မျိုးကြီး (NP News) - မတ် ၂၅

မြန်မာ- တရုတ် အပြန်အလှန် လျှပ်စစ်ဓာတ်အား ဝယ်ယူနိုင်မည့် နယ်စပ်ဖြတ်လျှပ်စစ်ဓာတ်အား သွယ်တန်းခြင်း စီမံကိန်းကို ၂ဝ၂၄ ခုနှစ်၌ ပြီးစီးရန် ကြိုးပမ်းနေကြောင်း သတင်းရရှိသည်။

လျှပ်စစ်စွမ်းအားဝန်ကြီးဦးသောင်းဟန် ဦးဆောင်သောအဖွဲ့သည် မတ်လ ၁၇ ရက်မှ ၂၂ ရက်အထိ တရုတ်နိုင်ငံ၏ လျှပ်စစ်ဓာတ်အားထုတ်လုပ်နေမှုများကို သွားရောက်လေ့လာခဲ့ပြီး တာဝန်ရှိသူများနှင့်တွေ့ဆုံဆွေးနွေးခဲ့ကြောင်း နစကဘက်မှ ထုတ်ပြန်ထားသည်။

ဝန်ကြီးဦးသောင်းဟန် ဦးဆောင်သောအဖွဲ့သည် တရုတ်နိုင်ငံ အမျိုးသားစွမ်းအင်စီမံအုပ်ချုပ်ရေးအဖွဲ့(NEA)၏ ဒုတိယ ဥက္ကဋ္ဌ မစ္စတာရန်ဂျင်းဒန် ဦးဆောင်သောအဖွဲ့ တွေ့ဆုံဆွေးနွေးခဲ့ကြောင်း သိရသည်။

ထိုသို့တွေ့ဆုံစဉ် လျှပ်စစ်ဓာတ်အားလိုအပ်ချက်ကို ဖြည့်ဆည်းနိုင်ရန်အတွက် မြန်မာနိုင်ငံ၌ အများဆုံးဖြစ်သော ရေအားလျှပ်စစ်စီမံကိန်းများကို ထုတ်လုပ်ဆောင်ရွက်ရန်လိုအပ်ကြောင်း NEA ဒုဥက္ကဋ္ဌ မစ္စတာရန်ဂျင်းဒန်က အကြံပြုခဲ့သည်။

ထို့ပြင် တရုတ်-မြန်မာနယ်စပ်ဖြတ်ကျော်ဆောင်ရွက်လျက်ရှိသည့် လျှပ်စစ်ဓာတ်အားသွယ်တန်းခြင်းစီမံကိန်း များကိုလည်း အမြန်ဆုံးအကောင်အထည်ဖော်ဆောင်ရွက်သွားရန်လည်း NEA ဒုဥက္ကဋ္ဌက တိုက်တွန်းထားသည်။

၎င်းနယ်စပ်ဖြတ်ကျော်စီမံကိန်းသည် နောင်တစ်ချိန်တွင် မြန်မာနိုင်ငံမှ လျှပ်စစ်ဓာတ်အားလိုအပ်ပါက ရောင်းချနိုင်ရန်ဖြစ်ပြီး ပိုမိုထုတ်လုပ်နိုင်ချိန်တွင် ပြန်လည်ဝယ်ယူရန် ရည်ရွယ်ချက်ဖြင့် ဆောင်ရွက်ခဲ့ခြင်း ဖြစ်ကြောင်း မစ္စတာရန်ဂျင်းဒန်က ဆိုသည်။

အဆိုပါတရုတ်ခရီးစဉ်အတွင်း ဝန်ကြီးဦးသောင်းဟန်က တရုတ်-မြန်မာနယ်စပ်ဖြတ်ကျော် လျှပ်စစ်ဓာတ်အားသွယ်တန်း ခြင်းလုပ်ငန်းများကိုလည်း ၂၀၂၄ ခုနှစ်တွင် ရရှိစေရန် ကြိုးပမ်းဆောင်ရွက်လျက်ရှိပြီး လိုအပ်မှုများကို တရုတ်နိုင်ငံဘက်မှ ဆက်လက်ကူညီပံ့ပိုးပေးရန် တောင်းဆိုခဲ့ကြောင်း သိရသည်။

မြန်မာနိုင်ငံတွင် ၂၀၃၀ ပြည့်နှစ်၌ တစ်နိုင်ငံလုံး လျှပ်စစ်ဓာတ်အားရရှိရန် Master Plan ကို ရေးဆွဲထားပြီးဖြစ်သော်လည်း နှစ်အလိုက်ထုတ်လုပ်မှုနှင့်သုံးစွဲမှု မမျှတမှုကြောင့် လျှပ်စစ်ဓာတ်အားလိုအပ် လျက်ရှိကြောင်း လျှပ်စစ်စွမ်းအားဝန်ကြီးက ပြောသည်။

ထို့ပြင် မြန်မာနိုင်ငံ၌ ရေအား၊ နေရောင်ခြင်၊ လေအားနှင့် လျှပ်စစ်ဓာတ်အားထုတ်လုပ်နိုင်ရန် အရင်းအမြစ်များ ရှိပြီးဖြစ် သည့်အတွက် တရုတ်နိုင်ငံရင်းနှီးမြှုပ်နှံသူများအနေဖြင့် ထပ်မံကာ လာရောက်လုပ်ကိုင်ရန်လည်း ဝန်ကြီးဦးသောင်းဟန်က ဖိတ်ခေါ်ခဲ့သည်။

မြန်မာနိုင်ငံရှိ ရွှေလီ(၁)ရေအားလျှပ်စစ်စီမံကိန်းအား လျှပ်စစ်စွမ်းအားဝန်ကြီးဌာနနှင့် တရုတ်နိုင်ငံ ဟွာနန်း လန်းချန်းကုမ္ပဏီတို့ ပူးပေါင်းဆောင်ရွက်လျက်ရှိကြောင်း သိရသည်။

ထို့ပြင် တရုတ်နိုင်ငံရှိ ရေအားလျှပ်စစ်စက်ရုံစီမံကိန်းများအတွက် ပစ္စည်းများပေးသွင်းနေပြီး လေအား လျှပ်စစ်စီမံကိန်း ထုတ်လုပ်လျက်ရှိသည့် YEIG ကုမ္ပဏီ၊ နေရောင်ခြည်စွမ်းအင်သုံးစက်ရုံစီမံကိန်းများ ဆောင်ရွက် နေသည့် ခီဒီးကုမ္ပဏီ၊ ဓာတ်အားပို့လွှတ်ရေးစီမံကိန်းများတွင် ဆောင်ရွက်နေသည့် China Southern Power Grid ကုမ္ပဏီ၊ ရေအားလျှပ်စစ်စီမံကိန်းများဆောင်ရွက်နေသော SPIC ကုမ္ပဏီ၊ Datang ကုမ္ပဏီ၊ CEEC ကုမ္ပဏီ၊ State Grid ကုမ္ပဏီတို့နှင့် လျှပ်စစ်စွမ်းအားဝန်ကြီးဌာနအကြား လုပ်ငန်းများ ပူးပေါင်းဆောင်ရွက်နေကြောင်း သိရသည်။