ALynn (NSS) - မတ် ၂ဝ 

မတ်လ ၁၉ ရက် (အင်္ဂါနေ့) က အမေရိကန်တရားလွှတ်တော်ချုပ်ရုံးက တက္ကဆက်ပြည်နယ်အတွင်း တရားမဝင် ဝင်ရောက်သည့် သံသယရှိသူများကို ပြည်နယ်အရာရှိများက ဖမ်းဆီးချုပ်နှောင်ခွင့်ပြုသည့် အငြင်းပွားဖွယ် လူဝင်မှုကြီးကြပ်ရေးဥပဒေကို ချက်ချင်းစတင် ပြဋ္ဌာန်းဖို့ ပြုလုပ်ခဲ့ပါသည်။ 

သို့သော် တရားရုံး၏ လစ်ဘရယ် သုံးဦးကမူ ၎င်းဥပဒေအား ကန့်ကွက်ခဲ့သည်။ ၎င်းဥပဒေနှင့်ပတ်သက်၍ ပြည်နယ် အယူခံတရားရုံးတွင် ဥပဒေဆိုင်ရာ စိန်ခေါ်မှုများ ဆက်လက်ဖြစ်ပေါ်နေသော်လည်း တရားလွှတ်တော်ချုပ်၏ အဆိုပါဆုံးဖြတ်ချက်ကြောင့် လူဝင်မှုကြီးကြပ်ရေးဥပဒေသည် သမ္မတဘိုင်ဒင်၏သဘောထားနှင့် ဆန့်ကျင်နေသည့် တိုင်အောင် ယခုအခါအသက်ဝင်လာခဲ့ပြီဖြစ်သည်။ 

အထက်လွှတ်တော်ဥပဒေကြမ်းအမှတ် ၄ (SB 4) သည် တက္ကဆက်ပြည်နယ်အုပ်ချုပ်ရေးမှူး Greg Abbott က ဒီဇင်ဘာလတွင် လက်မှတ်ရေးထိုးခြင်းဖြင့် ပြည်နယ်တရားသူကြီးများသည် တရားမဝင် ရွှေ့ပြောင်းလာသူများကို ပြည်နှင်ဒဏ်ပေးခွင့်ရှိလာသည်။ ယေဘုယျအားဖြင့် လူဝင်မှုကြီးကြပ်ရေးကိစ္စရပ်များသည် ပြည်နယ်အစိုးရ၏ လုပ်ပိုင်ခွင့်ထဲတွင် ပါဝင်နေသည်။ ရွှေ့ပြောင်းသူထောက်ခံရေးသမားများက ၎င်းဥပဒေနှင့်ပတ်သက်၍ စိုးရိမ်မှုများ မြင့်တက်လာပြီး ရွှေ့ပြောင်းသူ ၄၀ ရာခိုင်နှုန်းမှာ လက်တင်လူမျိုးများဖြစ်ကြောင်း သိရသည်။ 

ဘိုင်ဒင်အစိုးရ၊ ရွှေ့ပြောင်းမှုထောက်ခံရေးအဖွဲ့နှစ်ဖွဲ့ နှင့် El Paso ကောင်တီတို့သည် လူဝင်မှုကြီးကြပ် ရေးဥပဒေကို စိန်ခေါ်လျက်ရှိသည်။ အုပ်ချုပ်ရေးဆိုင်ရာရှေ့နေများက အဆိုပါဥပဒေသည် အမေရိကန်နှင့် အခြားသောပြည်နယ်များကြားရှိ နှစ်ပေါင်း ၁၅ဝ နီးပါးရှိပြီဖြစ်သော လူဝင်မှုကြီးကြပ်ရေးအနေအထားများကို အကြီးအကျယ်ပြောင်းလဲသွားစေမည်ဟု ထောက်ပြခဲ့သည်။ 

တက္ကဆက်ရှိ ဥပဒေအရာရှိအချို့သည် တရားလွှတ်တော်ချုပ်၏ ဆုံးဖြတ်ချက်ကို သတိထား ဆောင်ရွက်နေရပြီး SB 4 သည် ယခင်ကတည်းက တင်းမာနေသောစနစ်တစ်ခုကို ပိုမိုဆိုးရွားစေနိုင်ကြောင်း CNN အား မှတ်ချက်ပြုခဲ့သည်။