မြူနစ် (NSS) - ဖေဖော်ဝါရီ ၁၃

လက်နက်ကိုင်တိုက်ပွဲဖော်၍ ရယူထားသောနယ်မြေများကို ကိုယ်ပိုင်အုပ်ချုပ်ခွင့်နှင့် ကိုယ်ပိုင်ပြဋ္ဌာန်းခွင့်သတ်မှတ်ခြင်းတို့သည် တရားဝင်ဖြစ်မှုမရှိသည့်အတွက် တည်မြဲမှုမရှိနိုင်ကြောင်း နိုင်ငံရေးအသိုင်းအဝိုင်းက ထောက်ပြပြောကြားသည်။

မြောက်ပိုင်းမဟာမိတ်လက်နက်ကိုင် (၃)ဖွဲ့ဖြစ်သည့် MNDAA ၊ TNLA ၊  AA တို့သည် ၂၀၂၃ ခုနှစ် အောက်တိုဘာလ ၂၇ ရက်မှစတင်ကာ ၁၀၂၇ စစ်ဆင်ရေးအမည်ဖြင့် ရှမ်းမြောက်ဒေသရှိ တပ်မတော် လုံခြုံရေးစခန်းများကို တိုက်ခိုက်ကာ မြို့များကို သိမ်းပိုက် ထိန်းချုပ်ထားသည်။

ထိုသို့ သိမ်းပိုက်ထိန်းချုပ်ထားသည့် မြို့များတွင်လည်း ၎င်းလက်နက်ကိုင်အဖွဲ့များအနေဖြင့် ကိုယ်ပိုင် နယ်မြေ အဖြစ်သတ်မှတ်ကာ အုပ်ချုပ်ရေးလုပ်ငန်းများကို စတင်လျက်ရှိသည်။

ကိုယ်ပိုင်အုပ်ချုပ်ခွင့်၊ ကိုယ်ပိုင်ပြဋ္ဌာန်းခွင့်သည် နိုင်ငံရေးအရ ဆွေးနွေးဆောင်ရွက်ကာ လွှတ်တော်၏ အတည်ပြု ချက်ရရှိရန်လိုအပ်ပြီး လက်နက်ကိုင်လမ်းစဉ်ဖြင့် တောင်းဆို၍မရနိုင်ကြောင်း နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ယခုရက်ပိုင်းအတွင်း ထုတ်ဖော်ပြောဆိုထားသည်။

“လက်နက်နဲ့ သူတို့ရဲ့နယ်မြေတွေကို ရယူနိုင် ပြီဆိုရုံလောက်နဲ့ အခြေခံဥပဒေအရ ကိုယ်ပိုင်အုပ်ချုပ်ခွင့်၊ ကိုယ်ပိုင် ပြဋ္ဌာန်းပိုင်ခွင့်ကို ရတာမဟုတ်ဘူးလို့ အဓိပ္ပာယ် ဖွင့်လိုပုံရတယ်။ လက်နက်နဲ့ သူ့နေရာကိုပြန်ပြီး ရရုံနဲ့ပေါ့ဗျာ။ သူတို့မျှော်မှန်းတဲ့၊ ရည်မှန်းတဲ့ ကိုယ်ပိုင်အုပ်ချုပ်ခွင့်၊ ကိုယ်ပိုင်ပြဋ္ဌာန်းပိုင်ခွင့်ကို ရသွားပြီလို့ မှတ်ယူလို့မရဘူး ဆိုတာကို သတင်းပါးလိုပုံရတယ်။ ဆိုတော့ အခြေခံဥပဒေအရပဲ ကိုယ်ပိုင်အုပ်ချုပ်ခွင့်၊ ကိုယ်ပိုင်ပြဋ္ဌာန်းပိုင်ခွင့်ကို ရယူနိုင်တယ်။ သူ့အနေနဲ့ အခြေခံဥပဒေအရ ပေးပိုင်ခွင့်မရှိဘူးဆိုတာကို ပြောလိုပုံရတယ်။ အဲဒါကတော့ အခြေခံဥပဒေအပေါ်မှာ သူ့ဘက်က ရပ်တည်ချက်ကို ပြောတာဖြစ်မယ်” ဟု ရခိုင့်ဦးဆောင်ပါတီဥက္ကဋ္ဌ ဒေါက်တာ အေးမောင်က NP News ကို သုံးသပ်ပြောကြားသည်။

လက်ရှိဖြစ်ပွားနေသောပြဿနာများသည် ကိုယ်ပိုင်အုပ်ချုပ်ခွင့်၊ ကိုယ်ပိုင်ပြဋ္ဌာန်းခွင့်နှင့် ကိုယ်ပိုင်ပြည်နယ်များကို ဥပဒေပြင်ပမှ တောင်းဆိုလာခြင်းဖြစ်သည်ဟုလည်း နစကဥက္ကဋ္ဌက ဆိုသည်။

ထို့ပြင် ကိုယ်ပိုင်အုပ်ချုပ်ခွင့်နှင့် ကိုယ်ပိုင်ပြဋ္ဌာန်းခွင့်ကို အခြေခံဥပဒေအရ ဆွေးနွေးအတည်ပြုပြီး ရယူထားခြင်း မဟုတ်သည့်အတွက် ပြဋ္ဌာန်းခွင့်နှင့် အုပ်ချုပ်ခွင့်တို့သည် ပီပီပြင်ပြင်ဖြစ်မလာနိုင်ကြောင်းနှင့် တိုက်ပွဲများလည်း ဆက်လက်ဖြစ်ပွားနိုင်ကြောင်း ဒေါက်တာအေးမောင်က ဆက်လက်သုံးသပ်ထားသည်။

