အိဖြူသိမ့် (NSS) - ဖေဖော်ဝါရီ ၁၃

အဆိုတော်အောင်လ(ခ)ဇွဲရန်အောင်လှက ဇနီးဖြစ်သူ ဝိုင်းစုခိုင်သိန်းအား နှစ်ဦးသဘောတူ ကွာရှင်းပြတ်စဲပေး တော့မည်ဖြစ်ကြောင်းနှင့် နှစ်ဦးသားပိုင်ဆိုင်မှုကို အညီအမျှခွဲယူကြမည်ဖြစ်ကြောင်း နိုင်ငံပိုင်သတင်းစာမှတဆင့် ဖေဖော်ဝါရီလ ၆ ရက်တွင် တရားဝင်အသိပေးအကြောင်းကြားလိုက်သည်။ 

၎င်းတို့နှစ်ဦးသည် ၂၀၁၈ ခုနှစ် မတ်လတွင် မြန်မာ့ဓလေ့ထုံးတမ်းဥပဒေအရ တရားဝင်လက်ထပ်၍ အကြင် လင်မယားအဖြစ် စတင်ပေါင်းသင်းနေထိုင်ခဲ့ခြင်းဖြစ်ကြောင်း၊ ထိုအချိန်မှစ၍ နှစ်ဦးသားပေါင်းသင်း နေထိုင်ခဲ့သည့် ကာလများအတွင်း အမှတ်(၄၁၅)၊ သရဖီ(၅)လမ်း၊ (၃၄) ရပ်ကွက်၊ ဒဂုံမြို့သစ်မြောက်ပိုင်းမြို့နယ်၊ ရန်ကုန်တိုင်း ဒေသကြီးရှိ အကျယ်အဝန်း ပေ(၄၀/၆၀) ကျယ်ဝန်းသောမြေကွက်၊ အဆိုပါမြေကွက်ပေါ်တွင် ဆောက်လုပ်ထား သည့် နှစ်ထပ်တိုက်တစ်လုံး နှင့် အိမ်ထောင်ပရိဘောဂပစ္စည်းများ၊ ရှမ်းပြည်နယ် ကလောမြို့ ကလော-ကယား လမ်းကြီး (၁၂) ရပ်ကွက်ရှိ အကျယ်အဝန်း(ဝ.၄) ဧကရှိ မြေ (၁) ကွက်၊ ရှမ်းပြည်နယ် ကလောမြို့ ရွာပု ရွာရှိ အကျယ်အဝန်း(၁၀)ဧကရှိ မြေ(၁)ကွက်၊ ယာဉ်အမှတ် (၇ဏ-၅၅၄၄) PEUGEOT 5008 အမျိုးအစား အဖြူရောင်ကား(၁)စီး၊ စတူဒီယိုခန်းအတွင်းရှိ တူရိယာပစ္စည်းများကို ပိုင်ဆိုင်ခဲ့ကြောင်း သတင်းစာ အတွင်း ဖော်ပြပါရှိချက်အရ သိရသည်။ 

အောင်လ (ခ) ဇွဲရန်အောင်လှသည် တည်ဆဲအစိုးရကို စော်ကားပုန်ကန်မှု အကြမ်းဖက်အားပေး အားမြောက်ပြုမှု များဖြင့် ၂၀၂၂ ခုနှစ် ဧပြီလ ၄ ရက် တွင် ရာဇသတ်ကြီးပုဒ်မ ၅၀၅-က(ခ) အရ ပြစ်မှုထင်ရှားခဲ့ရာ အင်းစိန်ဗဟို အကျဉ်းထောင်၌ ပြစ်ဒဏ်ကျခံစေရန် ထောင်ဒဏ် ချမှတ်ခံခဲ့ရပြီး၊ ၂၀၂၄ ခုနှစ် ဇန်နဝါရီလ ၄ ရက် (လွတ်လပ်ရေး နေ့) တွင် နိုင်ငံတော် စီမံအုပ်ချုပ်ရေးကောင်စီ၏ လွတ်ငြိမ်းချမ်းသာခွင့်အမိန့်ဖြင့် ပြန်လည်လွတ်မြောက်ခဲ့ခြင်း ဖြစ်သည်။ 

ထို့သို့အကျဉ်းကျနေစဉ် ဇနီးမယားဖြစ်သူ ဝိုင်းစုခိုင်သိန်းသည် အောင်လ (ခ) ဇွဲရန်အောင်လှထံ ကွာရှင်းပြတ်စဲပေး ရန် အကြိမ်ကြိမ်ဆက်သွယ်ခဲ့ကြောင်း၊ ထိုသို့တောင်းဆိုမှုများရှိခဲ့သော်လည်း အောင်လ(ခ)ဇွဲရန်အောင် ဘက်မှ ကွာရှင်းပြတ်စဲပေး မှု မပြုခဲ့ကြောင်း သိရသည်။ 

