ဂျန်ဇက် (NSS) - မတ် ၁၅ 

ရုရှားနိုင်ငံတွင် သမ္မတရွေးကောက်ပွဲကို မတ်လ ၁၅ ရက်တွင် စတင်ကျင်းပလိုက်ပြီး ရုရှား ပြည်သူများ လာရောက်မဲပေးခဲ့ကြောင်း သိရသည်။ 

ရုရှားနိုင်ငံတွင် ကျင်းပသည့် ရွေးကောက်ပွဲကို ပွင့်လင်းမြင်သာမှုရှိစေရန်အတွက် သုံးရက်ကြာ ကျင်းပမည်ဖြစ်ရာ မဲပေးမှုများက မတ်လ ၁၇ ရက်တွင် ပြီးဆုံးမည်ဖြစ်သည်။ ရုရှားသမ္မတရွေးကောက်ပွဲကို လက်ရှိသမ္မတပူတင် အပါအဝင် ကိုယ်စားလှယ်လောင်းလေးဦး ယှဉ်ပြိုင်မည်ဖြစ်ပြီး သမ္မတသက်တမ်းက ခြောက်နှစ်ဖြစ်ကြောင်း သိရသည်။ 

သမ္မတပူတင်သည် သမ္မတရွေးကောက်ပွဲတွင် တစ်သီးပုဂ္ဂလိက ကိုယ်စားလှယ်အဖြစ် ပါဝင်ယှဉ်ပြိုင်မည်ဖြစ် ပြီး၂ဝ၂ဝ ပြည့်နှစ်တွင် သမ္မတကို ၆ နှစ်ကြာ တာဝန်ထမ်းဆောင်ခွင့်ပြုမည့်အချက်ကို ဖွဲ့စည်းပုံအခြေခံဥပဒေတွင် ပြန်လည်ပြင်ဆင်ပြောင်းလဲပြီးနောက် သမ္မတရွေးကောက်ပွဲကို ပထမဆုံးအကြိမ် ကျင်းပခြင်းဖြစ်သည်။

အဆိုပါ သမ္မတရွေးကောက်ပွဲကို ရုရှားနိုင်ငံအတွင်းရှိ အသက်ပြည့်သူအားလုံး မဲပေးရမည်ဖြစ်သလို အွန်လိုင်းမှ တဆင့် မဲပေးခွင့်ပြုပေးထားကြောင်း သိရသည်။ အွန်လိုင်းမှတဆင့် မဲပေးမည့်သူများသည် ရုရှားအစိုးရထံတွင် အွန်လိုင်းမှတဆင့် မဲပေးမည့်အကြောင်းကို ကြိုတင်ခွင့်ပြုချက်တောင်းခံရမည်ဖြစ်ကြောင်း သိရသည်။ 

ထို့ပြင် ရုရှားသမ္မတ ရွေးကောက်ပွဲမတိုင်ခင် ကြိုတင်မဲပေးခြင်းစနစ်ကိုလည်း ခွင့်ပြုထားပြီး ရုရှားနိုင်ငံ၏ ကျေးလက်မြို့စွန့်များတွင် ကြိုတင်မဲပေးမှုစနစ်ကို လုပ်ဆောင်ခဲ့ကြောင်း သိရသည်။ ရုရှားနိုင်ငံတွင် ကျင်းပနေ သည့် သမ္မတရွေးကောက်ပွဲတွင် တစ်သီးပုဂ္ဂလိက ပါဝင်ယှဉ်ပြိုင်နေသည့် လက်ရှိသမ္မတ ပူတင်အနိုင်ရရန် အလားလာများနေကြောင်း ခန့်မှန်းချက်များလည်း ထွက်ပေါ်နေသည်။ ရုရှားရွေးကောက်ပွဲကော်မရှင်က မတ်လ ၁၅ ရက်တွင် စတင်ခဲ့သော သမ္မတရွေးကောက်ပွဲကို နိုင်ငံအတွင်းရှိ မဲပေးခွင့်ရှိသူ လူပေါင်း ၇၁ ရာခိုင်နှုန်းကျော် မဲပေးမည်ဟု ခန့်မှန်းထားသည်။