ဂျန်ဇက် (NSS) - မတ် ၂

အမေရိကန်ကာကွယ်ရေးဝန်ကြီးလွိုင်အော်စတင်က ရုရှားနှင့် နေတိုးမဟာမိတ်အုပ်စုကြား တိုက်ရိုက်စစ်ပွဲဖြစ်လာ နိုင်ဖွယ်ရှိနေသည့်အတွက် နေတိုးအဖွဲ့တွင် ပါဝင်နေသော ဥရောပအရှေ့ပိုင်းရှိနိုင်ငံများအနေဖြင့် ရုရှားနှင့် တိုက်ခိုက်ရန် ပြင်ဆင်ရထားရမည်ဖြစ်ကြောင်း သတိပေးပြောဆိုလိုက်သည်။

ရုရှားသည် ယူကရိန်းတပ်ဖွဲ့များကို အနိုင်ရပြီးနောက် ကျူးကျော်မှုများကို ရပ်တန့်မည်မဟုတ်ကြောင်း၊ အမေရိကန် ကာကွယ်ရေးဝန်ကြီးက အမေရိကန်လွှတ်တော်၏ လက်နက်ကိုင်ဝန်ဆောင်မှုကော်မတီကြားနားပွဲတွင် ထည့်သွင်း ပြောခဲ့ခြင်းဖြစ်ကြောင်း သိရသည်။

အမေရိကန်လွှတ်တော်အမတ်များအနေဖြင့် ယူကရိန်းစစ်ပွဲနှင့်ပတ်သက်ပြီး ကူညီထောက်ပံ့ပေးနိုင်ရန် ဘတ်ဂျက် ငွေကြေးများကို ထပ်မံကူညီထောက်ပံ့ပေးစေလိုကြောင်း၊ ဝန်ကြီးလွိုင်အော်စတင်က ထပ်မံပြောခဲ့သည်။ 

အမေရိကန်ကာကွယ်ရေးဝန်ကြီးက "ဘော်တစ်နိုင်ငံတွေဟာ လက်ရှိအချိန်မှာ စိုးရိမ်ရမယ့်အခြေအနေမျိုးဖြစ်နေ တယ်။ ယူကရိန်းဟာ စစ်ပွဲမှာ ရှုံးနိမ့်ခဲ့မယ်ဆိုရင် နေတိုးအဖွဲ့ဟာ ရုရှားနဲ့စစ်ပွဲဆင်နွှဲရဖွယ်ရှိတယ်လို့ ယုံကြည်ထား ပါတယ်။ ကမ္ဘာတဝှမ်းမှာရှိနေတဲ့အခြားအာဏာရှင်နိုင်ငံတွေဟာ ဒီအခြေနေတွေကိုစောင့်ကြည့်နေတယ်။ အဲဒီ အာဏာရှင်နိုင်ငံတွေအတွက် အခြေအနေတွေက အားတက်ဖွယ်ရှိနေပါတယ်။  လက်ရှိဖြစ်ပွားနေတဲ့အခြေနေတွေ ကြောင့် အနောက်အုပ်စုနိုင်ငံတွေဟာ ဒီမိုကရေစီဖွံ့ဖြိုးတိုးတက်စေဖို့  ပိုမိုပံ့ပိုးကူညီပေးတာမျိုး မလုပ်နိုင်ဘူး" ဟု ပြောသည်။

အမေရိကန်သည် ယူကရိန်းနှင့် ရုရှားစစ်ပွဲစတင်ခဲ့ပြီးနောက်ပိုင်းတည်းက ယူကရိန်းကို စစ်လက်နက် ပစ္စည်းများကူညီထောက်ပံ့ပေးခဲ့ပြီးလက်ရှိအချိန်တွင်လည်း ယူကရိန်းကို ထပ်မံကူညီထောက်ပံ့ပေးနိုင်ရန် ကြိုးပမ်းနေရာ အမေရိကန်လွှတ်တော်၏ ဟန့်တားခြင်းကို ရင်ဆိုင်နေရကြောင်း သိရသည်။

ယူကရိန်းသမ္မတ ဇီလန်စကီးကတော့ အမေရိကန်နိုင်ငံ၏ ကူညီထောက်ပံ့ပေးမှုများ ထပ်မံမရဘူးဆိုလျှင် ယူကရိန်း အနေဖြင့် စစ်ရှုံးရဖွယ်ရှိနေကြောင်း ပြီးခဲ့သောသီတင်းပတ်အတွင်း ပြောခဲ့သည်။ အမေရိကန်သည် ယူကရိန်းကို အမေရိကန်ဒေါ်လာ ၆၀ ဘီလျံတန်ဖိုးရှိ စစ်လက်နက်ပစ္စည်းများ ကူညီထောက်ပံ့ပေးနိုင်ရန် ရည်ရွယ်ထားပြီး၊ လက်ရှိအချိန်တွင် ယခင်ကူညီရန်ကတိပြုထားသော အမေရိကန်ဒေါ်လာ ၄ ဘီလျံတန်ဖိုးရှိ စစ်လက်နက်ပစ္စည်း များကူညီပေးရန် စီစဉ်နေကြောင်း သိရသည်။ 

ယူကရိန်းကို စစ်လက်နက်ပစ္စည်းများကူညီထောက်ပံ့ပေးခြင်းနှင့်ပတ်သက်ပြီး ရုရှားအစိုးရက အနောက်အုပ်စုနိုင်ငံ များကို ဝေဖန်ပြစ်တင်ထားပြီး စစ်ပွဲအချိန်ပိုကြာအောင် လုပ်ဆောင်နေခြင်းဖြစ်ကြောင်း ဝေဖန်ပြစ်တင်ထားသည်။