အောင်လ (ခ) ဇွဲရန်အောင်လှ အနေဖြင့် လွတ်ငြိမ်းချမ်းသာခွင့်ဖြင့် အကျဉ်းထောင်မှ ပြန်လည် လွတ်မြောက်ချိန် တွင် ဇနီးမယားဖြစ်သူ ဝိုင်းစုခိုင်သိန်း နှင့် နှစ်ဦးသားကြားဖြေရှင်း၍မရနိုင်သည့် လူမှုရေး အရှုပ်အထွေးပြဿနာများ လူသိရှင်ကြား ထွက်ပေါ်လာခဲ့သည်။

၎င်းအကျဉ်းထောင်အတွင်းရှိနေစဉ် ဝိုင်းစု ခိုင်သိန်း သည် တခြားသော အမျိုးသားတစ်ဦးနှင့်ပတ် သက်မှုရှိခဲ့သည်ဟု ယူဆရသော ရုပ်သံဖိုင်တစ်ဖိုင် သည် ဖေ့ဘွတ်လူမှုကွန်ရက်စာမျက်နှာထက်တွင် ပျံ့နှံ့လာခဲ့သည့်အတွက် လူအများ၏ ဝေဖန်ပြောဆို မှုများနှင့်ရင်ဆိုင်ခဲ့ရသည်။

ထို့နောက် ၎င်းတို့၏ လင်မယားကြား ပြဿနာများသည် ဆိုရှယ်မီဒီယာများ၊ ပလက်ဖောင်း များပေါ်ထိပျံ့နှံ့ခဲ့ပြီး အောင်လ၏ အသိုင်းအဝိုင်းမှ စတင်၍ အဆိုတော်ဝိုင်းစုခိုင်သိန်း၏ ဂုဏ်သိက္ခာ ညှိုးနွမ်းစေရန် ရေးသားပြောဆိုမှုများ ပြုလုပ်ခဲ့ကြ ပြီးနောက် ဝိုင်းစုခိုင်သိန်းသည်လည်း အောင်လ (ခ) ဇွဲရန်အောင်လှ၏ လူမှုရေးအရှုပ်အထွေးကိစ္စများနှင့် အိမ်တွင်းရေး အကြမ်းဖက်မှုလုပ်ရပ်တချို့ကို မီဒီယာ များထံ အသိပေးမှုများရှိခဲ့သည်ကိုလည်း တွေ့မြင်ခဲ့ရသည်။ 

လက်ရှိတွင် အောင်လ (ခ) ဇွဲရန်အောင်လှ သည် ဇနီးမယားဖြစ်ခဲ့သူ ဝိုင်းစုခိုင်သိန်း၏ တောင်းဆိုသည့်ဆန္ဒအတိုင်း တရားဝင်အကြင်လင်မယားအဖြစ်မှ ကွာရှင်းပြတ်စဲပေးမည်ဖြစ်ကြောင်း နှင့် လင်မယားနှစ်ဦးသားပိုင် သာမန် လက်ထပ်ပွားပစ္စည်းများအား မြန်မာ့ဓလေ့ထုံးတမ်းဥပဒေနှင့်အညီ အညီအမျှခွဲဝေယူရန် ဥပဒေအရအကြောင်း ကြားခဲ့ခြင်းဖြစ်ကြောင်း သတင်းစာဖော်ပြချက်များအရ သိရသည်။ နိုင်ငံပိုင်သတင်းစာတွင် ဖော်ပြပါရှိသည့် နေ့/ရက်(ဖေဖော်ဝါရီ ၆)မှစ၍ (၁၅) ရက်တိတိ မြောက်သည့်နေ့ နောက်ဆုံးထား၍ ဆောင်ရွက်ပေး ပါရန် နှင့် မည်သည့်အကြောင်းနှင့်မဆို ဆောင်ရွက် ပေးခြင်း မပြုခဲ့ပါက ဥပဒေအရ ဆက်လက်အရေးယူ ဆောင်ရွက်မှုများ လုပ်ဆောင်သွားမည် ဖြစ်ကြောင်း အောင်လ (ခ) ဇွဲရန်အောင်လှဘက်မှ အသိပေးစာ ထုတ်ပြန်ခဲ့သည်ကိုလည်း တွေ့ရသည်။ 

ထိုသို့ အောင်လ (ခ) ဇွဲရန်အောင်လှ၏ အသိပေးအကြောင်းကြားစာနှင့်ပတ်သက်၍ အဆိုတော် ဝိုင်းစုခိုင်သိန်း ဘက်မှ ဖေဖော်ဝါရီလ ၁၃ ရက် အထိ တစ်စုံတစ်ရာမှ လူသိရှင်ကြား ပြန်လည်အသိပေး ဖြေရှင်းထားခြင်း မရှိသေးပေ။