Pika (NSS) - ‌မတ် ၂

အမေရိကန် နှင့် ၎င်း၏မိတ်ဖက်နိုင်ငံများသည် ရုရှား၏ပြည်ပရှိပိုင်ဆိုင်မှုများကို သိမ်းယူမည့်အစီအစဉ်များအား ကျောထောက် နောက်ခံပြုမည့် ခိုင်မာသော တရားဥပဒေဆိုင်ရာ အကြောင်းပြုချက်များကို ဆက်လက်ရှာဖွေသွားမည်ဖြစ်ကြောင်း အမေရိကန်ဘဏ္ဍာဝန်ကြီး ဂျဲနက်ယဲလင်က ထုတ်ဖော်ပြောဆိုခဲ့သည်။

ဘရာဇီးလ်နိုင်ငံတွင် ပြုလုပ်သည့် G20 အဖွဲ့၏ ဘဏ္ဍာရေးဝန် ကြီးများ တွေ့ဆုံဆွေးနွေးပွဲအပြီးတွင် ဂျဲနက်ယဲလင်က ယခု ကဲ့သို့ ထုတ်ဖော်ပြောဆိုခဲ့ခြင်းဖြစ်သည်။ အဆိုပါဆွေးနွေးပွဲအတွင်း ရုရှား၏ ရန်ပုံငွေများကို အသုံးပြုကာ ယူကရိန်းသို့အကူ အညီများ ပေးပို့ရန်အစီအစဉ်ကို ဂျဲနက်ယဲလင်က ထုတ်ပြန်ပြောဆိုခဲ့သော်လည်း အောင်မြင်မှုမရရှိခဲ့ကြောင်းသိရသည်။ ထို့ပြင် ရုရှား၏ပြည်ပရှိပိုင်ဆိုင်မှုများကို သိမ်းယူရန်အတွက် ခိုင်မာသော ဥပဒေမူဘောင်တစ်ခုလိုအပ်မည်ဖြစ်ကြောင်း ဂျဲနက်ယဲလင်က ထပ်မံပြောဆိုခဲ့သည်။

ရုရှား၏ပိုင်ဆိုင်မှုများကို သိမ်းယူခြင်းက မဖြစ်နိုင်ကြောင်း ဥရောပသမဂ္ဂအဖွဲ့ဝင်နိုင်ငံအချို့က ပြောဆိုမှုများရှိနေသော်လည်း ချေးငွေအတွက် အပေါင်ခံပစ္စည်းအဖြစ် ရန်ပုံငွေများကို အသုံးပြုခြင်းကဲ့သို့သော နည်းလမ်းများဖြင့် ရုရှားဗဟိုဘဏ်ပိုင်ဆိုင်သည့် အမေရိကန်ဒေါ်လာ(၃၀၀)ဘီလျံကို သိမ်းယူနိုင်မည့် နည်းလမ်း များရှိကြောင်း ဂျဲနက်ယဲလင်က ပြောဆိုခဲ့သည်။ ဂျဲနက်ယဲလင်က "ဒီမှာ ရှုပ်ထွေးတဲ့ဥပဒေပြဿနာတွေရှိတယ်။ ဘာပဲလုပ်လုပ် ခိုင်မာတဲ့ နိုင်ငံတကာတရားဥပဒေနဲ့ အကြောင်းပြချက်တွေ ရှိရမယ်ဆိုတာကို ကျွန်မတို့နားလည်ပါတယ်"ဟု ပြောဆိုခဲ့သည်။

အမေရိကန်နှင့်ဗြိတိန်တို့သည် ရုရှား၏ပိုင်ဆိုင်မှုများကို သိမ်းယူရန်အတွက် တွန်းအားပေးလုပ်ဆောင်နေသော်လည်း အဆိုပါလုပ်ရပ်ကြောင့် ဥပဒေနှင့်ဘဏ္ဍာရေးဆိုင်ရာ ဂယက်ရိုက်ခတ်မှုများရှိလာနိုင်ကြောင်း ဥရောပသမဂ္ဂက သတိပေးပြောဆိုထား သည်။ ဘရာဇီးလ်နိုင်ငံတွင် ဖေဖော်ဝါရီလ(၂၈)ရက်က လုပ် ဆောင်ခဲ့သော အစည်းအဝေးတွင် ပြင်သစ်ဘဏ္ဍာရေးဝန်ကြီး Bruno Le Maire သည် ဂျဲနက်ယဲလင်၏ပြောဆိုချက်များကို မေးခွန်းထုတ်ခဲ့ကြောင်းလည်းသိရသည်။

ထို့ပြင် လက်ရှိအချိန်တွင် ရုရှား၏ပိုင်ဆိုင်မှုများကို သိမ်းယူရန်အတွက် အနောက်အုပ်စုနိုင်ငံများတွင် ခိုင်မာသောဥပဒေမူဘောင် မရှိကြောင်း Bruno Le Maireကပြောဆိုခဲ့သည်။သို့သော်လည်း ဥရောပသမဂ္ဂသည် ရုရှား၏ပိုင်ဆိုင်မှုများကို သိမ်းယူရန်အတွက် တရားဝင်ခြေလှမ်းများကို ရှာဖွေနေကြောင်း ဂျာမနီဘဏ္ဍာရေးဝန်ကြီး Christian Lindner က ပြန်လည်တုံ့ပြန်ပြောကြားခဲ့သည်။ ရုရှား၏ပိုင်ဆိုင်မှုများကို သိမ်းယူခြင်းသည် ဘဏ္ဍာရေးတည်ငြိမ်မှုကို ထိခိုက်စေနိုင်သည့်အပြင် အရန်ငွေကြေးအဖြစ် ယူရို၏အဆင့်အတန်းအပေါ် ယုံကြည်မှုများကို ပျက်ပြားသွားစေနိုင်သည်ဆိုသည့် အချက်ကို အများစုက စိုးရိမ်နေကြောင်း ပြင်သစ်၊ ဂျာမနီ နှင့် ဥရောပဗဟိုဘဏ်တို့က ထုတ် ဖော်ပြောဆိုခဲ့သည်။