သန့်ဇင် (NSS) - ဖေဖော်ဝါရီ ၁၇

မြန်မာနိုင်ငံကိုယ်စားပြု သံမဏိစိုးလင်းဦးနှင့် သန့်ဇင်တို့သည် One Championship ၏ ပွဲဦးထွက်ပွဲစဉ်များတွင် ပြိုင်ဘက်များကို အလဲထိုးအနိုင်ယူကာ ဆုကြေးဘတ်ငွေသုံးသိန်းခွဲစီ ရရှိခဲ့ကြောင်း သိရသည်။

၎င်းတို့(၂)ဦးပါဝင်သည့် One Championship ၏ One Championship One Friday Fight) ပွဲစဥ်များကို ယမန်နေ့(ဖေဖော်ဝါရီလ ၁၆ ရက်)တွင် ထိုင်းနိုင်ငံ၊ ဘန်ကောက်မြို့ Lumpinee boxing stadium ၌ ကျင်းပပြုလုပ်ခဲ့ခြင်း ဖြစ်သည်။

မြန်မာနိုင်ငံကိုယ်စားပြု သံမဏိစိုးလင်းဦးအနေဖြင့် ပဏာမလျာထားချက်တွင် အီတလီဖိုက်တာ နှင့် ထိုးသတ်ရန်စီစဉ်ထားပြီးနောက် အီတလီဖိုက်တာ၏ ဆေးစစ်ချက် မအောင်မြင်မှုကြောင့် ယခုပွဲစဉ်၌ ဂျပန်ဖိုက်တာနှင့် ပြောင်းရွှေ့ထိုးသတ်ခဲ့ရခြင်းဖြစ်သည်။

အဆိုပါပွဲစဉ်တွင်လည်း သံမဏိစိုးလင်းဦးသည် ဂျပန်ဖိုက်တာ MASAYOSHI YSYHASHI ကို တတိယအချီ၌ အပိုင်ထိုးကွက်များဖြင့် အနိုင်ရယူနိုင်ခဲ့ခြင်း ဖြစ်သည်။ ထို့ပြင် မြန်မာနိုင်ငံကိုယ်စားပြု လူငယ်ဖိုက်တာ သန့်ဇင်သည်လည်း One Championship နှင့်အတူ၎င်း၏ ပွဲဦးထွက်ပွဲစဉ်ကို ထိုင်းဖိုက်တာ JAISING နှင့်ယှဉ်ပြိုင်ထိုးသတ်ခဲ့ရပြီး ဒုတိယအချီ၌ ပြိုင်ဘက်အား ဘယ်ညာဝိုက်လက်သီး(၂)ချက်ဖြင့်အပိုင်ထိုးကာ အနိုင်ရယူနိုင်ခဲ့ခြင်း ဖြစ်သည်။

ထို့ကြောင့် မြန်မာနိုင်ငံကိုယ်စားပြု သံမဏိစိုးလင်းဦးနှင့် သန့်ဇင်တို့(၂)ဦးသည် One Championship ကချီးမြှင့်သည့် အလဲထိုးဆုကြေးငွေ ထိုင်းဘတ်ငွေ (၃)သိန်းခွဲစီရရှိခဲ့ပြီး မြန်မာဖိုက်တာများ၏ စွမ်းဆောင်ရှည်ကို ထုတ်ဖော်ပြနိုင်ခဲ့သည့် အမှတ်တရပွဲစဉ်များ ဖြစ်ခဲ့ပေသည်။