“လိုရင်းက ရယူသွားရင်လည်းပဲ  အဲဒီနယ်မြေ ကို ပြန်ရယူဖို့အတွက် သူ့(နစကဥက္ကဋ္ဌ)မှာ တာဝန်ပေးထား ပြီးသားဖြစ်တယ်။ အဲဒါကြောင့် အဲဒီလို မြေရသွားရင်လည်းပဲ သူ့ဘက်က ပြန်ရအောင်လုပ်ရမယ်။ အဲဒီနယ်မြေ တွေသည် မတည်မြဲဘူး။ မငြိမ်းချမ်းဘူးပေါ့ဗျာ။ ဒါကြောင့် ကိုယ်ပိုင်အုပ်ချုပ်ခွင့်၊ ကိုယ်ပိုင်ပြဋ္ဌာန်းပိုင်ခွင့်ဆိုတာ ပီပီပြင်ပြင်ဖြစ် မလာနိုင်ဘူး။ စစ်ဖြစ်နေကြရအုံးမယ်။ သူလည်း ပေးလို့မရဘူး။ ပေးလို့မရသလို မရရအောင် ပြန်ယူရမယ့် တာဝန်လည်းရှိနေတယ်။ ဘယ်လိုပဲဖြစ်ဖြစ် သူ့ဘက်က တိုက်ကွက်ပြန်ဖော်ရမယ်ဆိုတာကို သတင်းပါးတဲ့ ပုံပေါက်တာပေါ့” ဟု ဒေါက်တာအေးမောင်က ပြောသည်။

အမျိုးသားတန်းတူရေး၊ ကိုယ်ပိုင်ပြဋ္ဌာန်းခွင့် အခွင့်အရေးများနှင့်ပတ်သက်၍ NCA ရေးဆွဲစဉ်က ညှိနှိုင်းသဘော တူညီမှုများ ပြုလုပ်ကာ ထည့်သွင်းရေးဆွဲ၍ အတည်ပြုထားပြီးဖြစ်ကြောင်း အမျိုးသားတန်းတူရေးနှင့် ကိုယ်ပိုင် ပြဋ္ဌာန်းခွင့်တို့ကို သက်ဆိုင်သူများအားလုံး ညှိနှိုင်းဆွေးနွေးမှုဖြင့် ရရှိလာသည့်သဘောတူညီချက်သည်သာ လက်တွေ့ပိုကျကြောင်းလည်း ငြိမ်းချမ်းရေးလုပ် ငန်းစဉ်ဦးဆောင်အဖွဲ့ (PPST) မှ ဗိုလ်မှူးကြီး စောကျော်ညွန့်က NP News ကို သုံးသပ်ပြောကြားသည်။

“ကျွန်တော်တို့ ပြောနေတဲ့ ဖက်ဒရယ်ဒီမိုက ရေစီပြည်ထောင်စုလို့ပဲ ပြောပြော၊ တိုင်းရင်းသားတွေအနေနဲ့ကလည်း အမျိုးသားတန်းတူရေး၊ ကိုယ်ပိုင်ပြဋ္ဌာန်းခွင့်၊ ဒီမိုကရေစီအရေးတွေကို ပြည့်ပြည့်ဝဝ ကျင့်သုံး နိုင်တဲ့ ယူနစ်တွေရှိတဲ့ လူမျိုးတစ်မျိုးအနေနဲ့ ရပ်တည်နိုင်ဖို့အတွက် ကျွန်တော်တို့သက်ဆိုင်သူတွေအားလုံး ညှိနှိုင်းဆွေးနွေးပြောဆိုခြင်း ကနေ ထွက်ရှိလာတဲ့ သဘောတူညီချက်အရ လုပ်ဆောင်ခြင်းက ပိုပြီးတော့ လက်တွေ့ကျမယ်လို့ ကျွန်တော့် အနေနဲ့ အဲဒီလိုမြင်ပါတယ်” ဟု ၎င်းက ပြောသည်။

ဖွဲ့စည်းပုံအခြေခံဥပဒေ (၂၀ဝ၈ ခုနှစ်)သည် ပြည်သူ ၉၀ ရာခိုင်နှုန်းကျော်၏ ဆန္ဒမဲများဖြင့် အတည်ပြုပြဋ္ဌာန်းထား ခြင်းဖြစ်သည့်အတွက်  ကျော်လွန်ဆောင်ရွက်၍ မရ ကြောင်းလည်း ဗိုလ်ချုပ်မှူးကြီးမင်းအောင်လှိုင်က ထုတ်ဖော် အသိပေးထားပြီးဖွဲ့စည်းပုံအခြေခံဥပဒေကို ကျော်လွန်၍ မည်သူ့ထံတွင်မှ အခွင့်အာဏာမရှိကြောင်း ထောက်ပြ သတိပေးထားသည်။

လက်ရှိတွင် နိုင်ငံအတွင်း၌ တပ်မတော်နှင့်      တိုင်းရင်းသားလက်နက်ကိုင်အဖွဲ့များကြား တိုက်ပွဲများ ဖြစ်ပွားလျက်ရှိပြီး နိုင်ငံရေးနည်းဖြင့် ဖြေရှင်းသည့် ငြိမ်းချမ်းရေးလုပ်ငန်းစဉ်များသည် လျော့နည်းရပ်တန့်လျက်ရှိသည်။