မြူနစ် (NSS) - ဖေဖော်ဝါရီလ ၂၄ 

  ရှမ်းပြည်နယ်အရှေ့ပိုင်း တာချီလိတ်မြို့ရှိ အွန်လိုင်းငွေလိမ်ဂိုဏ်းကို လုံခြုံရေးအဖွဲ့ ဝင်ရောက်စီးနင်းခဲ့ပြီး ထိုင်းနိုင်ငံသားများစွာနှင့်အတူ လူ(၇၀ဝ)ခန့်ကို ဖမ်းဆီးထိန်းသိမ်းထားကြောင်း သတင်း ရရှိသည်။

နစက၏ လုံခြုံရေးပူးပေါင်းအဖွဲ့သည် ဖေဖော်ဝါရီလ ၂၃ ရက် နံနက်အစောပိုင်းမှ စတင်ကာ တာချီလိတ်မြို့ ဆန်ဆိုင်း(ခ)ရပ်ကွက် တိုးနယားလမ်း ခြံဝင်းအတွင်းရှိ အွန်လိုင်းငွေလိမ်ဂိုဏ်းကို ဝင်ရောက်စီးနင်းခဲ့ခြင်း ဖြစ်သည်။

“ဝင်ရောက်စီးနင်းတာက မှန်ပါတယ်။ အများဆုံးဖမ်းမိတာက ထိုင်းနိုင်ငံသားတွေ များပါတယ်။ ရာကျော်လောက် ရှိပါတယ်။ ဒါပေမဲ့ နောက်ထပ်ဖမ်းမိတဲ့အထဲမှာ တရုတ်နိုင်ငံသားက နည်းပါတယ်။ လက်ချိုးရေလို့ ရပါတယ်။ ပြီးတော့ ကွန်ပျူတာနဲ့ဆက်စပ်ပစ္စည်းတွေလည်း အများအပြား ဖမ်းဆီးရရှိထားပါတယ်” ဟု အထက်ပါအွန်လိုင်း ငွေလိမ်ဂိုဏ်းကို ဝင်ရောက်စီးနင်းသော လုံခြုံရေး အဖွဲ့နှင့်နီးစပ်သူက NP News ကို ပြောသည်။

 လုံခြုံရေးပူးပေါင်းအဖွဲ့သည် အထက်ပါခြံဝန်းအတွင်းရှိ (၃)ထပ်တိုက်အဆောက်အအုံ နှစ်လုံး၊ (၂)ထပ်တိုက် အဆောက်အအုံ သုံးလုံးကို ဝင်ရောက်စီး နင်းခဲ့ခြင်းဖြစ်ကြောင်း သိရသည်။ အဆိုပါအွန်လိုင်းငွေလိမ်ဂိုဏ်းကို ဝင်ရောက်စီးနင်းစဉ် ထိုင်းနိုင်ငံသား အမျိုးသား (၇၅)ဦး၊ အမျိုးသမီး (၇၃)ဦး၊ တရုတ်နိုင်ငံသားတစ်ဦးနှင့် မြန်မာ နိုင်ငံသား (၅၄၀)ဦး စုစုပေါင်း (၆၈၈)ဦးကို ဖမ်းဆီးရမိခဲ့ကြောင်း သိရသည်။

ထို့ပြင် ကွန်ပျူတာအလုံး (၄၀ဝ)၊ မီးခံသေတ္တာ (၁၁)လုံး၊ ဖုန်း၊ ကား၊ ဆိုင်ကယ်နှင့် အခြားသော ဆက်စပ်ပစ္စည်း များစွာကို သိမ်းဆည်းရရှိခဲ့ပြီး လက်ရှိတွင် လိုအပ်သော စစ်ဆေးရေးလုပ်ငန်းများကို ထပ်မံလုပ်ဆောင်နေကြောင်း သိရသည်။ တာချီလိတ်မြို့ရှိ အွန်လိုင်းငွေလိမ်ဂိုဏ်းကို မြန်မာ၊ ထိုင်း၊ တရုတ် (၃)နိုင်ငံပူးပေါင်းကာ စစ်ဆင်ရေးပြုလုပ်ခြင်းဖြစ်နိုင် ကြောင်းလည်း အွန်လိုင်းငွေလိမ်လုပ်ငန်းများ ကျက်စားရာဒေသတွင် နေထိုင်သော လုပ်ငန်းရှင်က NP News ကို သုံးသပ်ပြောကြားသည်။

