ရောင်နီ (NSS) - မတ် ၁၅

တောင်ကိုရီးယားနိုင်ငံ၊ ဂျယ်ဂျူပြည်နယ်အစိုးရဟာ ၎င်းရဲ့အပတ်စဉ် YouTube ပရိုဂရမ်အတွက် သတင်းကြေညာသူကို တစ်လ ဝမ် 600,000 (ဒေါ်လာ 450) နဲ့သာ ငှားရမ်းခဲ့ပါတယ်။  

အဲဒါကတော့ ကွန်ပျူတာနဲ့ ဖန်တီးထားတဲ့ အမျိုးသမီး တင်ဆက်သူဖြစ်ပြီး၊ ကျွန်းမှ မူဝါဒ အပ်ဒိတ်တွေနဲ့ ဒေသဆိုင်ရာသတင်းတွေကို AI နဲ့ ဖတ်ရှု ကြေညာပေးပါတယ်။

အဆိုပါပရိုဂရမ်ကို ပုဂ္ဂလိက ကန်ထရိုက်တာ ကုမ္ပဏီတစ်ခုမှ တီထွင် စီမံခန့်ခွဲခြင်းဖြစ်ပြီး ဒီအတွက် ကုန်ကျစရိတ်ကတော့ တစ်လကို ဝမ် ၆၀၀,၀၀၀ သာ ရှိတယ်လို့ သိရသည်။ 

အခြား လူသား သတင်းတင်ဆက်သူတွေကို ခန့်အပ်ခြင်းဟာ ကုန်ကျစရိတ်ကြီးမားတာကြောင့် J-na လို့ အမည်ပေးထားတဲ့ AI သတင်းကြေညာသူကို ရွေးချယ်ခဲ့တယ်လို့ ဂျယ်ဂျူ တာဝန်ရှိသူတစ်ဦးက ပြောကြားခဲ့ပါတယ်။ 

J-na ဆိုတဲ့ အမည်ဟာ "Jeju၊” “News” နဲ့ "AI” တို့ရဲ့ အစစာလုံးတွေ ပေါင်းစပ်ရာမှ ဆင်းသက်လာခြင်းဖြစ်ပါတယ်။

 ပြည်နယ်ရဲ့တရားဝင် YouTube ချန်နယ်နဲ့ ၎င်းရဲ့ဝဘ်ဆိုဒ်မှ ထုတ်လွှင့်တဲ့ "Weekly Jeju” ရဲ့ မတ်လ ၈ ရက် ထုတ်လွှင့်တဲ့အပိုင်းမှာ အပြာရောင် ဝတ်စုံဝတ်ထားတဲ့ J-na ဟာ သဘာဝကျကျ သတင်းဖတ်နေခဲ့ပါတယ်။ 

ဒါပေမယ့် ဒါဟာ တောင်ကိုရီးယားမှာ ပထမဆုံးအကြိမ် AI သတင်းတင်ဆက်သူကို မိတ်ဆက်လာခြင်း မဟုတ်ပါဘူး။ ၂၀၂၀ ပြည့်နှစ် နိုဝင်ဘာလ ၆ ရက်ကလည်း MBN ဟာ လူသားသတင်းတင်ဆက်သူ ကင်ဂျိုဟာနဲ့ ပုံတူ AI သတင်းတင်ဆက်သူကို အသုံးပြုကာ သတင်းကြေညာခဲ့ဖူးပါတယ်။ 

၂၀၂၃ ခုနှစ် စက်တင်ဘာလငလည်း သတင်းချန်နယ် YTN မှာ အမျိုးသားတစ်ဦးနဲ့ အမျိုးသမီးတစ်ဦးကို ကိုယ်စားပြုသည့် AI သတင်းတင်ဆက်သူ Y-Go နဲ့ Y-On တို့ကို မိတ်ဆက်ပေးခဲ့ဖူးပါတယ်။