ယွန်း (NSS) - ဖေဖော်ဝါရီလ - ၁၄ 

     တရုတ်နှင့် ပူးပေါင်း၍ (၉)နှစ်စီမံကိန်းဖြင့် ဆောင်ရွက်သွားမည့် သဗ္ဗညုဘုရားကြီး ပြုပြင်ထိန်းသိမ်းရေး လုပ်ငန်းများကို မကြာမီလပိုင်းအတွင်း စတင်နိုင်ရန် လျာထားကြောင်း ပုဂံရှေးဟောင်း သုတေသနဌာန ညွှန်ကြားရေးမှူးထံမှ သိရသည်။

   ပြီးခဲ့သည့် ၂၀၁၆ ခုနှစ်  ဩဂုတ်လ(၂၄)ရက်တွင် လှုပ်ခတ်ခဲ့သော ငလျင်ဒဏ်ကြောင့် ထိခိုက်ပျက်စီးခဲ့ သည့် သဗ္ဗညုဘုရားကြီးအား ပြန်လည်ပြုပြင်ရေး အတွက် တရုတ်နိုင်ငံမှပညာရှင်များက ပြုပြင်ရေး အစီအစဉ်များကို သက်ဆိုင်ရာသို့တင်ပြထားပြီးဖြစ်ကြောင်း သိရသည်။ မူလက ဘုရားကြီး၏ ပြင်ဆင်မှု လုပ်ငန်းများကို  ယခု ဖေဖော်ဝါရီလတွင် စတင်နိုင်ရန် အကြမ်းဖျင်းသတ်မှတ်ထားခဲ့သော်လည်း အကြောင်း အမျိုးမျိုးကြောင့် လက်ရှိအချိန်အထိ လုပ်ငန်းများစတင်နိုင်ခြင်းမရှိသေးကြောင်း သိရသည်။

“သူတို့နဲ့ပြောထားတာကတော့ ဖေဖော်ဝါရီလ လောက် စနိုင်အောင်တော့ ဆောင်ရွက်မယ်လို့အ ကြမ်းဖျင်းသိထားပါတယ်။ လောလောဆယ်တော့ စတင်နိုင်ခြင်းမရှိသေးပါဘူး။ ကြိုတင်ပြင်ဆင်တဲ့ အပိုင်းလေးတွေကိုတော့ သူတို့ဘက်ကဆောင်ရွက်နေတာရှိပါတယ်။ သူတို့ဘက်ကလည်း ဒီဘက်က ဖြစ်စေချင်တဲ့အတိုင်းကို ဆောင်ရွက်နိုင်အောင် ကြိုးစားပြီးတော့ လုပ်ပါ့မယ်လို့တော့ ပြောပါတယ်။ အခုလက်ရှိအခြေအနေအရတော့ သူတို့လည်း မရောက်လာသေးဘူးပေါ့”ဟု ပုဂံရှေးဟောင်း သုတေသနဌာန ညွှန်ကြားရေးမှူး ဦးမြင့်သန်းက NP News ကို ပြောသည်။

   လက်ရှိတွင် မြန်မာနိုင်ငံဘက်မှ တာဝန်ရှိသူများ အနေဖြင့် သဗ္ဗညုဘုရားကြီး ပြန်လည်ပြုပြင်နိုင်ရေးကို ဆောလျင်စွာစတင်ရန် ဆန္ဒရှိနေပြီး မကြာမီလပိုင်း အတွင်း စတင်နိုင်ရန်လျာထားကြောင်း ညွှန်ကြား ရေးမှူး ဦးမြင့်သန်းက ဆက်လက်ပြောသည်။

    “ကျွန်တော်တို့ဘက်ကလည်း စောစော စတင်ချင်ပါတယ်။ လုပ်ငန်းတွေကိုစောစော စတင် နိုင်အောင် တောင်းဆိုထားတာရှိပါတယ်။ မကြာခင် စတင်နိုင်မယ်လို့တော့ ပြောလို့ရတယ်။ ဒါပေမဲ့ အချိန် အတိုင်းအတာအရတော့ ပြောဖို့ခက်တယ်။ ကျွန် တော်ထင်တာကတော့ (၄)လပိုင်းထက်တော့ နောက် မကျဘူးလို့တော့ ထင်ပါတယ်။ ဒီနှစ်ထဲမှာတော့ လုပ်သွားမှာပါ။ သူတို့ဘက်မှာကျတော့ ကျွန်တော်တို့ နိုင်ငံလိုပဲ သွားဖို့လာဖို့ပြင်ရမယ်။ ဘတ်ဂျက်ငွေ တောင်းရမယ်။ ဒီဇိုင်းတွေဘာတွေ အတည်ပြုချက် တွေယူရမယ်။ အဲဒီလိုမျိုးတွေလည်းရှိဦးမှာပေါ့။ အဲဒါတွေ ပြီးမှ ဒီဘက်ကိုဆင်းလာနိုင်မှာပါ” ဟု ၎င်းကပြောသည်။

    အဆိုပါ စီမံကိန်းကို တရုတ်နိုင်ငံနှင့် ပူးပေါင်း၍ (၉)နှစ်စီမံကိန်းဖြင့် ဆောင်ရွက်သွားမည်ဖြစ်ပြီး  တရုတ်-မြန်မာ နှစ်ဦးနှစ်ဖက်အကြား သဗ္ဗညုဘုရား ပြုပြင်ထိန်းသိမ်းရေးစာလွှာကို (၂၀၁၈) ခုနှစ် စက် တင်ဘာလ (၂၂)ရက်တွင် လက်မှတ်ရေးထိုးခဲ့၍ (၂၀၁၉) ခုနှစ် ဧပြီလတွင် သဗ္ဗညုဘုရား အရေးပေါ် ပြုပြင်ထိန်းသိမ်းမှုများဆောင်ရွက်ခဲ့ကြောင်း သိရသည်။ သဗ္ဗညုဘုရားအား ပြန်လည်ပြုပြင်မှု များဆောင်ရွက်ရာတွင် မြေအောက်အမွေအနှစ်များ အား ထိခိုက်မှုအနည်းဆုံးဖြစ်အောင် စီမံဆောင်ရွက် ထားကြောင်း သိရသည်။

   ပြီးခဲ့သည့် (၂၀၁၆) ခုနှစ် ဩဂုတ်လအတွင်းက မြန်မာနိုင်ငံအလယ်ပိုင်းဒေသတွင် အင်အား (၆ ဒသမ ၈) အဆင့်ရှိသော မြေငလျင်လှုပ်ခတ်ခဲ့မှုကြောင့် ပုဂံရှိ သဗ္ဗညုဘုရားအပါအဝင် ရှေးဟောင်းစေတီ ပုထိုးပေါင်း(၃၈၉)ဆူ ထိခိုက်ပျက်စီးခဲ့သည်။ သဗ္ဗညု ဘုရားနှင့်ပတ်သက်၍ ထိန်းသိမ်းစောင့်ရှောက်ရေး လုပ်ငန်းများ လုပ်ကိုင်နိုင်ရန် ယဉ်ကျေးမှုအမွေအနှစ် ကာကွယ်ထိန်းသိမ်းရေးကော်မတီ ဖွဲ့စည်းထားပြီး အဆိုပါကော်မတီကို ဘုရားကြီးအတွက်သာမက ပုဂံဒေသနှင့် ပတ်သက်ပြီးဖွဲ့စည်းထားခြင်းဖြစ်ကြောင်း သိရသည်။