“တကယ်လုပ်တာပါ။ တရုတ်ကရှာခိုင်းတဲ့ သူတို့ပစ်မှတ်တွေကို လိုက်ရှာတာ။ တရုတ်ကတော့ အတိအကျ Position ပေးတယ်လေ။ ဘယ်နေရာမှာ ရှိတယ်ဆိုပြီးတော့ပေါ့။ အရင်ဆုံး တာချီလိတ်ကို သွေးတိုးစမ်း ကြည့်တာပေါ့။ (၃)နိုင်ငံပေါင်းပြီးတော့ မြန်မာရယ်၊ ထိုင်းရယ်၊ တရုတ်ရယ်ပေါ့။ အဲဒါကို ရရင်တော့ သူတို့ ရွှေကုက္ကိုလုပ်မယ့်သဘောရှိတယ်” ဟု အထက်ပါလုပ်ငန်းရှင်က ပြောသည်။

မြန်မာ၊ တရုတ်၊ ထိုင်းနယ်စပ်ဒေသများတွင် ကျားဖြန့်ဟုခေါ်ဆိုသော အွန်လိုင်းလိမ်လည်မှုများ၊ အွန်လိုင်း လောင်း ကစားလုပ်ငန်းများကို ကျယ်ပြန့်စွာပြုလုပ်နေလျက်ရှိပြီး ယင်းလုပ်ငန်းများကို (၃)နိုင်ငံ ပူးပေါင်း၍ ထိရောက်စွာ နှိမ်နင်းရန် ဆောင်ရွက်နေကြောင်း နစကဘက်က ယခင်ကာလများ၌ ပြောဆိုခဲ့ဖူးသည်။

အဆိုပါ အွန်လိုင်းလိမ်လည်မှုလုပ်ငန်းများတွင် တရုတ်နိုင်ငံသားအများစု ပါဝင်လုပ်ကိုင်နေလျက်ရှိသည့်အပြင် ထိုင်း နှင့် အခြားနိုင်ငံသားများလည်း ပါဝင်ဆောင်ရွက်နေကြောင်းနှင့် ၎င်းတို့ကို လက်နက်ကိုင်အဖွဲ့များက အကာ အကွယ်ပေးနေကြောင်းလည်း သိရသည်။ အဆိုပါ နိုင်ငံသားများသည် မြန်မာနိုင်ငံ၏ နယ်စပ်ဒေသများသို့ တရားမဝင် ဝင်ရောက်နေထိုင်ကာ အွန်လိုင်းလိမ်လည်မှု လုပ် ငန်းများတွင် ပါဝင်ပတ်သက်နေခြင်းဖြစ်ကြောင်း သိရသည်။

မြန်မာနိုင်ငံအတွင်းသို့ တရားမဝင် ဝင်ရောက်နေ ထိုင်သည့် နိုင်ငံခြားသား (၅၀ဝဝဝ)ကျော်ကို ၂၀၂၃ ခုနှစ် အောက်တိုဘာလ ၅ ရက်မှစ၍ ၂၀၂၄ ခုနှစ် ဇန်နဝါရီလ ၂၉ ရက်အတွင်း ဖမ်းဆီးထိန်းသိမ်းနိုင်ခဲ့ပြီး ၎င်းတို့ကို သက်ဆိုင်ရာနိုင်ငံများထံသို့ ပြန်လည် လွှဲပြောင်းပေးထားကြောင်း သိရသည်။