ရောင်နီ (NP News) - မတ် ၂၅ 

စပိန်နိုင်ငံမှာ သောကြာနေ့ (မတ်လ ၂၄ ရက်)က နှစ်တစ်နှစ်ရဲ့ ပထမဆုံး တောမီးလောင်ကျွမ်းမှုဖြစ်ပွားခဲ့ပါတယ်။ 

တောမီးလောင်ကျွမ်းမှုက အရှေ့ပိုင်း ဗလင်စီဒေသရှိ သစ်တော ဟက်တာ ၃ဝဝဝ (၇၄၁၃ ဧက)ကျော်ကို ပျက်စီးစေခဲ့ပြီး ဒေသခံ ၁၅ဝဝ ခန့် ၎င်းတို့ နေအိမ်များကို စွန့်ခွာထွက်ပြေးခဲ့ရကြောင်း အာဏာပိုင်များက ပြောကြားခဲ့ပါတယ်။ 

ဥရာပတိုက် တောင်ဘက်ပိုင်း ဒေသများမှာ ပုံမှန်မဟုတ်တဲ့ ခြောက်သွေ့သော ဆောင်းရာသီ ပုံစံကြောင့် မြေဆီလွှာ အစိုဓာတ်လျော့နည်းလာပြီး ၂ဝ၂၂ ခုနှစ်က ဥရောပရဲ့ တောမီးလောင်ကျွမ်းမှုမှာ ဟက်တာ  ၇၈၅ဝဝဝ ဖျက်ဆီးခံရသည့်နောက် ဒေသတွင်း ယင်းဖြစ်ရပ်မျိုး ထပ်ခါတလဲလဲဖြစ်မှာကို စိုးရိမ်မှုများ တိုးလာခဲ့ပါတယ်။ "အထူးသဖြင့် ဒီနှစ်အစောပိုင်းမှာ ကျွန်တော်တို့ တွေ့နေရတဲ့ မီးလောင်မှုတွေဟာ လူသားတွေ ဖြတ်သန်းနေရတဲ့ ရာသီဥတု အရေးပေါ် အခြေအနေရဲ့ သက်သေဖြစ်ပြီး၊ အထူးသဖြင့် ကျွန်တော်တို့လို နိုင်ငံတွေကို ထိခိုက်ပျက်စီးစေပါတယ်" လို့ စပိန်ဝန်ကြီးချုပ် ပီဒရိုဆန်ချက် က သတင်းစာရှင်းလင်းပွဲမှာ ပြောကြားခဲ့ပါတယ်။ 

စပိန်မှာ ယမန်နှစ်က မီးလောင်ကျွမ်းမှု (၄၉၃) ကြိမ်ဖြစ်ပွားခဲ့ပြီး စံချိန်တင် ဟက်တာ (၃ဝ၇ဝဝဝ) ခန့် မီးလောင်ပျက်စီးကြောင်း ကော်မရှင်ရဲ့ ဥရောပ တောမီး သတင်းအချက်အလက်စနစ်အရ သိရပါတယ်။ ယခုတောမီးလောင်မှုဖြစ်ပွားနေတဲ့ ဗလင်စီယာဒေသရှိ ဗီလန်နျူအီဗာ ဒဲဗီဗာ ရွာအနီးမှာ မီးငြှိမ်းသတ်ဖို့အတွက် လေယာဉ် (၁၈) စင်းနဲ့ ရဟတ်ယာဉ် (၁၈) စင်း အပါအဝင် မီးသတ်သမား (၅ဝဝ) ကျော်က သောကြာနေ့ညက ညလုံးပေါက် ကြိုးစားခဲ့ရကြောင်း သိရပါတယ်။ ရပ်ရွာရှစ်ခုကို ဘေးလွတ်ရာသို့ ရွှေ့ပြောင်းပေးခဲ့ကြောင်း ဒေသတွင်းရေးရာ အကြီးအကဲ ဂါဘရစ်လာဘရာဗိုက ပြောကြားခဲ့ပါတယ်။ 

စပိန်ဟာ ပျမ်းမျှမိုးရေချိန်ထက် နိမ့်ပါးတဲ့ သုံးနှစ်အကြာ ရေရှည်မိုးခေါင်မှုနဲ့ ရင်ဆိုင်နေရပါတယ်။ စပိန်နိုင်ငံ အရှေ့မြောက်ပိုင်း မြေထဲပင်လယ်ကမ်းရိုးတန်းတစ်လျှောက်မှာ ယခုနွေဦးရာသီမှာ ပုံမှန်ထက် ပိုမိုခြောက်သွေ့ပြီး ပူပြင်းလာကာ တောမီးလောင်ကျွမ်းမှု အန္တရာယ်ကို တိုးလာစေတယ်လို့ မိုးလေဝသ အေဂျင်စီ AEMET က ပြီးခဲ့တဲ့ သီတင်းပတ်က ပြောကြားခဲ့ပါတယ်။ 

သဘာဝ ပတ်ဝန်းကျင်ဝန်ကြီး တီရီဆာရီဘီရာက "ရာသီပြင်ပ မီးလောင်ကျွမ်းမှု" များ ပို အဖြစ်များလာကြောင်းပြောကြားခဲ့ပါတယ်။ "နွေရာသီက ပိုကြာရှည်လာတယ်၊ စောစောရောက်လာတယ်၊ မြေဆီလွှာမှာ ရေနဲ့ စိုထိုင်းဆတွေ လျော့သွားတဲ့အတွက် ကံမကောင်းစွာနဲ့ပဲ ကျွန်တော်တို့ကို ပိုပြီး ထိခိုက်လွယ်စေတယ်" လို့ သူမက ပြောကြားခဲ့ပါတယ်။ 

ယခုလအတွင်း ဥရောပကော်မရှင်ရဲ့ အစီရင်ခံစာတစ်ခုအရ ဆောင်းရာသီအတွင်း မိုးရွာသွန်းမှုနဲ့ ပုံမှန်ထက် ပူနွေးသောအပူချိန်များကြောင့်  စပိန်တောင်ပိုင်း၊ ပြင်သစ်၊ အိုင်ယာလန်၊ ဗြိတိန်၊ မြောက်ပိုင်း၊ အီတလီ၊ ဂရိနဲ့ ဥရောပအရှေ့ပိုင်းရှိ အစိတ်အပိုင်းများအတွက် မိုးခေါင်ရေရှားမှု သတိပေးချက်များ မြင့်တက်လာခဲ့ပါတယ်။ ဂရိနိုင်ငံရဲ့ ဆောင်းရာသီဟာ ဆယ်စုနှစ်တစ်ခုကျော်အတွင်း ၎င်းရဲ့မြောက်ပိုင်း ဒေသများအတွက် အပူဆုံးဖြစ်လာကြောင်း အေသင်အမျိုးသားစောင့်ကြည့် လေ့လာရေး ဌာနမှ ပြောကြားခဲ့ပါတယ်။ မိုးရွာသွန်းမှုမရှိခြင်းနဲ့ မြေစိုထိုင်းဆကျဆင်းခြင်းဟာ အပူလှိုင်းများ ရှိပါက တောမီးပျံ့နှံ့မှုကို အထောက်အကူဖြစ်စေခဲ့တယ်လို့ သိရပါတယ်။