Iris (NSS) - မတ် ၁၉ 

မြို့နယ်အသီးသီးမှ စစ်မှုထမ်းနိုင်မည့်ပုဂ္ဂိုလ်များကို စစ်မှုထမ်းဥပဒေအရ ကျန်းမာရေးစစ်ဆေး၍ စာရင်းသွင်းခြင်း လုပ်ငန်းစဉ်များ ယခုလကုန်ပိုင်း၌ စတင်သွားတော့မည်ဖြစ်ကြောင်း သတင်းရရှိသည်။ စစ်မှုထမ်းရန် အရည်အချင်း ပြည့်ဝမှု ရှိ/မရှိ ရွေးချယ်သည့်ကိစ္စ၏ ကနဦး စီမံချက်အဖြစ် မြန်မာပြည်အလယ်ပိုင်းရှိ မြို့နယ်အများအပြားကို မတ်လ(၂၇) ရက်မှ ဧပြီလ(၃)ရက်အတွင်း အပြီးသတ် လုပ်ဆောင်သွားရန် တပ်မတော်တွင်း ညွှန်ကြားချက်များ စတင် ထွက်ရှိနေပြီဖြစ်ကြောင်း ကြားသိနေရသည်။ 

‘တစ်နိုင်ငံလုံး လူ(၆၀ဝဝ)ခေါ်မယ်လို့ သိထားတယ်။ အဲဒီအထဲကနေ (၅၀ဝဝ)ကိုပဲ ပြန်ရွေးမှာ။ ရွာတွေ၊ ရပ်ကွက် တွေထဲက အလုပ်အကိုင်မရှိဘဲ လေလွင့်နေတဲ့သူတွေကို ဦးစားပေးခေါ်မယ်လို့ ကြားတယ်။ ဆေးစစ်မယ့်အဖွဲ့ကို လည်း အရပ်ဘက် ဆရာဝန်တွေ မသုံးဘူး။ စစ်တပ်ဘက်က စစ်ဆေးဆရာဝန်တွေကိုပဲ သုံးမယ်လို့ သိထားတယ်’ ဟု  NP News ၏ သတင်းရင်းမြစ်က ပြောသည်။ 

အချို့သော မြို့နယ်များတွင် ကျန်းမာရေးဆေးစစ်ခြင်းအတွက် သက်ဆိုင်ရာမြို့နယ်၏ အရပ်ဘက်ဆရာဝန်များက တာဝန်ယူချင်ကြောင်း အသံများထွက်ပေါ်ပေးနေသော်လည်း စစ်ဆေးရေးအဖွဲ့ဘက်ကမူ မသမာမှုများ ဖြစ်လာနိုင် သည်ဟု တွက်ဆ၍ တပ်မတော်ဘက်မှ ဆရာဝန်များ ကိုသာ သုံးစွဲစေခြင်းမျိုးဖြစ်မည်ဟု ဆိုသည်။ 

“မိတ္ထီလာ စစ်ဆေးရုံဆိုရင် မြို့နယ်(၁၃)မြို့နယ်ကို တာဝန်ယူပြီး စစ်ဆေးပေးရမယ်။ သူက ကုတင် (၅၀ဝ) ဆေးရုံရှိ တာကြောင့်။ ဝါဇီတို့ ချောက်တို့ ဆိုရင် ငါးမြို့နယ်လောက်ပဲ ရှိတယ်။ ဆေးစစ်မှု အောင်မြင်မှ စစ်မှုထမ်းဖို့ ကိစ္စက စာရင်းသွင်းမှာလို့ သိရတယ်” ဟု သတင်းရင်းမြစ်က ပြောသည်။

လက်ရှိအချိန်အထိ စုစည်းရရှိထားသော သတင်းအချက်အလက်များအရ မတ်လ(၂၇)ရက်မှ စတင်၍ တစ်နိုင်ငံလုံး ကျန်းမာရေးစစ်ဆေးမည်ဟု နားလည်သဘောပေါက်ရမည်မဟုတ်ဘဲ မြန်မာပြည် အလယ်ပိုင်းရှိ မြို့နယ်အများ အပြားတွင်သာ ကနဦး စတင်မည့် သဘောမျိုး ဖြစ်နေသည်။ 

