင့်လင်းလင်း တွေ့ဆုံဆွေးနွေးမှုတစ်ခုဖြစ်သည်။ ထို့ပြင် မြန်မာနိုင်ငံသမ္မတဟောင်း ဦးဝင်းမြင့်၊နိုင်ငံတော်အတိုင်ပင်ခံပုဂ္ဂိုလ်ဟောင်း ဒေါ်အောင်ဆန်းစုကြည်နှင့် အကျဉ်းချခံထားရသော အခြားသူများကို လွှတ်ပေးရန် ကုလသမဂ္ဂအထွေထွေ အတွင်းရေးမှူးချုပ် အန်တိုနီယိုဂူတာရက်စ်က တောင်းဆိုခဲ့ကြောင်းလည်းသိရသည်။

မြန်မာနိုင်ငံ နယ်စပ်ဒေသများတွင် ဖြစ်ပွားနေသော ပဋိပက္ခများသည် နယ်စပ်ဖြတ်ကျော်လုံခြုံရေးကို အားနည်းစေပြီး တရားဥပဒေစိုးမိုးရေးပျက်ပြားမှုတို့ကြောင့် တရားမဝင်စီးပွားရေးလုပ်ငန်းများ ကြီးထွားလာမှုနှင့်အတူ မြန်မာနိုင်ငံ၏ အကျပ်အတည်းမှာ ဆက်လက်ပျံ့နှံ့နေဆဲဖြစ်ကြောင်း Khalid Khiari က ပြောကြားခဲ့သည်။ နယ်စပ်ဒေသများတွင် ကမ္ဘာလုံးဆိုင်ရာ ဆိုက်ဘာလိမ်လည်မှုလုပ်ငန်းများ လျင်မြန်စွာတိုးချဲ့လာမှုနှင့်အတူ လက်ရှိအချိန်တွင် မြန်မာနိုင်ငံသည် စိတ်ကြွဆေးနှင့် ဘိန်းထုတ်လုပ်မှုတို့၏ အဓိကအချက်အချာနေရာတစ်ခုဖြစ်လာကြောင်း Khalid Khiari က ထပ်မံပြောဆိုခဲ့သည်။ 

Khalid Khiari က 'ရှားပါးတဲ့ အသက်မွေးဝမ်းကျောင်း အခွင့်အလမ်းတွေနဲ့အတူ ရာဇဝတ်မှုဆိုင်ရာကွန်ရက်တွေဟာ အားနည်းတဲ့လူတွေအပေါ်မှာ အခွင့်ကောင်းယူတာတွေကို ဆက်လက်လုပ်ဆောင်နေပါတယ်။ ဒီကိစ္စတွေဟာ အရှေ့တောင်အာရှမှာ ဒေသတွင်းဆိုင်ရာ ရာဇဝတ်မှုခြိမ်းခြောက်မှုတစ်ခုအဖြစ် စတင်ခဲ့ပေမယ့်လည်း လက်ရှိအချိန်မှာတော့ ကမ္ဘာလုံးဆိုင်ရာ ဂယက်ရိုက်မှုတွေနဲ့အတူ လူကုန်ကူးမှုနဲ့ တရားမဝင်ကုန်သွယ်မှု အကျပ်အတည်းအထိ ဖြစ်လာပါပြီ'ဟု ပြောဆိုခဲ့သည်။  မြန်မာနိုင်ငံရှိ ပြည်သူများနှင့် စည်းလုံးညီညွတ်စွာ ရပ်တည်နေထိုင်ရန် ကုလသမဂ္ဂ၏ ကတိဝတ်ကို Khalid Khiari ကထောက်ခံခဲ့ကြောင်းလည်းသိရသည်။ မြန်မာနိုင်ငံနှင့်ပတ်သက်ပြီး နိုင်ငံတကာစည်းလုံးညီညွတ်မှုနှင့် ပံ့ပိုးကူညီပေးမှုများ ပိုမိုလုပ်ဆောင်ရန်လိုအပ်ကြောင်း Khalid Khiari ကအလေးပေးပြောကြားခဲ့သည်။ မြန်မာနိုင်ငံအရေးနှင့်ပတ်သက်ပြီး ကုလသမဂ္ဂသည် အာဆီယံအပြင် အခြားပါဝင်ပတ်သက်သူအားလုံးနှင့် တက်ကြွစွာလက်တွဲလုပ်ဆောင်သွားမည်ဖြစ်ကြောင်း Khalid Khiari က ပြောဆိုခဲ့သည်။ ၎င်းက 'မြန်မာနိုင်ငံအရေးဟာ ကာလရှည်ကြာအကျပ်အတည်းတစ်ခုဖြစ်လာတာနဲ့အမျှ နိုင်ငံတကာက စည်းလုံးညီညွတ်တဲ့ တုံ့ပြန်မှုတစ်ခုလုပ်ဖို့ ကုလသမဂ္ဂအထွေထွေအတွင်းရေးမှူးချုပ်က တောင်းဆိုထားပါတယ်။ပြီးတော့ နိုင်ငံတကာစည်းမျဉ်းတွေနဲ့အတူ လူသားချင်းစာနာထောက်ထားမှုဆိုင်ရာ လမ်း ကြောင်းတွေ ဖွင့်ပေးဖို့အတွက် သူတို့ရဲ့ ဩဇာလွှမ်းမိုးမှုတွေကို အသုံးပြုဖို့ အိမ်နီးချင်းနိုင်ငံတွေကို တိုက်တွန်းထားပါတယ်။ အကြမ်းဖက်မှုတွေကို အဆုံးသတ်ပြီး မြန်မာနိုင်ငံအတွက် အားလုံးပါဝင်တဲ့ ငြိမ်းချမ်းတဲ့အနာဂတ်ကို ဦးတည်စေမယ့် ပြီးပြည့်စုံတဲ့နိုင်ငံရေးအဖြေကို ရှာဖို့လည်း တိုက်တွန်းထားပါတယ်'ဟု ပြောဆိုခဲ့သည်။