Pika (NSS) - မတ် ၉

အစ္စရေးအစိုးရသည် မြေပြင်မှ ဂါဇာကမ်းမြောင်ဒေသသို့ပေးပို့သည့် အကူအညီများကို ပိတ်ဆို့ထားနိုင်သောကြောင့် အမေရိကန်စစ်တပ်က ဂါဇာကမ်းရိုးတန်းတွင် ယာယီဆိပ်ကမ်းတစ်ခုကို တည်ဆောက်သွားမည်ဖြစ်ပြီး လိုအပ် သောအကူအညီများအားလုံးကို ပေးအပ်သွားမည်ဖြစ်ကြောင်း အမေရိကန်သမ္မတဂျိုးဘိုင်ဒန်က မတ်လ (၇)ရက်တွင် ထုတ်ပြန်ကြေညာခဲ့သည်။

ထို့အပြင် ပိတ်ဆို့ခံထားရသော ဂါဇာကမ်းမြောင်ဒေသသို့ နောက်ထပ်အကူအညီများ ပိုမိုဝင်ရောက်ခွင့်ပြုရန် အစ္စရေးအစိုးရကို ဂျိုးဘိုင်ဒန်က တောင်းဆိုခဲ့ကြောင်းလည်း သိရသည်။ ဂျိုးဘိုင်ဒန်က "ဂါဇာကမ်းရိုးတန်းမှာ စားနပ်ရိက္ခာ၊ သောက်ရေ၊ ဆေးဝါးတွေ နဲ့ ယာယီအမိုးအကာတွေ သယ်ဆောင်ထားတဲ့သင်္ဘောတွေ လက်ခံနိုင်တဲ့ ယာယီဆိပ်ကမ်းတစ်ခုတည်ဆောက်ဖို့အတွက် အရေးပေါ်မစ်ရှင်ကို ဦးဆောင်ဖို့ အမေရိကန်စစ်တပ်ကို ကျွန်တော် ညွှန်ကြားနေပါတယ်။ ဒီယာယီဆိပ်ကမ်းဟာ ဂါဇာကမ်းမြောင်ဒေသမှာ လူသားချင်းစာနာထောက်ထားမှုဆိုင်ရာ အကူအညီတွေရရှိမှုကို ပိုမိုတိုးမြင့်လာစေမှာပါ" ဟု ပြောခဲ့သည်။

အဆိုပါအစီအစဉ်ကို အမေရိကန်စစ်တပ်ကဦးဆောင်မည်ဖြစ်သော်လည်း ဂါဇာကမ်းမြောင်ဒေသတွင် အမေရိကန် တပ်ဖွဲ့ဝင်များ ထားရှိမည်မဟုတ်ကြောင်း ဂျိုးဘိုင်ဒန်က ထပ်မံပြောခဲ့သည်။ အမေရိကန်အစိုးရက အစ္စရေး နှင့် ညှိနှိုင်းမှုများ လုပ်ဆောင်ကာ ဂါဇာကမ်းမြောင်ဒေသသို့ အကူအညီများကို ရက်ပေါင်းများစွာ ပေးအပ်ခဲ့ပြီးနောက် အဆိုပါယာယီဆိပ်ကမ်း တည်ဆောက်မည့် အစီအစဉ်ထွက်ပေါ်လာခြင်းဖြစ်သည်။ 

ဂျိုးဘိုင်ဒန်က "အစ္စရေးရဲ့ခေါင်းဆောင်ပိုင်းကို ကျွန်တော်ပြောချင်တာကတော့ လူသားချင်းစာနာထောက်ထားမှု ဆိုင်ရာအကူအညီတွေကို သဘောတူညီချက်တွေပြုလုပ်ဖို့ ကြိုးပမ်းရာမှာ အားသာချက်တစ်ခုအဖြစ် အသုံးမပြု သင့်ပါဘူး။ အပြစ်မဲ့ပြည်သူတွေရဲ့အသက်တွေကို ကာကွယ်ရေးနဲ့ ကယ်ဆယ်ရေးဟာ အဓိကဦးစားပေး ဖြစ်ရပါမယ်" ဟု ပြောခဲ့သည်။

ပြီးခဲ့သည့်နှစ် အောက်တိုဘာလ(၇)ရက်တွင် ဟားမက်လက်နက်ကိုင်အဖွဲ့က အစ္စရေးကို ဒုံးကျည်များဖြင့် ပစ်ခတ် တိုက်ခိုက်ခဲ့ပြီးနောက် အစ္စရေး-ဟားမက်စစ်ပွဲစတင်ဖြစ်ပွားခဲ့ခြင်းဖြစ်သည်။ ဟားမက်လက်နက်ကိုင်အဖွဲ့၏ တိုက်ခိုက်မှုများကြောင့် အစ္စရေးနိုင်ငံသား(၁၂၀၀)ကျော် သေဆုံးခဲ့ပြီး၊ အခြားလူ(၂၅၃)ဦးမှာ ဓါးစာခံအဖြစ် ဖမ်းဆီး ခေါ်ဆောင်သွားခြင်းကို ခံခဲ့ရကြောင်းလည်း သိရသည်။

ထို့နောက် အစ္စရေးဘက်မှ လက်တုံ့ပြန်တိုက်ခိုက်မှုများ လုပ်ဆောင်ခဲ့ရာ လက်ရှိအချိန်အထိ ပါလက်စတိုင်းလူမျိုး (၃)သောင်းကျော် သေဆုံးခဲ့ကြောင်း ပါလက်စတိုင်းကျန်းမာရေးဝန်ကြီးဌာန၏ ထုတ်ပြန်ချက်များအရ သိရသည်။