စစ်မှုထမ်းဆောင်ရန် အရည်အချင်းပြည့်မီမှု ရှိ-မရှိ ကျန်းမာရေးစစ်ဆေးမှုကို မတ်လ(၂၇)ရက်မှ ဧပြီလ(၃)ရက် အထိ လုပ်ဆောင်သွားမည်ဟု လတ်တလော သတ်မှတ်ထားသော်လည်း ဖြစ်ပေါ်လာသည့်အခြေအနေအပေါ် မူတည်၍ သတ်မှတ်ရက် ရှေ့တိုးခြင်း၊ နောက်ဆုတ်ခြင်းများလည်းဖြစ်နိုင်ကြောင်း ကြားသိရသည်။ စစ်မှုမထမ်း မနေရဥပဒေကို စတင်ကျင့်သုံးမည်ဟု နိုင်ငံတော်စီမံအုပ်ချုပ်ရေးကောင်စီက ဖေဖော်ဝါရီ (၁၀)ရက်တွင် အတိအလင်းထုတ်ပြန်ခဲ့ပြီးသည့်နောက် နိုင်ငံတစ်ဝန်းမှ လူ့အသိုင်းအဝိုင်းအသီးသီးက ပုံစံမျိုးစုံဖြင့် ထောက်ခံခြင်း၊ ကန့်ကွက်ခြင်းများ ပြသခဲ့ကြသည်ကို တွေ့ရသည်။ 

နစက၏ ပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းနှင့် နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်တို့က နှစ်ဦးပေါင်း (၁၀) ကြိမ်ထက်မနည်း ပြန်လည်ရှင်းပြခဲ့ရပြီး ယနေ့ထိတိုင်(မတ်လ ၉ ရက်) လူထုနားလည်မှု မလွဲစေ ရန် အခြားသောနည်းလမ်းများစွာဖြင့် ရှင်းပြနေရသည်။ 

“စစ်မှုထမ်းဖို့ ဥပဒေက ကောင်းတယ်၊ ရှိသင့်တယ် ဆိုပေမယ့် ကြေညာလိုက်တဲ့အချိန်အခါက မသင့်ဘူးလို့ ယူဆတယ်။ ဒါကြောင့်လည်း လူထုကြားမှာ ရိုက်ခတ်မှု အတော်ပြင်းသွားတယ်။ တပ်တွင်းစည်းလုံးမှုကို အရင် တည်ဆောက်ပြီး ကျစ်လျစ်ခိုင်မာ သွား မှသာ ဒီဥပဒေကို ကျင့်သုံးသင့်တယ်လို့ မြင်တယ်” ဟု တပ်မတော်အငြိမ်းစားဗိုလ်ချုပ်တစ်ဦးကလည်း ၎င်း၏ အမြင်ကို သုံးသပ်ပြောကြားသည်။ 

နစကဘက်က ရည်မှန်းခဲ့သော စစ်မှုမထမ်းမနေရ ဥပဒေကျင့်သုံးခြင်းသည် ပြည်သူလူထုကို စိတ်ပင်ပန်းဆင်းရဲမှု ဖြစ်စေရန် မဟုတ်ခဲ့သော်လည်း ပြည်ပြေးမီဒီယာများ၏ ခြောက်လုံးလှန့်လုံးများ၊ ဝါဒဖြန့်ချိမှုများကြောင့် ပြည်တွင်းနေ လူငယ်များစွာနှင့် မိဘ မိသားစု များစွာ၏ စိုးရိမ်ကြောင့်ကြမှုများ ဖြစ်ပေါ်ခဲ့သည်မှာ အမှန်ပင် ဖြစ်နေသည်။ ဥပဒေအရ စစ်မှုထမ်းရမည့် လူငယ် မျိုးဆက်မှာလည်း ပျမ်းမျှအားဖြင့် တစ်နှစ်လျှင် တစ်ရပ်ကွက် နှစ်ဦးထက်မပိုသော နှုန်းထားမျိုးဖြစ်နေပြီး စစ်မြေပြင်သို့ အတင်းအကျပ်ပို့ဆောင်ခြင်းများ လုပ်ဆောင်မည် မဟုတ်ကြောင်း ရှင်းလင်းချက်များအရသိရသည်။ 

အထူးသဖြင့် မိမိနေထိုင်ရာ ဒေသ၏ လုံခြုံရေးအတွက် ပြန်လည်တာဝန် ထမ်းဆောင် ရမည့် သဘောမျိုးသာ အဓိက ရည်ရွယ်ထားသော အရန်တပ်ဖွဲ့စည်းမှု ပုံစံငယ်တစ်ခုသာ ဖြစ်နိုင်ကြောင်းလည်း သုံးသပ်ရမည်ဖြစ်နေသည်။